वीरगंज । वीरगंजस्थित भारतीय महावाणिज्य दूतावासले दूतावास परिसरभित्र एक भव्य समारोहको आयोजना गर्दै अन्तर्राष्ट्रिय महिला दिवस २०२६ मनाएको छ। यस वर्षको अन्तर्राष्ट्रिय महिला दिवसको नारा “गिभ टु गेन” रहेको थियो, जसले महिला सशक्तीकरण तथा समाजमा महिलाहरूको योगदानको महत्वलाई उजागर गर्ने उद्देश्य राखेको थियो।
कार्यक्रममा सामाजिक अभियन्ता, शिक्षाविद् तथा विभिन्न क्षेत्रका विशिष्ट व्यक्तित्वहरूको सहभागिता रहेको थियो । सहभागीहरूले नेपाल र भारतका महिलाहरूले विभिन्न क्षेत्रमा हासिल गरेका उपलब्धि तथा उनीहरूले सामना गरिरहेका चुनौतीबारे आफ्ना अनुभव र विचार साझा गरेका थिए।
सो अवसरमा वीरगंजस्थित चान्दनी एकेडेमी र रक्सौलको शारदा कला केन्द्रका विद्यार्थीहरूले नेपाल र भारतको समृद्ध सांस्कृतिक परम्परा झल्किने आकर्षक सांस्कृतिक प्रस्तुति दिएका थिए, जसले कार्यक्रममा थप रौनक थपेको थियो।
कार्यक्रमलाई सम्बोधन गर्दै महावाणिज्यदूत देवी सहाय मीनाले अन्तर्राष्ट्रिय महिला दिवसको महत्वबारे प्रकाश पार्दै महिलाहरूले दैनिक जीवन तथा राष्ट्रको विकासमा पुर्याएको महत्वपूर्ण योगदानको प्रशंसा गर्नुभयो । उहाँले महिला सशक्तीकरणले दिगो समृद्धि ल्याउने र समग्र समाजमा सकारात्मक प्रभाव पार्ने विश्वास व्यक्त गर्नुभयो।
दूतावासका अनुसार कार्यक्रमको मुख्य उद्देश्य लैङ्गिक समानताको प्रवर्द्धन, महिलाहरूका उपलब्धिहरूको सम्मान तथा अझ समावेशी र समानतामूलक समाज निर्माणका लागि सामूहिक पहललाई प्रोत्साहित गर्नु रहेको थियो।
