वीरगंज । पर्सा प्रहरीले ट्याक्टरमा ठूलो परिमाणमा लागुऔषध गाँजा बरामद गरेको छ। परालले छोपेर लैजाँदै गरेको अवस्थामा प्रहरीले पर्साको जिराभवानी गाउँपालिकाबाट २ सय किलोभन्दा बढी गाँजा बरामद गरेको हो।
विशेष सूचनाको आधारमा गरिएको जाँचका क्रममा जिराभवानी गाउँपालिका वडा नम्बर–४ बाट २ सय १३ किलो लागुऔषध गाँजा बरामद गरिएको इलाका प्रहरी कार्यालय पटेर्वासुगौलीका प्रहरी निरीक्षक समुन्नत अधिकारीले जानकारी दिए।
उनका अनुसार ठूलो परिमाणमा गाँजाको तस्करी भइरहेको भन्ने सूचना प्राप्त भएपछि प्रहरीले सरप्राइज चेकिङ गरेको थियो। सोही क्रममा परालले छोपेर लैजाँदै गरिएको गाँजा बरामद गरिएको हो।
प्रहरीले लागुऔषध गाँजासहित मे १ त ५७१४ नम्बरको ट्र्याक्टर पनि नियन्त्रणमा लिएको जनाएको छ।
प्रहरी देख्नासाथ ट्याक्टर चालक भने सवारी साधन छाडेर फरार भएको बताइएको छ। बरामद गरिएको गाँजा र ट्र्याक्टर आवश्यक कारबाहीका लागि जिल्ला प्रहरी कार्यालय पर्सामा बुझाइएको छ।
ट्र्याक्टरको कागजातको आधारमा लागुऔषध कारोबारीको खोजी कार्य भइरहेको पर्सा प्रहरीले जनाएको छ।
