वीरगंज । नेकपा एमाले पर्सा निर्वाचन क्षेत्र नम्बर–२ की उम्मेदवार रिमा यादवले पर्सागढी नगरपालिका वडा नम्बर–६ अन्तर्गत चैनपुर, बागेश्वरी र तित्रौना टोलमा घरदैलो कार्यक्रम सम्पन्न गरेकी छन्।
घरदैलो अभियानका क्रममा स्थानीय मतदातासँग प्रत्यक्ष भेटघाट गर्दै यादवले शिक्षा, स्वास्थ्य, रोजगारी र सडक–पूर्वाधार सुधारलाई आफ्नो मुख्य प्राथमिकता रहेको बताइन्। “राजनीति सत्ता होइन, सेवा हो। जनताको समस्या बुझेर समाधान गर्ने प्रतिबद्धतासहित म चुनावी मैदानमा आएको हुँ,” उनले भनिन्।
कार्यक्रममा एमालेका क्षेत्रीय तथा जिल्ला तहका नेताहरू, युवा तथा महिला संघका प्रतिनिधि, स्थानीय बुद्धिजीवी तथा कार्यकर्ताहरूको उल्लेख्य सहभागिता रहेको थियो। सहभागी नेताहरूले रिमा यादवलाई जिताउन एकढिक्का भएर लाग्ने प्रतिबद्धता व्यक्त गरे।
घरदैलो टोलीले घरघर पुगेर मतदाताका गुनासा, सुझाव र अपेक्षा सुन्दै विकास निर्माणका कार्यक्रमलाई प्राथमिकतामा राख्ने आश्वासन दिएको जनाएको छ। स्थानीय बासिन्दाले विकासमुखी योजना कार्यान्वयन भए समर्थन गर्ने प्रतिक्रिया दिएका थिए।
अभियानपछि आयोजित संक्षिप्त कार्यक्रममा नेताहरूले पर्सा–२ मा एमालेप्रति जनसमर्थन बढ्दो रहेको दाबी गर्दै आगामी निर्वाचनमा सकारात्मक परिणाम आउने विश्वास व्यक्त गरे। एमाले पर्सा–२ का अनुसार यादवको घरदैलो कार्यक्रम अन्य वडा तथा टोलहरूमा पनि निरन्तर सञ्चालन हुनेछ।
