वीरगंज । पर्सा निर्वाचन क्षेत्र नम्बर–१ मा जनमत पार्टीको चुनावी कार्यक्रम शनिबार वीरगंज महानगरपालिका वडा नम्बर–१६ स्थित नगवा दक्षिण टोलमा सम्पन्न भएको छ। कार्यक्रममा युवा उम्मेदवार ओमप्रकाश सरार्फलाई स्थानीयवासीहरूले स्वागत गरेका थिए।
कार्यक्रमलाई सम्बोधन गर्दै उम्मेदवार सरार्फले नगवा र वीरगंज महानगरपालिका वडा नम्बर–१६ लाई विगतमा नेताहरूले भोट बैंकको रूपमा मात्र प्रयोग गरेको आरोप लगाए । उनले नगवा र इनरवाजस्ता क्षेत्रलाई विभेदमा पारेर अन्याय गरिएको दाबी गर्दै त्यसको अन्त्य गर्न आफू चुनावी मैदानमा उत्रिएको बताए।
सरार्फले आफ्नो चुनाव चिन्ह ‘हरन’ छापमा मतदान गरी निर्वाचित गराए वडा नम्बर–१६ को कायापलट गर्ने संकल्प व्यक्त गरे। आफू राजनीति तथा सामाजिक गतिविधिमा सक्रिय युवा भएको उल्लेख गर्दै युवाहरूको उत्थानका लागि निरन्तर संघर्ष गर्दै आएको र जेन–जी पुस्ताको प्रतिनिधित्व गर्ने उम्मेदवारका रूपमा आफूलाई प्रस्तुत गरे।
अन्य उम्मेदवारहरू अलमलमा परेको अवस्थामा आफू निरन्तर घरदैलो अभियान र निर्वाचन लक्षित कार्यक्रममै केन्द्रित रहेको उनले बताए।
जनमत पार्टी बुथ इन्चार्ज किरण चौर्सियाको अध्यक्षतामा सम्पन्न कार्यक्रममा पार्टीका नेता विद्यालाल प्रसाद, निराजन कुशवाहा, भुपेन्द्र साह, सत्युह साह, सहनवाज राकीलगायत स्थानीयवासीहरूको उल्लेखनीय उपस्थिति रहेको थियो।
