वीरगंज, २५ पुस ।
पर्सा प्रहरीले लागु औषध सहित २ जनालाई पक्राउ गरेको छ । जिल्ला प्रहरी कार्यालय पर्साले लागु औषध नाईट्राभेट ट्याबलेट सहित एक जनालाई र सशस्त्र प्रहरी बल नेपाल गुल्म, पर्साले लागु औषध ईन्जेक्सन सहित एक जनालाई पक्राउ गरेको हो ।

जिल्ला प्रहरी कार्यालय, पर्साबाट खटेको प्रहरी टोलीले वीरगंज महानगरपालिकाको वडा नं. ८, स्थित सडक खण्डबाट वीरगंज ११, बस्ने बर्ष २८ का ईजाहिर हवारीलाई लागु औषध नाईट्राभेट सहित पक्राउ गरेको प्रहरीले जनाएको छ । मंगलबार सांझ ६ः३० बजेको करिबमा भारतको रक्सौलबाट वीरगंज तर्फ साईकलमा चलाई आउदै गरेको हवारीको साथबाट लागु औषध नाईट्राभेट ट्याबलेट ७४७ पिस फेला परेकोले नियन्त्रणमा लिई लागु औषध मुद्दा दर्ता गरी अनुसन्धान भइरहेको जिल्ला प्रहरी कार्यालय, पर्साले जनाएको छ ।

यस्तै सशस्त्र प्रहरी बल गुल्म र प्रहरी चौकी ईनर्वा पर्साबाट खटिएको संयुक्त प्रहरी टोलीले वीरगंज १६, भन्सार मुलगेटबाट मोरङ बेलवारी न.पा. वडा नं. ४, बस्ने बर्ष २५ को बिष्णु श्रेष्ठलाई पक्राउ गरेको छ । मंगलबार साझ ५ः५० बजे रक्सौलबाट वीरगंज तर्फ पैदल हिडी आउदै गरेको श्रेष्ठको साथबाट लागु औषध इन्जेक्सन डाईजिल्याव ११ पिस, फेनारगन १० पिस र नुर्फिन ८ पिस फेला परेकोले नियन्त्रणमा लिई लागु औषध शिर्षकमा मुद्दा दर्ता गरी अनुसन्धान भइरहेको प्रहरी कार्यालयले जनाएको छ ।

पर्सा, २५ पुस ।
जिराभवनी गाउँपालिकाले बुधबार एक कार्यक्रमका बिच एक सय ७ जना छात्राहरुलाई साईकल वितरण गरेको छ । जिराभवनी गाउँपालिकाको वडा नं. ३ मा रहेको बितो महतो जनता मा.वि. नवकाटोलाका कक्षा ९ र १० का एक सय ७ जना छात्राहरुलाई निःशुल्क साईकल वितरण गरिएको प्रमुख प्रशासकिय अधिकृत अमिति कुमार गिरीले वताए ।

गाउँपालिकाको आ.व. २०७५/०७६ को बेटी पढाई बेटी बचाई कार्यक्रम अन्तर्गत छात्राहरुको अध्ययन गर्न विद्यालय जान आउन सजिलो हुनको लागि साईकल वितरण गरिएको अधिकृत गिरीले जानकारी गराए । वडाध्यक्ष उमेश सिंहको अध्यक्षतामा र गाउँपालिका अध्यक्ष रामपृत महतोको प्रमुख आतिथ्यतामा भएको साईकल वितरण कार्यक्रममा गाउँपालिकाकी उपाध्यक्ष उषा देवी थरुइन, प्रमुख प्रशासकिय अधिकृत गिरी, विद्यालयका प्रअ लगायतकाको सहभागिता रहेको थियो ।

कार्यक्रमका अध्यक्ष, प्रमुख अतिथी, विशिष्ट अतिथी र अतिथीहरुको हातबाट साइकल वितरण गरिएको थियो । गाउँपालिका अन्तर्गतका कक्षा ९ र १० मा अध्ययनरत २ सय २६ जनालाई साईकल वितरण गरिने गाउँपालिका अध्यक्ष महतोले वताए । कार्यक्रममा वोल्दै गाउँपालिका अध्यक्ष महतोले त्यस पछि पनि वाकी रहेका छात्राहरुलाई पनि अगामी दिनमा साईकल वितरण गरिने घोषणा समेत गरे ।

यस्तै कक्षा ११ का ७० जना छात्राहरुलाई साईकल वितरण गर्न निर्णय समेत भइसकेको अध्यक्ष महतोले जानकारी गराए । गत आ.व. २०७४/०७५ मा पनि गाउँपालिकाले कक्षा ८ मा अध्ययनरत २ सय १६ जनालाई साईकल वितरण गरेको थियो ।

पर्सा, २४ पुस ।
नारायाणी सिचाई डिभिजन नम्बर ५ को लापरवाहीका कारण नहरमा पानी नआउदा कृषकहरु मर्कामा परेका छन । प्रत्येक बर्ष पौष महिनाको १ गते नै नहरमा पानी छोडने गथ्र्याे तर यस बर्ष पुस महिनाको अन्तिम हप्ता भईसक्दा पनि हाल सम्म नहरमा पानी नआउदा कृषकहरु चिन्तीत बनेका छन ।

