काठमाडौं  । आम जनता पार्टी (आजपा)ले नयाँ संविधान र वर्तमान व्यवस्थाप्रति कडा आपत्ति जनाउँदै संसद विघटन गरी नयाँ सरकार र नयाँ संविधान निर्माणतर्फ अघि बढ्न सबै सरोकारवालामा अनुरोध गरेको छ। आजपाले शुक्रबार प्रेस विज्ञप्ति जारी गर्दै हालको राजनीतिक तथा प्रशासनिक व्यवस्थालाई भ्रष्टाचार र लुटतन्त्रको मूल स्रोत ठहर गरेकाे छ ।

पार्टीका केन्द्रीय प्रवक्ता चन्द्र भुषण साहले जारी गरेको विज्ञप्तिमा भनिएको छ कि जेन–जी पुस्ताको अगुवाइमा भएको जन आन्दोलनले दिएको स्पष्ट जनादेशलाई सरकारले द्विविधा र बहसका आवरणमा अल्झाएर राष्ट्रिय हितमा काम गर्न असफल भएकोमा आजपा चिन्तित रहेको छ । विज्ञप्तिले वर्तमान घेराबन्दी र यथास्थितिवादी समूहहरु सँगको छलफललाई आन्दोलन, सडक र जनादेशको अवमानना भन्दै कटु रुपमा आलोचना गरेको छ।

आजपाले निम्न प्रमुख मागहरू राखेको छ:

• आन्दोलनका क्रममा भएको युवा–विद्यार्थीको निर्मम हत्याका आदेश जारी गर्ने तत्कालीन प्रधानमन्त्री र त्यसमा संलग्न अन्य सरकारी अधिकारीहरूलाई कानुन बमोजिम कारबाही गर्नुपर्ने।

• राज्य सञ्चालनमा रहेकाहरूको सम्पत्ति स्रोतको छानबिन गरी दोषी ठहर भएका सबैलाई दण्डित गर्नुपर्ने।

• संसद विघटन गरी नयाँ सरकार गठन र नयाँ संविधान निर्माणतर्फ अघि बढ्ने राजनीतिक प्रक्रिया सुरु गर्न सबै सरोकारवालालाई आव्हान।

विज्ञप्तिमा पार्टीले जोडले भनेको छ कि भ्रष्टाचार केवल केन्द्र सरकारमा सिमित नभई प्रदेशदेखि स्थानीय तहसम्म व्याप्त छ र त्यसको जरा वर्तमान राज्य व्यवस्था नै भएकोले प्रणालीगत सुधार नहुँदासम्म सुशासन सम्भव नरहेको उनीहरुको ठहर छ। साथै संविधानवादको रटान मात्रले समस्या समाधान नहुने, अस्वीकृत संवैधानिक निर्माताहरुले माफी माग्नुपर्ने र आफ्नो बाटो छोड्नुपर्ने पार्टीको आह्वान रहेको विज्ञप्तिमा उल्लेख छ।

आजपाले जनआन्दोलनको मर्मलाई तुरुन्त सम्बोधन नगरे थप सामाजिक असन्तुलन र विद्रोहको सम्भावना बढ्ने चेतावनी पनि जारी गरेको छ। विज्ञप्ति अन्त्यमा सबै नागरिक र सरोकारवालालाई संयम, साझा संवाद र नयाँ राजनीतिक विकल्प निर्माणको लागि एकमुष्ट भएर अघि बढ्न अपिल गरिएको छ।