वीरगंज । राष्ट्रिय स्वतन्त्र पार्टी (रास्वपा) का पर्सा जिल्ला सभापति तथा प्रतिनिधिसभा सदस्य निर्वाचित हरि पन्तले मतदाताप्रति धन्यवाद व्यक्त गरेका छन्। प्रतिनिधिसभा निर्वाचनमा पर्साका चारै क्षेत्रबाट रास्वपाका उम्मेदवारहरू विजयी भएपछि उनले धन्यवाद तथा शुभकामना सन्देश जारी गर्दै मतदाता, शुभचिन्तक र पार्टी कार्यकर्ताप्रति हार्दिक आभार प्रकट गरेका हुन्।
पन्तले जिल्लाका चारै निर्वाचन क्षेत्रबाट रास्वपाका उम्मेदवारहरूको विजयलाई परिवर्तनको लहरको रूपमा व्याख्या गर्दै देशमा भ्रष्टाचार र कुशासन अन्त्य गर्ने प्रतिबद्धता व्यक्त गरेका छन्।
जारी सन्देशमा उनले भनेका छन्, “पर्सा निर्वाचन क्षेत्र नम्बर–१ को प्रतिनिधिसभा सदस्य पदमा मलाई सहित जिल्लाका चारै क्षेत्रबाट राष्ट्रिय स्वतन्त्र पार्टीका उम्मेदवारहरूलाई निर्वाचित गराउनु भएका सम्पूर्ण जिल्लावासी, मतदाता, शुभेच्छुक, पार्टीका नेता तथा कार्यकर्ता, साथीहरू र परिवारका सदस्यहरूप्रति हार्दिक आभार प्रकट गर्दछु।”
उनले मतदाताहरूको साथ, सहयोग र मार्गदर्शनले देशभर परिवर्तनको लहर आएको दाबी पनि गरेका छन्। “तपाईँहरूको साथ, सहयोग र मार्गदर्शनले आज हामीले देशैभर परिवर्तनको लहर ल्याउन सफल भएका छौँ,” पन्तले सन्देशमा उल्लेख गरेका छन्।
पन्तका अनुसार आगामी दिनहरूमा आफू सहित पर्साका चारै क्षेत्रबाट निर्वाचित प्रतिनिधिसभा सदस्यहरूले परिवर्तनलाई संस्थागत गर्दै भ्रष्टाचार, बेथिति र कुशासन अन्त्य गरी विधिको शासन स्थापना गर्ने जिम्मेवारी पूरा गर्नेछन्। देशलाई प्रगतिको बाटोमा लैजान सबैको निरन्तर सुझाव, सल्लाह, माया र आशीर्वाद आवश्यक रहने उनले बताएका छन्।
पर्सा जिल्लाका चारवटै निर्वाचन क्षेत्रमा रास्वपाका उम्मेदवारहरू विजयी भएका छन्। पर्सा–१ बाट हरि पन्त, पर्सा–२ बाट सुशील कुमार कानु, पर्सा–३ बाट रमाकान्त चौरसिया तथा पर्सा–४ बाट टेक बहादुर शाक्य ऐतिहासिक मतका साथ प्रतिनिधिसभा सदस्यमा निर्वाचित भएका छन्।
समानुपातिकतर्फ पनि पर्सामा रास्वपा पहिलो पार्टी बनेको छ। जिल्लामा रास्वपाले हासिल गरेको उल्लेखनीय सफलतालाई राजनीतिक विश्लेषकहरूले परिवर्तनको संकेतका रूपमा व्याख्या गरेका छन्। यस विजयले स्थानीय स्तरमा पार्टीको प्रभाव विस्तार भएको र राष्ट्रिय स्तरमा भ्रष्टाचारविरुद्धको अभियानलाई थप बल पुग्ने अपेक्षा गरिएको छ।