नहरमा पानी नआउदा गेहु बाली कम हुने संम्भावना बढेको कृषकहरु बताएका छन । गेहु वाली छरेको १ महिना भित्र नै सिचाई गर्नाले बाली राम्रो हुने गर्छ । नदी, खोला, पोखरी र बोरिंग भएको ठाउँमा मात्र सिचाई भईरहेको छ । पर्साको केही गाउँपालिकाले सिचाईका लागी बोरिंग गाडन बजेट बिनियोजन गरेका छन भने अधिकांशले बजेट नछुटयाउदा सिचाईका लागी समस्या हुदै आएको कालिकामाई गाउँपालिका वडा नम्बर २ गदियानीका बिक्रम महरा चमारले बताए ।

बिगत केही दिन अगाडी जलउपभोग्ता समिती सक्रिय भए पनि अहिलेको अवस्थामा निस्कृय रहेकोले नहरमा पानी नआएको कृषकहरुले बताएका छन । यता जलउपभोग्ता समितीका एक सदस्यले सम्मपुर्ण रेखदेख र निर्देशन अब गाउँपालिकाले गर्ने भएका कारण आफुहरु सक्रिय नरहेको बताएका छन ।

नहरमा पानी नआउदा कालिकामाई गाउँपालिकाको वडा नम्बर १ मुडली, रबिदास, टिनडोबिया, वडा नम्बर ३ का हरिहरपुर बिर्ता, वडा नम्बर २ को भेडिहारी, गदियानी, वडा नम्बर ४ को प्रशुरामपुर, कटीबलुवा र पकहा मैनपुर गाउँपालिकाको वडा नम्बर ५ सबैठवा र वडा नम्बर ४ लहावरथकरीका अधिकांश ककृषकहरु सिचाई गर्न नपाएर मारमा परेका छन ।

वीरगंज, २३ पुस ।
लागु औषध ईन्जेक्सन सहित एक जना पक्राउ परेका छन । पक्राउ पर्नेमा धादिङ गुजरी गा.पा. वडा नं. ३, बस्ने बर्ष २४ का सुर्य तामाङ रहेका छन । वडा प्रहरी कार्यालय विर्ता र प्रहरी चौकी ईनर्वा, पर्साबाट खटिएको संयुक्त प्रहरी टोलीले वीरगंज १६, रजतजयन्ति चौकबाट तामाङलाई पक्राउ गरेको प्रहरीले जनाएको छ ।

विभिन्न सवारी साधान तथा पैदल यात्री समेतको चेकजाँच गर्ने क्रममा आइतबार साझ ५ ३० बजे भारतको रक्सौलबाट बीरगंज तर्फ पैदड हिडी आउदै गरेको तामाङलाई लागु औषध ईन्जेक्सन सहित पक्राउ गरिएको जिल्ला प्रहरी कार्यालय, पर्साले जनाएको छ । निजको साथबाट लागु औषध ईन्जेक्सन फेनारगन २० पिस, नुर्फिन २० पिस र डाईजिल्याव २० पिस फेला परेको कार्यालयले जनाएको छ ।

पर्सा, २३ पुस ।
पर्साको जिराभवानी र ठोरी गाउँपालिकामा सुर्ती खेती गर्ने कृषहरुको संख्यामा वृद्धि भएको छ । केही बर्ष अगाडी गाँजा खेती हुदै आएका खेतहरुमा सुर्ती खेती किसानहरु गर्न थालेका छन । गाँजा खेती नियन्त्रण भए पछि सुर्ती खेती गर्न थालिएको ठोरी गाउँपालिकाको वडा नं. ४, निर्मलबस्तीका कृषक बिर बहादुर तमांगले वताए ।

सुर्ती खेतीबाट नै बार्षिक लाखौं आम्दनी गरिएको उनले वताए । तमांगले गत बर्ष आफुले एक विगहा जतिमा सुर्ती खेती गरेको र सोबाट बार्षिक डेढ लाख भन्दा बढी आम्दनी गरेको वताए । उनले आफु जस्तै धेरैले सुर्ती खेती गरेको वताए । बर्षमा सुर्ति खेती सहित ३ बाली कृषकहरुले लगाउने गरेका छन ।

खाजां खेतीको नियन्त्रण पछि नगदे बालीको रुपमा सुर्ती खेती तर्फ कृषकहरु आक्रषित भएका छन । कम खर्च र परिश्रमबाट राम्रो आम्दनी हुन थाले पछि सुर्ती खेती तर्फ कृषकहरुको आक्रषण बढेको हो । लगानीको ८० देखी ९० प्रतिशत आम्दनी हुने गरेको कृषकहरु बताउँछन ।

यसका साथै सुर्ती खेती अन्य खेतीको तुलनाममा जङ्गली जनावरबाट पनि सुरक्षित हुने गर्छ । निकुञ्जबाट आउने जङ्गली जनावरहरु धान, गहुँ, मकै, राजमा, तोरी लगायत बाली नष्ट गर्ने गरे पनि सुर्ती खेती भने नष्ट नगरेको कृषकहरुले वताएका छन ।