काठमाडौं । नेपाल कम्युनिष्ट पार्टी (एकीकृत समाजवादी) का अध्यक्ष तथा पूर्वप्रधानमन्त्री माधवकुमार नेपालले जेन–जी पुस्ताको आन्दोलनमाथि भएको दमन, नरसंहार र हिंसात्मक घटनाको कडा निन्दा गर्दै आन्दोलनका जायज मागहरूप्रति पूर्ण समर्थन जनाएका छन् ।

पार्टीद्वारा जारी विज्ञप्तिमा अध्यक्ष नेपालले सामाजिक सञ्जालमाथिको नियन्त्रण, भ्रष्टाचार र कुशासनविरुद्ध २०८२ भदौ २३ मा जेन–जी पुस्ताले सुरु गरेको आन्दोलनमाथि सरकारले अत्यधिक बल प्रयोग गर्दा ३० जनाभन्दा बढीको मृत्यु र सयौं घाइते भएको बताउँदै मृतकप्रति श्रद्धाञ्जली र परिवारप्रति समवेदना व्यक्त गरेका छन्।

नेकपा (एकीकृत समाजवादी) ले आन्दोलनका क्रममा घाइतेहरूको उचित उपचारको व्यवस्था तथा उच्चस्तरीय न्यायिक छानबिन समिति गठन गरी दोषीमाथि कारबाहीको माग गरेको छ। विज्ञप्तिमा आन्दोलनभित्र घुसेका अराजक तत्वहरूले सिंहदरबारदेखि विभिन्न सरकारी कार्यालय, ऐतिहासिक धरोहर, निजी सम्पत्ति, बैंक, स्टोर, होटेलमा तोडफोड र आगजनी गरेको घटनालाई “निकृष्ट कुकृत्य” भन्दै दोषी पहिचान गरी कारबाहीको माग गरेको छ।

अध्यक्ष नेपालले जेन–जी पुस्ताको आन्दोलन लोकतन्त्रलाई समाप्त गर्ने नभई अझ जनपक्षीय बनाउनकै लागि भएको भन्दै लोकतन्त्र विरोधी र घुसपैठीयाले संसद विघटन र संविधान खारेज गरेर अस्थिरता ल्याउने षड्यन्त्र गरिरहेको आरोप लगाएका छन् । उनका अनुसार जेन–जीको माग वर्तमान संविधानभित्रै संवोधन गर्न सकिने भएकाले संविधान संशोधनमार्फत सुधारको बाटो खोल्न सकिनेछ।

विज्ञप्तिमा हालको संकटको मूल कारण बेरोजगारी, युवा पलायन, कुशासन र नेतृत्वको अहंकार रहेको उल्लेख गर्दै, समाजवादको तयारी र सुशासनको अभियानसँग जेन–जीको माग मिल्दो रहेकाले त्यसमा पार्टी ऐक्यवद्ध रहेको जनाइएको छ।

नेकपा (एकीकृत समाजवादी) ले घाइतेहरूको उपचार, मृतक परिवारलाई सहानुभूति, भ्रष्ट्राचारविरुद्धको एजेन्डामा सहयोग, जेन–जी आन्दोलनमा घुसेका अराजक तत्वहरूको छानबिन र कडा कारबाहीको माग गर्दै आफ्ना नेता, कार्यकर्ता र समर्थकलाई जनताका घरघरमा पुगेर सहयोग र समवेदना व्यक्त गर्न निर्देशन दिएको छ।

अध्यक्ष नेपालले विज्ञप्तिमा संविधान र कानूनको रक्षार्थ खटिन, सामाजिक सद्भाव कायम गर्न र जनताको सेवामा अविचलित रहन पार्टीका सम्पूर्ण नेता तथा कार्यकर्तालाई अपिल गरेका छन् ।

काठमाडौं । आम जनता पार्टी (आजपा)का अध्यक्ष प्रभु साहले जेन जी पुस्ताको अगुवाइमा भइरहेको जन आन्दोलनलाई नेतृत्वको “फेस चेन्ज” (सतही परिवर्तन) मा मात्र सीमित गर्ने षड्यन्त्र भइरहेको दाबी गरेका छन्।

सामाजिक सञ्जालमार्फत प्रतिक्रिया दिँदै साहले आन्दोलनको मूल लक्ष्य समग्र व्यवस्थागत सुधार, लुट–भ्रष्टाचारको अन्त्य र अवस्थाको परिवर्तन भएको उल्लेख गरे।

साहका अनुसार देशको अहिलेको दुरावस्था केवल नेतृत्वकै कारण नभई गलत प्रणाली र संरचनाका कारण उत्पन्न भएको हो। उनले भ्रष्टाचार केन्द्र सरकार मात्रै नभई प्रदेश र स्थानीय तहमा समेत गहिरो रूपमा व्याप्त रहेको दाबी गर्दै युवाहरूलाई ललिपप दिएर झुक्याउने प्रयास अस्वीकार्य हुने चेतावनी दिए।

साहले जेन जी पुस्तालाई सतहमा रमाउने होइन, समस्याको गहिराइमा पुगेर समाधान खोज्न आग्रह गरे। उनका अनुसार नेतृत्वमा मात्र होइन, व्यवस्थामा समाधान खोज्नुपर्ने आवश्यकता छ, नत्र जनक्रान्तिको औचित्य पुष्टि गर्न गाह्रो हुनेछ।

साहले हालको संकटको एक मात्र सही निकास “लुटेरा भगौडाहरूको दलाल दलतन्त्रको अन्त्य, जनपक्षीय अन्तिरिम सरकार र जननिर्वाचित संस्थाको सर्वोच्चता सहितको नयाँ संविधान” रहेको उल्लेख गर्दै “नयाँ सरकार र नयाँ संविधान” को नारा दिन सबैलाई अपील गरेका छन्।