वीरगंज । श्री कालिका एकेडमी बोर्डिङ्ग स्कुल, भेडिहारीको १०औँ वार्षिकोत्सवको अवसरमा शिक्षक सम्मान, वादविवाद प्रतियोगिता तथा विविध सांस्कृतिक कार्यक्रम भव्य रूपमा सम्पन्न भएको छ ।
विद्यालय परिसरमा आयोजित कार्यक्रमको उद्घाटन कालिकामाई गाउँपालिका वडा नं. २ का वडाध्यक्ष सोनालाल चौरसियाले गर्नुभएको थियो । कार्यक्रममा शिक्षा, अनुशासन र सिर्जनात्मक क्षमताले विद्यार्थीको भविष्य निर्माणमा महत्वपूर्ण भूमिका खेल्ने बताउँदै उहाँले विद्यालय परिवारको योगदानको प्रशंसा गर्नुभयो ।
विद्यालयका अध्यक्ष राजकुमार चौरसियाको अध्यक्षतामा सम्पन्न कार्यक्रममा कालिकामाई गाउँपालिका वडा नं. १ का वडाध्यक्ष लालबाबु चौरसिया, प्याब्सन वीरगंज महानगरका अध्यक्ष राहुल श्रीवास्तव, सचिव अमित आलोक, सदस्य विजय बल्ल, हिसान पर्साका उपाध्यक्ष आलोक चौरसिया, शनी पाख्रिन, श्री जनता माध्यमिक विद्यालयका शिक्षक जयप्रकाश चौरसिया लगायतको उपस्थिति रहेको थियो ।
“कलमभन्दा तरवार ठूलो” विषयक वादविवाद प्रतियोगितामा कक्षा ६ की गुडिया खातुन प्रथम, कक्षा ५ की अर्चना चौरसिया द्वितीय तथा युवराज बर्नवाल तृतीय भएका छन् । प्रतियोगिताको निर्णायक मण्डलमा श्री जनता माध्यमिक विद्यालयका शिक्षकदेव बहादुर डाँगी, पवन शर्मा र सुधन गहतराज रहनुभएको थियो ।
कार्यक्रममा विद्यार्थीहरूले प्रस्तुत गरेका सांस्कृतिक नृत्य, गीत तथा अन्य प्रस्तुतीहरूले उपस्थित अभिभावक र अतिथिहरूको मन जितेको थियो । वार्षिकोत्सवले विद्यालयको शैक्षिक तथा अतिरिक्त क्रियाकलापमा निरन्तर प्रगतिप्रति सबैलाई उत्साहित बनाएको सहभागीहरूले बताएका छन् ।
