वीरगंज । पर्सा जिल्लाको निर्वाचन क्षेत्र नम्बर–३ मा नेकपा एमालेको क्षेत्रीय समन्वय कमिटीको बैठक शनिबार सम्पन्न भएको छ। आगामी प्रतिनिधिसभा निर्वाचनलाई केन्द्रमा राखी आयोजित उक्त बैठकमा चुनावी रणनीति, संगठन सुदृढीकरण तथा पार्टीपंक्तिको प्रभावकारी परिचालनबारे गम्भीर छलफल गरिएको हो।

भेलामा नेपाली कांग्रेस निकट तरुण दल पर्सा सचिव सन्तोष महतो, राष्ट्रिय मुक्ति पार्टीका सदाम हुसैन लगायत पोखरिया नगरपालिका वडा नं. ८ मननपुर निवासी खरदार मिया, औरन्जेव अंसारी, मयोनदिन मिया, रामनाथ सहनी, रामबाबु सहनी, मजिद राय, मोति मुखिया बिन, परशुराम मिश्रसहित दुई दर्जनभन्दा बढी नेता तथा कार्यकर्ताहरू नेकपा एमालेमा प्रवेश गरेका छन् । नवप्रवेशीहरूलाई एमाले नेताहरूले खादा र टीका लगाएर पार्टीमा स्वागत गरेका थिए।

भेलालाई सम्बोधन गर्दै नेकपा एमाले पर्सा–३ का प्रतिनिधिसभा सदस्यका उम्मेदवार रूपेश कुमार पाण्डेले पर्सा–३ लाई विकास, सुशासन र अवसरको दृष्टिले देशकै नमुना क्षेत्र बनाउने दृढ प्रतिबद्धता व्यक्त गरे । उनले युवाको ऊर्जा, अनुभवको मार्गदर्शन र जनताको भरोसामा आधारित समावेशी विकासको खाका प्रस्तुत गर्दै रोजगारी, पूर्वाधार, शिक्षा र स्वास्थ्यलाई प्राथमिकतामा राख्ने बताए ।

क्षेत्रीय समन्वय कमिटीका अध्यक्ष फर्मान मियाको अध्यक्षता तथा नेकपा एमाले केन्द्रीय कमिटी सदस्य एवं पर्सा जिल्ला इन्चार्ज प्रभु हजराको प्रमुख आतिथ्यमा सम्पन्न बैठकमा पार्टीका शीर्ष तथा प्रभावशाली नेताहरूको उल्लेखनीय उपस्थिति रहेको थियो।

कार्यक्रममा केन्द्रीय सदस्य निर्मला देवकोटा, केन्द्रीय सल्लाहकार परिषद सदस्य शिव पटेल, मधेश प्रदेश उपाध्यक्ष बिचारी यादव, पर्सा जिल्ला अध्यक्ष विश्वम्भर शर्मा, पूर्व मन्त्री एवं प्रदेश सभा सदस्य प्रमाेद जयसवाल, सखुवा प्रसौनी गाउँपालिका प्रमुख जसवन्त यादव, युवा नेता अनिल हजरा, अकलेश कुमार साह, कौशल साहलगायत प्रदेश, जिल्ला र पालिका तहका पदाधिकारी तथा कार्यकर्ताहरू सहभागी थिए ।

वीरगंज । पर्सा निर्वाचन क्षेत्र नं. २ मा नेपाली कांग्रेसबाट विद्रोह गर्दै स्वतन्त्र उम्मेदवारी दिएका पूर्व प्रदेश सभा सदस्य राजेश्वर प्रसाद साहले आफ्नाे उम्मेदवारी फिर्ता लिएकाे स्पष्टिकरण दिएका छन्।

सामाजिक सञ्जाल फेसबुकमार्फत सार्वजनिक वक्तव्य जारी गर्दै साहले देशको वर्तमान चुनावी परिस्थिति र पार्टीको प्रतिष्ठालाई मध्यनजर गर्दै कम समयमै उम्मेदवारी फिर्ता लिने निर्णयमा पुगेको बताएका छन्। केही दिनअघि समर्थक, शुभेच्छुक तथा स्थानीयको सल्लाह, सहयोग र समर्थनमा प्रतिनिधि सभा सदस्य निर्वाचनका लागि स्वतन्त्र उम्मेदवारी दर्ता गरेको उल्लेख गर्दै उनले आफ्नो पछिल्लो निर्णयले समर्थकहरूलाई दुख पुगेकोप्रति गहिरो अनुभूति भएको बताएका छन्।

