वीरगंज । नेपाली कांग्रेसका तर्फबाट पर्सा निर्वाचन क्षेत्र नं. ४ का प्रतिनिधिसभा सदस्य उम्मेदवार रमेश रिजालले जगरनाथपुर गाउँपालिका वडा नं. २ लम्मीपुरमा बिहीबार घरदैलो तथा जनता दर्शन कार्यक्रम सम्पन्न गरेका छन् । चुनावी अभियानलाई तीव्र बनाउँदै रिजाल मतदाताको घरदैलोमै पुगेर प्रत्यक्ष भेटघाट र संवादमा सहभागी भएका थिए ।

कार्यक्रमका क्रममा उम्मेदवार रिजालले स्थानीय बासिन्दासँग विकास निर्माणका योजना, पूर्वाधार विस्तार, शिक्षा, स्वास्थ्य तथा रोजगारीका विषयमा विस्तृत छलफल गरेका थिए । मतदातासँगको संवादमा उनले विगतमा सम्पन्न गरेका विकासे कामहरूको विवरण प्रस्तुत गर्दै अधुरा तथा बाँकी योजनाहरूलाई निर्वाचन जित्नासाथ प्राथमिकताका साथ अघि बढाउने प्रतिबद्धता व्यक्त गरे ।

स्थानीयले क्षेत्रको समग्र विकास, सडक स्तरोन्नति, सिंचाइ सुविधा, खानेपानी व्यवस्थापन तथा युवाका लागि रोजगारी सिर्जनामा विशेष ध्यान दिन आग्रह गरेका थिए । त्यसप्रति सकारात्मक प्रतिक्रिया जनाउँदै रिजालले जनताको सुझावलाई आफ्नो प्राथमिक कार्यसूचीमा समावेश गर्ने विश्वास दिलाए।

घरदैलो कार्यक्रममा क्षेत्रीय नेता, स्थानीय अगुवा, पार्टीका कार्यकर्ता तथा समर्थकहरूको उल्लेखनीय सहभागिता रहेको थियो। कार्यक्रममा देखिएको जनसहभागिताले कांग्रेसप्रति क्षेत्रको समर्थन मजबुत बन्दै गएको स्थानीय नेताहरूले बताएका छन्।

रिजाल यसअघि सोही क्षेत्रबाट निर्वाचित भइसकेका नेता हुन्। सालीन र असल व्यक्तित्वका रूपमा परिचित उनी पर्सामा प्रभावशाली नेताका रूपमा चिनिन्छन्। राष्ट्रिय राजनीतिमा समेत प्रभाव पार्न सक्ने नेताका रूपमा उनको पहिचान रहेको राजनीतिक वृत्तमा चर्चा हुने गरेको छ।

वीरगंज । पर्सा निर्वाचन क्षेत्र नम्बर–३ मा राष्ट्रिय स्वतन्त्र पार्टी (रास्वपा) का प्रतिनिधिसभा सदस्य पदका उम्मेदवार रामाकान्त चौरसियाको घरदैलो अभियान तीव्र बनेको छ । घरदैलो तथा भेटघाट कार्यक्रममार्फत मतदातासँग प्रत्यक्ष संवाद गर्दै आएका चौरसियाले विकास, सुशासन र पारदर्शितालाई मुख्य एजेण्डा बनाएका छन् ।

बुधबार पोखरिया नगरपालिकाका विभिन्न वडाहरूमा आयोजित घरदैलो कार्यक्रममा स्थानीयवासीको उत्साहजनक सहभागिता देखिएको छ । प्रत्येक टोलमा पुगेर चौरसियाले स्थानीय समस्या, पूर्वाधार विकास, शिक्षा, स्वास्थ्य तथा रोजगारीका विषयमा आफ्ना योजना प्रस्तुत गरेका छन् । उनले मतदातासँग रास्वपाको चुनाव चिह्न ‘घण्टी’मा मतदान गर्न आग्रह गरे ।

अभियानका क्रममा चौरसियाले विगतका राजनीतिक अभ्यासबाट निराश भएका नागरिकलाई वैकल्पिक शक्ति रोज्ने समय आएको उल्लेख गरे । रास्वपाको एजेण्डा नै स्थिरता र समृद्धिको आधार भएको दाबी गर्दै उनले भने, “जनताको प्रत्यक्ष सहभागितामै समृद्ध पर्सा निर्माण सम्भव छ ।”

स्थानीय युवाहरू, महिला समूह तथा ज्येष्ठ नागरिकसँग छलफल गर्दै उनले पर्सा–३ लाई विकासको नमुना क्षेत्र बनाउने प्रतिबद्धता व्यक्त गरे । उनका समर्थकहरूका अनुसार अभियानमा देखिएको बढ्दो सहभागिता र सकारात्मक प्रतिक्रिया चौरसियाप्रति बढ्दो विश्वासको संकेत हो ।

आगामी निर्वाचनमा ‘घण्टी’ छापमा मतदान गरी परिवर्तनको पक्षमा उभिन उनले सम्पूर्ण मतदातासँग अपिल गरेका छन् ।

वीरगंज । राष्ट्रिय स्वतन्त्र पार्टी (रास्वपा) का तर्फबाट पर्सा निर्वाचन क्षेत्र नम्बर–२ का प्रतिनिधिसभा सदस्य उम्मेदवार सुशील कुमार कानुले मंगलबार वीरगंज महानगरपालिका–६ माइस्थान तथा वडा नम्बर–९ घण्टाघर–पानमन्डी क्षेत्रमा घरदैलो अभियान सञ्चालन गरेका छन् ।

घरदैलोका क्रममा महानगरका विभिन्न टोलमा मतदातासँग प्रत्यक्ष भेटघाट गर्दै उनले औद्योगिक तथा व्यापारिक सहर वीरगञ्जलाई कुशासनमुक्त बनाई व्यवसायमैत्री वातावरण निर्माण गर्ने प्रतिबद्धता जनाए । उनले मतदातालाई रास्वपाको चुनाव चिह्न ‘घण्टी’मा मतदान गर्न आग्रह गरे ।

चार दशकदेखि चल्दै आएको राजनीतिक अभ्यासले जनताको जीवनस्तरमा अपेक्षित सुधार आउन नसकेको उल्लेख गर्दै कानुले समृद्ध नेपाल निर्माणका लागि नयाँ राजनीतिक संस्कार आवश्यक रहेको बताए । “पर्सा देशकै महत्त्वपूर्ण जिल्ला हो, तर यहाँबाट निर्वाचित सांसद र मन्त्रीहरूको बेवास्ताका कारण जिल्लाको विकास अपेक्षाकृत हुन सकेन,” उनले भने, “व्यापार–व्यवसाय, पूर्वाधार र सडकको अवस्था जीर्ण छ । अब प्राथमिकताका साथ सुधार गर्नुपर्छ ।”

निर्वाचित भएमा संघीय, प्रदेश र स्थानीय तहबीच प्रभावकारी समन्वय गरी योजनाबद्ध विकास अघि बढाइने उनको भनाइ थियो । उनले पर्साको औद्योगिक सम्भावनालाई मध्यनजर गर्दै ठूला विकास आयोजना अघि सार्ने दाबी समेत गरे ।