वीरगंज । पूर्व मुख्यमन्त्री मो. लालबाबु राउत गद्दी बस्ने वडामै जनता समाजवादी पार्टी (जसपा) नेपालले अत्यन्त न्यून मत प्राप्त गरेको तथ्य सार्वजनिक भएको छ । प्रतिनिधि सभा निर्वाचन २०८२ मा पर्सा क्षेत्र नं. १ र २ सहित सबै निर्वाचन क्षेत्र जित्ने दाबी गर्दै आएका गद्दी बस्ने वीरगंज महानगरपालिका वडा नं. १३ तेजारथ टोल मुर्लीमा जसपा नेपालको चुनाव चिन्ह ‘छाता’ले जम्मा ३९ मत मात्रै प्राप्त गरेको हो।
आफूलाई पार्टीका वरिष्ठ नेता बताउँदै आएका गद्दीको आफ्नै वडामा यस्तो नतिजा आएपछि पार्टीभित्रैका नेताहरू समेत आश्चर्यचकित बनेका छन् । गद्दीसँगै पर्सा निर्वाचन क्षेत्र नं. १ बाट उम्मेदवार बनेका जसपा नेपाल पर्सा जिल्ला अध्यक्ष रामनरेश यादवको समेत जमानत जफत भएपछि दुबै नेताको जनाधार कति रहेको भन्ने विषय थप स्पष्ट भएको चर्चा भइरहेको छ।
यता, जसपा नेपाल पर्साका अध्यक्षसमेत रहेका उम्मेदवार यादव बस्ने वीरगंज महानगरपालिका वडा नं. २८ मा पनि ‘छाता’ले जम्मा २५ मत मात्रै प्राप्त गरेको बताइएको छ।
पार्टीभित्रका केही नेताहरूका अनुसार मधेश प्रदेशका विवादित पूर्व मुख्यमन्त्री गद्दीमाथि लागेको भ्रष्टाचार आरोप तथा जिल्ला अध्यक्ष यादवको नेतृत्व शैलीका कारण पर्सामा जसपा नेपालको संगठन कमजोर बन्दै गएको हो । एक समय पर्सामा पहिलो शक्ति मानिने जसपा नेपालको संगठन अहिले कमजोर अवस्थामा पुगेको उनीहरूको भनाइ छ ।
देशभर राष्ट्रिय स्वतन्त्र पार्टी (रास्वपा)को प्रभाव बढिरहेका बेला आफूलाई मधेशको ‘मसीहा’ भन्दै आएका उपेन्द्र यादव नेतृत्वको जसपा नेपाल पनि कमजोर बन्दै गएको चर्चा राजनीतिक वृत्तमा भइरहेको छ।
पर्सालाई जसपा नेपालको बलियो गढ मानिँदै आए पनि अध्यक्ष यादव र पूर्व मुख्यमन्त्री गद्दीको नेतृत्वका कारण पार्टी संगठन कमजोर भएको आरोप पार्टीभित्रै उठिरहेको बताइएको छ।
यस निर्वाचनले गद्दी र यादवको वास्तविक जनाधार कस्तो रहेको छ भन्ने कुरा स्पष्ट पारेको भन्दै पर्साको राजनीतिक वृत्तमा चर्चा भइरहेको छ। उनीहरूकै कारण पर्सामा पार्टी कमजोर भएको भन्दै पार्टीभित्र आरोप–प्रत्यारोप पनि बढेको छ।
