बलिउड अभिनेत्री शिल्पा शेट्टी कुन्द्राले दायर गरेको व्यक्तित्व अधिकार सम्बन्धी मुद्दामा बम्बई उच्च अदालतले उनको पक्षमा निर्णय सुनाएको छ।
अदालतले अभिनेत्रीको अनुमतिबिना उनको नाम, स्वर, तस्बिर वा व्यक्तित्व प्रयोग गरी बनाइएका सामाग्रीहरू हटाउन आदेश दिएको हो।
अभिनेत्री शेट्टीले विभिन्न वेबसाइट, सामाजिक सञ्जाल र एआई प्लेटफर्महरूले आफ्नो तस्बिर र पहिचान दुरूपयोग गर्दै एआईद्वारा बनाइएका मोर्फ गरिएका तस्बिर, भिडिओ र अन्य सामग्री सार्वजनिक गरेको भन्दै अदालतमा निवेदन दिएकी थिइन्।
सुनुवाइका क्रममा अदालतले ती सामग्रीहरूलाई ‘अत्यन्त आपत्तिजनक र अस्वीकार्य’ भन्दै तुरून्तै हटाउन निर्देशन दिएको भारतीय संचारमाध्यमले जनाएका छन्।
शिल्पाकी वकिल सना रईस खानका अनुसार बिना अनुमति कुनै व्यक्तिको नाम, छवि वा प्रतिष्ठा प्रयोग गरी व्यावसायिक फाइदा लिनु उनको प्रतिष्ठा र अधिकारमाथि आक्रमण हुने भएकाले कानुनी कारबाही गरिएको हो।
यसअघि पनि केही बलिउडकर्मीले व्यक्तित्व अधिकार सम्बन्धी मुद्दामा राहत पाएका छन्। त्यसमा काजोल, ऐश्वर्या राय बच्चन, शत्रुघ्न सिन्हा, अभिषेक बच्चन, सलमान खान लगायतका नामहरू समावेश छन्।
शिल्पाले नोभेम्बर २०२५ मा आफ्नो व्यक्तित्व अधिकारको सुरक्षाको लागि बम्बई उच्च अदालतमा निवेदन दिएकी थिइन्।
