रौतहट । जेन–जीको भावना अनुरूप क्षेत्रीय समितिले सिफारिस गरेका उम्मेदवारलाई बेवास्ता गर्दै पार्टी हाइकमाण्डले अन्य पार्टीबाट आएका व्यक्तिलाई निर्वाचनको टिकट दिएको आरोप लगाउँदै रामेश्वर प्रसाद यादवले नेपाली काँग्रेस पार्टी परित्यागको घोषणा गर्नुभएको छ।
रौतहट सदरमुकाम गौरस्थित आफ्नै निवासमा आइतबार आयोजित पत्रकार सम्मेलनमार्फत यादवले नेपाली काँग्रेसको साधारण सदस्यसमेत नरहने गरी पार्टी परित्याग गरेको जानकारी दिनुभयो। साथै उहाँले बालेन्द्र साहको नेतृत्वमा चुनाव लडिरहेका उम्मेदवारलाई खुलेर समर्थन गर्ने घोषणा गर्नुभएको छ।
यादवले २०४६ सालको जनआन्दोलनमा सक्रिय भूमिका निर्वाह गरेको स्मरण गराउँदै २०४८ र २०५१ सालको निर्वाचनमा नेपाली काँग्रेसका उम्मेदवारलाई जिताउन आफूले महत्वपूर्ण योगदान दिएको दाबी गर्नुभयो। उहाँका अनुसार फागुन २१ मा हुने निर्वाचनका लागि यस क्षेत्रबाट चार जनाको नाम सिफारिस गरिएको थियो, जसमा उहाँको नाम पनि समावेश थियो। तर काँग्रेस नेतृत्वले आफ्नो योगदानको मूल्यांकन नगरी सद्भावना पार्टीका अध्यक्ष अनिलकुमार झालाई टिकट दिएको भन्दै असन्तुष्टि व्यक्त गर्नुभयो।
काँग्रेसका नेता गगन थापाको नेतृत्वमा पार्टीले लोकतान्त्रिक परिपाटीमाथि ‘कालो धब्बा’ लगाएको आरोप लगाउँदै यादवले अब पार्टीमा रहिरहन आवश्यक नरहेको स्पष्ट पार्नुभयो।
पार्टी परित्यागसँगै उहाँले घण्टी चुनाव चिह्नमा मतदान गरी बालेन्द्र साहको नेतृत्वमा सरकार गठन गर्न सहयोग गर्न क्षेत्रवासीहरूसँग अपिल गर्नुभएको छ।
