वीरगंज । अपाङ्गता भएका व्यक्तिहरूको खेलकुद विकासमा सरोकारवालाको भूमिका विषयक अन्तरक्रियात्मक कार्यक्रम आइतबार सम्पन्न भएको छ। वीरगंजस्थित होटल गेटवेमा भएकाे उक्त कार्यक्रम नेत्रहिन क्रिकेट संघ नेपाल तथा मधेश प्रदेश नेत्रहिन क्रिकेट संघको संयुक्त आयोजनामा सम्पन्न गरिएको हो।
नेत्रहिन क्रिकेट संघ नेपालका अध्यक्ष पवन घिमिरेको अध्यक्षता तथा वीरगंज महानगरपालिका वडा नम्बर–४ का वडा अध्यक्ष जगत साह कानु प्रमुख आतिथ्यतामा भएकाे कार्यक्रमको सञ्चालन मधेश प्रदेश नेत्रहिन क्रिकेट संघका अध्यक्ष महेश साह कानुले गर्नुभएको थियो।
अन्तरक्रियामा अपाङ्गता भएका व्यक्तिहरूको खेलकुद क्षेत्रमा विद्यमान चुनौती, सम्भावना तथा सरोकारवालाबीच सहकार्यको आवश्यकता विषयमा गहन छलफल गरिएको थियो । सहभागीहरूले नीति निर्माणदेखि स्थानीय तहसम्मको सक्रिय भूमिकाले मात्र अपाङ्गता खेलकुदलाई संस्थागत र प्रभावकारी बनाउन सकिनेमा जोड दिएका थिए ।
कार्यक्रममा नेपाल इनोभेटिभ सोसाइटी वीरगञ्जका अध्यक्ष कमल चौगाई, समाजसेवी रूप शिला जैसवाललगायत विभिन्न संघ–संस्थाका प्रतिनिधिहरूको उल्लेखनीय उपस्थिति रहेको थियो।
कार्यक्रमलाई सम्बोधन गर्दै अध्यक्ष कमल चौगाईले अपाङ्गता भएका खेलाडीहरूलाई अवसर र पहुँच प्रदान गर्नु आजको आवश्यकता भएको बताउनुभयो। उहाँले अपाङ्गता कमजोरी नभई क्षमता भएको उल्लेख गर्दै उचित सहयोग, पूर्वाधार र नीतिगत समर्थन भए अपाङ्गता भएका खेलाडीहरूले राष्ट्रिय तथा अन्तर्राष्ट्रिय स्तरमा देशको नाम उजागर गर्न सक्ने धारणा राख्नुभयो।
कार्यक्रमले अपाङ्गता खेलकुद विकासका लागि सरोकारवालाबीच सहकार्य र प्रतिबद्धता थप मजबुत हुने विश्वास आयोजकले व्यक्त गरेका छन्।
