वीरगंज । प्रतिनिधिसभा सदस्य निर्वाचन २०८२ अन्तर्गत पर्सा जिल्लामा ठूलो संख्यामा मत बदर भएको पाइएको छ। जिल्लाका चारवटै निर्वाचन क्षेत्रमा गरी १६ हजारभन्दा बढी मत बदर भएको विवरण सार्वजनिक भएको हो।
मुख्य निर्वाचन अधिकृतको कार्यालयका अनुसार पर्सा जिल्लामा प्रत्यक्षतर्फ खसेको कुल मतमध्ये ६ प्रतिशतभन्दा बढी मत बदर भएको छ।
चारवटै क्षेत्रमा गरी कुल २ लाख ५९ हजार २ सय ६४ मत खसेकोमा ६ दशमलव ३३ प्रतिशत अर्थात् १६ हजार ४ सय ३० मत बदर भएको मुख्य निर्वाचन अधिकृत गायत्री प्रसाद रेग्मीले जानकारी दिए।
क्षेत्रगत विवरण अनुसार पर्सा क्षेत्र नम्बर–१ मा ४ हजार ८१ मत बदर भएको छ भने क्षेत्र नम्बर–२ मा ४ हजार ५ सय मत बदर भएको छ। यसैगरी क्षेत्र नम्बर–३ मा ४ हजार ७ सय ३० र क्षेत्र नम्बर–४ मा ३ हजार १ सय १९ मत बदर भएको मुख्य निर्वाचन अधिकृतको कार्यालयले जनाएको छ।
निर्वाचनमा पर्सा क्षेत्र नम्बर–१ मा ६१ हजार ३०६, क्षेत्र नम्बर–२ मा ६५ हजार ८७८, क्षेत्र नम्बर–३ मा ६७ हजार ११३ र क्षेत्र नम्बर–४ मा ६४ हजार ९६७ मत खसेको थियो।
निर्वाचनबारे पर्याप्त प्रचारप्रसार तथा मतदातामाझ आवश्यक जनचेतना अभाव भएका कारण यसपटक मतपत्र बढी बदर भएको हुन सक्ने मुख्य निर्वाचन अधिकृतको कार्यालयले जनाएको छ।
