वीरगंज । पर्सा जिल्लाको छिपहरमाई गाउँपालिका–५ भिष्वामा बुधबार स्थानीयले गाई तस्करी रोक्न माग गर्दै विरोध प्रदर्शन गरेका छन्। सीमाक्षेत्रमा तस्करीको आरोपपछि स्थानीयहरूले भिष्वा बजारमा टायर बालेर प्रदर्शन गरेका हुन्।

नेपाल–भारत सीमासँग जोडिएको सिकटा क्षेत्रमा गाई तस्करीको घटनापछि स्थानीय बासिन्दा र गोरु संरक्षण समूहबीच आक्रोश फैलिएको हो। सीमाक्षेत्रमा गाई र बाछा बरामद भएको घटनापछि सामाजिक सञ्जालमा एक अडियो क्लिप भाइरल भएपछि स्थिति थप तनावग्रस्त बनेको बताइन्छ।

स्थानीयवासीका अनुसार भारतको बिहार राज्य अन्तर्गत सिकटा विधानसभास्थित झुमकाबाट केही व्यक्तिहरूले साँझको अँध्यारोको मौका लिएर जयमंगलापुर–खुरडी सडकमार्ग हुँदै गाई तस्करीको प्रयास गरेका थिए। सूचना पाएपछि स्थानीय गोरुरक्षक समूहले उनीहरूलाई रोक्ने प्रयास गरेको र सो क्रममा तस्करहरू भागेका थिए। तस्करहरूले भाग्ने क्रममा एक गाई र एउटा बाछो त्यहीँ छोडेर फरार भएको जनाइएको छ।

उक्त गाई र बाछोलाई पछि भारततर्फको बुढगाई प्रहरी चौकीमा लगेर बाँधिएको बताइए पनि स्थानीयहरूले जब प्रहरी चौकी पुगे, त्यहाँ ती जनावरहरू नभएको बताएका छन्। प्रहरीले सिफारिसका आधारमा जनावरहरू छोडिएको जानकारी दिएको स्थानीयको भनाइ छ।

भिष्वा प्रहरी चौकीका प्रमुखका अनुसार रातको समयमा पर्याप्त सुरक्षा बल नहुँदा तत्काल कार्यवाही गर्न नसकिएको र सीमाक्षेत्रमा थप अनुसन्धान तथा सुरक्षा व्यवस्थापनका लागि पहल भइरहेको बताइएको छ।

स्थानीयहरूले गाई तस्करीमा संलग्नहरूलाई पक्राउ गरी कानूनी कारबाही गर्न र सीमाक्षेत्रको सुरक्षा कडाइ गर्न माग गरेका छन्।

सेढवा । पर्सा जिल्लाका ग्रामीण भेगमा किसानहरूले वर्षे बाली धान भित्र्याउने कार्य तीव्र रूपमा थालेका छन्। पछिल्ला दिनमा मौसममा सुधार आएपछि सोना मन्सुली, मनी मन्सुली, कतरनी र हाईब्रिड जातका धानबाली कटानीको चहलपहल देखिएको छ।

किसानहरूले यस वर्ष धान कटानीमा आधुनिक कृषि उपकरणहरूको प्रयोग बढाएका छन्। अधिकांश किसानले हार्भेस्टर मेशिनको प्रयोग गरी खेतमै बाली काट्ने, दाइँ गर्ने र सिधै ट्याक्टरमा लोड गर्ने गरेका छन्। यस्तै, पशुपालन गर्ने वा पराल बिक्री गर्ने उद्देश्यले केही किसानले रिपर मेशिन प्रयोग गरेर बाली काट्ने र त्यसपछि थ्रेसर मेशिनमार्फत धान दाइँ गर्ने गरेका छन्।

तर, यस वर्षको उत्पादनमा भने उल्लेखनीय कमी आएको किसानहरूको भनाइ छ। जिराभवानी गाउँपालिका–२ का किसान महेश चौधरीका अनुसार, धान रोपाइँदेखि बाला निस्किने अवधिसम्म खडेरी परेको कारण उत्पादन १५ देखि ३० प्रतिशतले घटेको छ। “गत वर्ष साढे छ मन प्रति कट्ठाको दरले उत्पादन भएको थियो, तर यसपटक चार मन मात्र भयो,” चौधरीले बताए।

धानको उत्पादन घट्नुका साथै यसको मूल्य पनि घटेकाले किसान थप निराश बनेका छन्। जिराभवानी गाउँपालिका–४ सुपौलीका किसान रामराज दासका अनुसार, अहिले व्यापारीहरूले मनी मन्सुली धान प्रतिक्विन्टल २,६०० रुपैयाँ र सोना मन्सुली धान २,७०० रुपैयाँमा खरिद गर्दै आएका छन्। गत वर्ष यिनै धानको मूल्य क्रमशः ३,१०० र ३,२०० रुपैयाँ प्रतिक्विन्टल थियो।

धानको मूल्यमा आएको गिरावटका कारण किसानहरू आगामी गहुँबालीका लागि बीउ, मल, औषधि र सिँचाइ खर्च व्यवस्थापनमा समस्यामा पर्ने बताएका छन्। यद्यपि सरकारले यस वर्ष मोटो धानको समर्थन मूल्य प्रतिक्विन्टल ३,४०० रुपैयाँ र पातलो धानको ३,६०० रुपैयाँ तोकेको छ।