वीरगंज । जिल्ला प्रहरी कार्यालय पर्साले ३५० लिटर तयारी घरेलु मदिरासहित एक हाईस गाडी र चालकलाई पक्राउ गरेको छ।
प्रहरीका अनुसार आइतबार दिउँसो करिब २ बजे वीरगंज महानगरपालिका वडा नं. २१ परवानीपुर सडकखण्डमा पथलैयाबाट वीरगञ्जतर्फ आउँदै गरेको ना.१ ज ८६८८ नम्बरको हाईस गाडीलाई प्रहरी टोलीले रोकी चेकजाँच गरेको थियो। चेकजाँचका क्रममा गाडीभित्र लुकाइछिपाइ राखिएको अवस्थामा करिब ३५० लिटर तयारी घरेलु मदिरा फेला परेको प्रहरीले जनाएको छ।
घरेलु मदिरा ओसारपसारमा संलग्न रहेको अभियोगमा गाडी चालक मकवानपुर मनहरी गाउँपालिकाका वडा नं. २ निवासी ३८ वर्षीय मनोज कुमार थिङलाई नियन्त्रणमा लिइएको हो। बरामद घरेलु मदिरा र गाडी आवश्यक अनुसन्धान तथा कारबाहीका लागि आन्तरिक राजस्व अनुसन्धान कार्यालय वीरगंजमा बुझाइएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए ।