साहले समर्थकहरूको शब्द, सामाजिक सञ्जालका प्रतिक्रिया र मौन पीडा सबै आत्मसात गरेको उल्लेख गर्दै भरोसामा चोट पुगेको सत्यबाट भाग्न नचाहेको र हृदयदेखि नै क्षमायाचना गरेका छन्। उनले परिवर्तन, सुशासन, विकास र नयाँ राजनीतिक संस्कृतिको सपना कहिल्यै नछाडेको स्पष्ट पार्दै उक्त सपना समर्थकहरूसँगै देखेको र आज पनि त्यही विश्वास बोकेको बताएका छन्।

उम्मेदवारी फिर्ता लिने विषयमा फैलिएका हल्लाप्रति प्रतिक्रिया जनाउँदै साहले कुनै दल वा व्यक्तिसँग पद, पैसा, प्रलोभन वा दबाबमा कुनै गोप्य सहमति नगरेको स्पष्ट पारेका छन्। ती सबै हल्ला असत्य भएको उनको दाबी छ।

स्वतन्त्र रूपमा चुनाव लड्नु भावनात्मक रूपमा आकर्षक भए पनि दीर्घकालीन परिवर्तनलाई अझ गाह्रो बनाउने जोखिम रहेको उल्लेख गर्दै साहले आफ्नो निर्णय भावनामा नभई जिम्मेवारी र रणनीतिक परिस्थितिको मूल्यांकनका आधारमा लिएको बताएका छन्। दलभित्रै बसेर सुधार र परिवर्तनको संघर्ष कठिन भए पनि दीर्घकालीन परिवर्तनका लागि यही बाटो उपयुक्त ठानेको उनको भनाइ छ।

हालै सम्पन्न नेपाली कांग्रेसको विशेष महाधिवेशनबाट चयन भएको नयाँ नेतृत्वको उद्देश्य परिवर्तन र पुस्तान्तरण नै रहेको उल्लेख गर्दै साहले व्यक्ति विशेषभन्दा लोकतान्त्रिक प्रक्रिया र संगठनात्मक अनुशासनको सम्मानमा आफू उभिएको स्पष्ट पारेका छन्। उनले आफ्ना विचार त्यागेको नभई तिनलाई अझ इमानदार र जिम्मेवार ढंगले अघि बढाउने प्रतिबद्धता जनाएका छन्।

अन्त्यमा साहले समर्थकहरूसँग थोरै समय दिन आग्रह गर्दै आजको निर्णयभन्दा भोलिका काम र व्यवहारका आधारमा मूल्याङ्कन गर्न अनुरोध गरेका छन्। आफू सधैं समर्थकहरूसँगै रहेको र परिवर्तनको यात्रामा निरन्तर साथ रहने विश्वास दिलाएका छन्।

वीरगंज । नेकपा एमाले पर्सा निर्वाचन क्षेत्र नम्बर–२ की उम्मेदवार रिमा कुमारी यादवले सरस्वती पूजाको अवसर पारेर घरदैलो कार्यक्रमको औपचारिक शुभारम्भ गरेकी छन्। उनी पर्सागढी नगरपालिकाबाट अभियान सुरु गर्दै टोल–टोलमा पुगेर स्थानीयवासीसँग प्रत्यक्ष भेटघाट तथा अन्तरक्रिया गरिन्।

घरदैलो अभियानका क्रममा यादवले स्थानीयवासीका समस्या, गुनासा र अपेक्षाहरू सुनेर शिक्षा, रोजगारी, महिला सशक्तीकरण, आधारभूत सेवा र विकास निर्माणसँग सम्बन्धित धारणा संकलन गरिन्। उनले विद्यालयका विद्यार्थी, अभिभावक र सर्वसाधारणसँग भलाकुसारी गर्दै महिला, युवा र बालबालिकाको भविष्य सुरक्षित गर्न राजनीति परिवर्तनमुखी हुनुपर्नेमा जोड दिइन्।

उम्मेदवार यादवले भनिन्, “परिवर्तनको नेतृत्व महिलाले गर्छन्। अब महिलाको हक–अधिकारका लागि केवल आवाज उठाउने समय सकिएको छ, निर्णायक हस्तक्षेप र नेतृत्वको समय आएको छ।” उनले समृद्ध पर्सा, सबल समाज र जनताको हक–अधिकार सुनिश्चित गर्ने संकल्पका साथ जनतामाझ आएको बताइन्।

स्थानीयवासीहरूले युवा तथा महिला उम्मेदवारलाई अघि सारेकोमा खुलेर प्रशंसा गर्दै यसपटक परिवर्तनका लागि एमालेको पक्षमा मत दिने प्रतिबद्धता व्यक्त गरेका थिए। घरदैलो अभियान आगामी दिनहरूमा पर्सा–२ का अन्य वडाहरूमा पनि विस्तार गरिनेछ। कार्यक्रममा एमाले नेता गोकर्ण पाठक, नेतृ सिता लामा, प्रद्युमन यादव लगायत पार्टीका नेता तथा कार्यकर्ताहरूको उपस्थिति रहेको थियो।