वीरगंज । फागुन २१ गते सम्पन्न प्रतिनिधिसभा सदस्य निर्वाचनमा पर्सा निर्वाचन क्षेत्र नम्बर–२ मा प्रतिस्पर्धा गरेका अधिकांश उम्मेदवारको जमानत जफत भएको छ। सार्वजनिक मतपरिणाम अनुसार कुल ३१ जना उम्मेदवार चुनावी प्रतिस्पर्धामा रहे पनि केवल तीन जनाले मात्र आफ्नो जमानत जोगाउन सफल भएका छन्।
निर्वाचनमा राष्ट्रिय स्वतन्त्र पार्टी (रास्वपा) का उम्मेदवार सुशील कुमार कानु ३० हजार ४७० मत प्राप्त गर्दै विजयी भएका छन्। त्यस्तै नेपाली काँग्रेसका उम्मेदवार एवं पूर्व मन्त्री अजयकुमार चौरसियाले १९ हजार ८१० मत प्राप्त गरेका छन् भने नेकपा (एमाले) की उम्मेदवार रीमा कुमारी यादवले ११ हजार ६०५ मत ल्याएर आफ्नो जमानत जोगाएका छन्।
निर्वाचनमा बाँकी २८ जना उम्मेदवारले आवश्यक मत प्राप्त गर्न नसक्दा उनीहरूको जमानत जफत भएको छ। जमानत जफत हुनेमध्ये जनता समाजवादी पार्टी (जसपा) नेपालका उम्मेदवार अशोक कुमार टेमानीले २ हजार ६४२ मत मात्र प्राप्त गरेका छन्। टेमानी वीरगंज उद्योग वाणिज्य संघका पूर्व अध्यक्ष तथा नेपाल उद्योग वाणिज्य महासंघका वर्तमान अध्यक्ष समेत हुन्।
यस्तै राष्ट्रिय प्रजातन्त्र पार्टी (राप्रपा) की उम्मेदवार बिना जयसवालले १ हजार ९९९ मत प्राप्त गरेकी छन्। जयसवाल यसअघि राप्रपाबाट समानुपातिक सांसद रहिसकेकी छन्।
त्यस्तै नेकपाका उम्मेदवार मनोज कुमार चौधरीले ९२३ मत प्राप्त गरेका छन्। चौधरीको सवार गाडीबाट निर्वाचनको पूर्वसन्ध्यामा शंकास्पद वस्तु फेला परेपछि प्रहरीले उनलाई नियन्त्रणमा लिएको थियो। उनी हाल पनि प्रहरी हिरासतमा रहेका छन्।
अन्य उम्मेदवारहरूमा प्रगतिशील लोकतान्त्रिक पार्टीका अमिताभ बच्चन दास तत्माले ३३०, जनमत पार्टीका श्याम प्रसाद गुप्ताले २२८, आम जनता पार्टीकी रन्जु कुमारी साहले २०३, नेपाल जनता पार्टीका सन्तोष कुमार पटेलले १८७ तथा उज्यालो नेपाल पार्टीका कृष्णा मुरारी प्रजापतिले १४८ मत प्राप्त गरेका छन्।
त्यस्तै स्वतन्त्र उम्मेदवार लक्ष्मी नारायण गुप्ताले १००, श्रम संस्कृति पार्टीका पुन्देश्वर प्रसाद यादवले ८३, स्वतन्त्र उम्मेदवार शिव बचन ठाकुर लोहारले ६३, जन अधिकार पार्टीका देव शंकर यादवले ३०, जय मातृभूमि पार्टीका वीरेन्द्र प्रसादले २१, स्वतन्त्र उम्मेदवार उमेश प्रसाद सह तेलीले १७ र रवीन्द्र कुमार चौधरीले १६ मत प्राप्त गरेका छन्।
नेपाल लोकतान्त्रिक पार्टीका विकास कुमार साहले २२ मत प्राप्त गरेका छन् भने स्वतन्त्र उम्मेदवार सन्तोष महतोले १२, राकेश कुमार सहनीले १०, किशोरी प्रसाद यादवले ९ र मनोज साह कानुले ७ मत ल्याएका छन्।
त्यस्तै नेपाल मजदुर किसान पार्टीका उम्मेदवार उमेश कुशवाहले ५ मत प्राप्त गरेका छन्। स्वतन्त्र उम्मेदवार कृष्णा कुमार गिरी, महेश महतो धानुकले ५/५ मत, किसमती देवी र साहेब प्रसाद रामले ३/३ मत, रामनरेश प्रसाद चौरसियाले २ तथा रोशन प्रसाद अहिरले १ मत प्राप्त गरेका छन्।
निर्वाचन आयोगका अनुसार कुल सदर मतको १० प्रतिशतभन्दा कम मत प्राप्त गर्ने उम्मेदवारहरूको जमानत फिर्ता नहुने प्रावधान छ। सोही प्रावधानअनुसार पर्सा क्षेत्र नम्बर–२ मा २८ जना उम्मेदवारको जमानत जफत भएको हो। जमानत जफत भएसँगै उम्मेदवारी मनोनयन दर्ताका क्रममा राखिएको धरौटी रकम उनीहरूले फिर्ता पाउने छैनन्।
