वीरगंज । पर्सा जिल्लाको पर्सागढी नगरपालिकामा राष्ट्रिय स्वतन्त्र पार्टी (रास्वपा) को नगर पार्टी कार्यालय स्थापना गरी सञ्चालनमा ल्याइएको छ ।
बडनिहारमा स्थापना गरिएको रास्वपाको नगर पार्टी कार्यालय आइतबार रास्वपाका पर्सा–२ का उम्मेदवार सुशील कुमार कानुले उद्घाटन गर्नुभएको हो । उद्घाटन कार्यक्रममा पार्टीका स्थानीय नेता–कार्यकर्ता तथा समर्थकहरूको उल्लेख्य उपस्थिति रहेको थियो ।
पार्टी कार्यालयको उद्घाटन गर्दै उम्मेदवार कानुले देशमा परिवर्तनको लहर सुरु भइसकेको दाबी गर्नुभयो । उहाँले रास्वपाले पहिलो पटक मधेसी समुदायका छोरा बालेन शाहलाई प्रधानमन्त्री बनाउने उद्घोष गरिसकेको उल्लेख गर्दै यसले मधेसी समुदाय मात्र नभई देशभरका नेपाली जनतामा नयाँ उत्साह पैदा गरेको बताउनुभयो ।
कानुले पुराना राजनीतिक दलहरूको कार्यशैलीप्रति जनतामा बढ्दो असन्तुष्टि रहेको र त्यसको विकल्पका रूपमा रास्वपा स्थापित हुँदै गएको जिकिर गर्नुभयो । आगामी निर्वाचनमा रास्वपाले प्रचण्ड बहुमतका साथ विजय हासिल गर्ने विश्वास व्यक्त गर्दै उहाँले परिवर्तन चाहने सबैलाई पार्टीमा जोडिन आग्रह गर्नुभयो ।
नगर पार्टी कार्यालय स्थापनासँगै पर्सागढी नगरपालिकामा रास्वपाको संगठन विस्तार र चुनावी गतिविधि थप सशक्त हुने पार्टीका नेताहरूले बताएका छन् ।
