वीरगंज । आगामी फागुन २१ गते हुने प्रतिनिधि सभा निर्वाचनमा पर्सा जिल्लामा जनता समाजवादी पार्टी (जसपा) नेपाल कमजोर देखिएको छ । २०७४ सालको निर्वाचनमा तीन वटा र २०७९ सालको निर्वाचनमा एउटा क्षेत्रमा मात्र जित हासिल गरेको जसपा यसपटकको निर्वाचनमा अपेक्षित बलियो उपस्थिति देखाउन असफल भएको हो ।
पर्सा सहित मधेश प्रदेशमै प्रभावशाली मानिँदै आएको उपेन्द्र यादव नेतृत्वको जसपा, जेनजी आन्दोलनपछिको राजनीतिक उतारचढाव र महन्त ठाकुर नेतृत्वको लोकतान्त्रिक समाजवादी पार्टी (लोसपा) सँग एकता गर्दा पनि संगठनात्मक रूपमा मजबुत देखिन सकेको छैन । यसपटकको निर्वाचनमा जसपाले पर्साका चार वटै निर्वाचन क्षेत्रमा प्रतिनिधि सभा सदस्यका उम्मेदवार खडा गरे पनि क्षेत्र नं. ४ बाहेक अन्य क्षेत्रमा उम्मेदवारहरू प्रतिस्पर्धामै नदेखिएको राजनीतिक विश्लेषकहरू बताउँछन् ।
जसपाले पर्सा क्षेत्र नं. १ मा जिल्ला अध्यक्ष रामनरेश यादव, क्षेत्र नं. २ मा उद्योगी अशोक टेमानी, क्षेत्र नं. ३ मा नागेन्द्र प्रसाद यादव र क्षेत्र नं. ४ मा डा. कृपासिन्धु प्रसाद चौधरीलाई उम्मेदवार बनाएको छ । तर क्षेत्र नं. ४ बाहेक अन्य क्षेत्रमा जसपाका उम्मेदवार कमजोर देखिएका छन् ।
पर्सा क्षेत्र नं. १ मा जसपा नेपालबाट निर्वाचित पूर्व मन्त्री तथा निवर्तमान सांसद प्रदीप यादव र वीरगंज महानगरपालिकाका मेयर राजेशमान सिंहले पार्टी परित्याग गरेपछि जसपा थप कमजोर बनेको छ । निवर्तमान सांसद यादव यसपटक एमालेका उम्मेदवार बनेकाले पनि यस क्षेत्रमा जसपाको संगठन प्रभावित भएको छ ।
यसैगरी क्षेत्र नं. २ मा नयाँ अनुहारलाई उम्मेदवार बनाइएको र उक्त क्षेत्रमा उनको राजनीतिक प्रभाव तथा लगानी कमजोर रहेकाले जसपा कमजोर देखिएको हो ।
क्षेत्र नं. ३ मा योग्य उम्मेदवार नपाएपछि स्थानीय नेतालाई उम्मेदवार बनाउनु परेको जसपाले स्राेतले जनाएकाे छ । साथै यस क्षेत्र अन्तर्गतका कुनै पनि पालिकामा जसपाले चुनाव जित्न नसकेको इतिहासले पनि पार्टीलाई कमजोर बनाएको छ ।
तर क्षेत्र नं. ४ मा भने जसपा अपेक्षाकृत बलियो देखिएको छ । कांग्रेसबाट डा. कृपासिन्धु प्रसाद चौधरीलाई पार्टीमा भित्र्याएर उम्मेदवार बनाएको जसपाले यस क्षेत्र अन्तर्गतका दुई वटा पालिकाे प्रमुख र एउटा प्रदेश सभा सदस्य निर्वाचित जनप्रतिनधि भएका कारण बलियाे देखिएकाे हाे ।
यसका साथै कांग्रेस, एमाले र नेकपाका उम्मेदवारहरू पहिल्यै ‘टेस्टेड’ भइसकेको अवस्थामा डा. चौधरी नयाँ र स्वीकार्य अनुहारका रूपमा देखिएकाले यस क्षेत्रमा जसपाको प्रतिस्पर्धात्मक स्थिति बलियो मानिएको छ ।
