वीरगंज । लिटिल बडी प्री–स्कुल, वीरगंजमा आयोजित वार्षिक खेलकुद सप्ताहको समापन कार्यक्रम सम्पन्न भएको छ। समापन अवसरमा विद्यालयले विभिन्न खेलकुद प्रतियोगितामा सहभागी तथा विजयी विद्यार्थीहरूलाई प्रमाणपत्र र मेडल वितरण गरेको छ।
विद्यालयका प्रधानाध्यापक विजय कुमार बलको अध्यक्षतामा सम्पन्न समापन समारोहमा बोल्दै प्याब्सन मधेश प्रदेशका वरिष्ठ उपाध्यक्ष पुरण प्रधानले बालबालिकाको समग्र विकासका लागि प्रारम्भिक तहदेखि नै खेलकुद, अनुशासन र नैतिक शिक्षाको ठूलो महत्व रहेको बताए। उनले लिटिल बडी प्री–स्कुलले शैक्षिक अध्ययनसँगै खेलकुद तथा अतिरिक्त क्रियाकलापलाई प्राथमिकतामा राख्दै आएकोमा प्रशंसा गर्दै यस्ता कार्यक्रमहरूले बालबालिकामा आत्मविश्वास, अनुशासन, नेतृत्व क्षमता र सहकार्यको भावना विकास गर्ने उल्लेख गरे।
कार्यक्रममा प्याब्सन वीरगंज महानगरका अध्यक्ष राहुल श्रीवस्तव, कोषाध्यक्ष सुरज बाबु पटेल, शिव गुप्ता, आलोक चौरसिया, दिवेश गुप्ता, अमित आलोक, सन्नी पाख्रिन, शुशिल के.सी., कमल चौगाई, सुमित कलवार, सुप्रिया पौडेललगायतको उपस्थिति रहेको थियो।
कार्यक्रममा सुप्रिया पौडेलले शुभकामना मन्तव्य दिँदै खेलकुदले बालबालिकालाई शारीरिक रूपमा स्वस्थ, मानसिक रूपमा सबल र सामाजिक रूपमा सक्रिय बनाउने बताइन्। कार्यक्रमको सहजीकरण स्वेता गुप्ताले गरेकी थिइन्।
