वीरगंज । पर्सा मदिरा व्यवसायी संघको प्रथम वार्षिक साधारण सभा शनिबार वीरगञ्जको आदर्शनगर स्थित होटेल पुजनमा सम्पन्न भएको छ।
संघका अध्यक्ष चिनिलाल पटेलको अध्यक्षता र वीरगं उद्योग वाणिज्य संघका अध्यक्ष हरि गौतमको प्रमुख आतिथ्यतामा भएको कार्यक्रममा नेपाल बार एशोसिएसन पर्साका अध्यक्ष अधिवक्ता रामनारायण कुर्मी, संघका सल्लाहकार कपिलेश्वर यादव, पत्रकार तुलसी भंडारी लगायतका वक्ताले संघको संरक्षण, सम्वर्द्धन र विकासमा शुभकामना व्यक्त गरे।
सभामा संघका उपाध्यक्ष सन्दीप गुप्ताले स्वागत मन्तव्य प्रस्तुत गरे भने महासचिव प्रदिप लोहारले सङ्घको वार्षिक प्रतिवेदन पेश गरे। कोषाध्यक्ष राकेश साहले आर्थिक वर्ष २०८०/८१ को आय–व्यय विवरण र लेखापरीक्षण प्रतिवेदन प्रस्तुत गरे। साथै आगामी आर्थिक वर्ष २०८१/८२ का नीति, कार्यक्रम तथा वार्षिक बजेट छलफल र अनुमोदन गरिएको संघले जनाएको छ।
सभामा संघको दर्ता नवीकरण, नयाँ लेखापरीक्षक नियुक्ति, विभिन्न समितिमा रिक्त पद पूर्ति, आवश्यक परे विधान संशोधन र संगठनात्मक सुदृढीकरणका प्रस्ताव पनि पेश गरियो। मदिरा व्यवसायसँग सम्बन्धित समस्या, कर प्रणाली, प्रशासनिक झन्झट, व्यवसायीको हकहित संरक्षण तथा बजार व्यवस्थापनका विषयमा विस्तृत छलफल भएको थियो।
सभाको बन्द सत्रबाट नयाँ कार्यसमिति समेत गठन गरेको छ । समितीको अध्यक्षमा चिनिलाल पटेल, उपाध्यक्षमा सन्दीप कुमार गुप्ता, महासचिवमा प्रदिप कुमार लोहार, सचिवमा रबिन्द्र प्रताप साह, कोषाध्यक्षमा राकेश कुमार साह चयन भए। सदस्यहरूमा मनिष प्रसाद कलवार, अनिल कुमार चापागाई, राम कुमार यादव र रन्जित जैसवाल सर्वसम्मत चयन भएका छन्।
कार्यक्रममा सबै सदस्य र प्रतिनिधिलाई सदस्यता प्रमाणपत्र वितरण गरिएको थियो। संघले वार्षिक साधारण सभालाई नीति निर्माणको महत्वपूर्ण अवसरका रूपमा लिएको उल्लेख गर्दै आगामी कार्यदिशा तय गर्ने विश्वास व्यक्त गरेको छ।
