[real3dflipbook id=”85″]
भिस्वा निवासी झोटी एक हप्तादेखी सम्पर्क बिहिन
भिस्वा । पर्साको छिपहरमाई गाउँपालिका वडा नं. ५ भिस्वा निवासी एक बृद्ध एक हप्तादेखी सम्पर्क बिहिन भएका छन् । भिस्वा निवासी ७२ बर्षीय झोटी महतो कोईरी बैशाख ५ गतेदेखी घरपरिवारबाट सम्पर्क बिहिन भएका हुन ।
बैशाख ५ गते आईतबार दिउसो घर बाहिर निस्केका झोटी एक हप्तासम्म घर नफर्केपछि उनका परिवार चिन्तित भएका छन् । झोटी आईतबार साझसम्म घरमा नफर्किपछि उनका परिवारले आफन्त जन कहाँ पता लगाउँदा समेत त्यहाँ पनि उनी नभएका कारण चिन्तित भएका हुन ।
उनका छोरा दिनेश कुशवाहाले बुवा बहिनीको घरमा गएको हुन सक्ने अनुमानमा हामीले यत्रो दिनसम्म खोजीकार्य नगरेको बताए । उनले एक हप्तासम्म पनि बुवा घर नफर्किएपछि उनको खोजी कार्यमा लागेको बताए ।
पत्रकार महासंघ पर्साको पहिलो बैठक सम्पन्न
वीरगंज । नेपाल पत्रकार महासंघ पर्सा शाखाको नव निर्वाचित कार्यसमितिको पहिलो बैठक समपन्न भएको छ । महासंघ पर्साको भवनमा बसेको बैठकले नेपाल पत्रकार महासंघ पर्सा शाखाको निर्वाचन शान्तिपुर्ण रुपमा समपन्न गराएकोमा निर्वाचन समिति तथा महासंघ सदस्यहरुमा धन्यवाद ज्ञापन गरेको छ ।
महासंघ पर्साका अध्यक्ष अनुप तिवारीको अध्यक्षतामा बसेको बैठकले नव निर्वाचित शाखाको खाता सञ्चालनका लागी अध्यक्ष, सचिव र अनिवार्य कोषाध्यक्षको हस्ताक्षर रहने गरी खाता सञ्चालनमा ल्याउने निर्णय गरेको छ ।
यसका साथै बैठकले दोस्रो चरणको कोरोना महामारीमा संक्रमित हुने सञ्चारकर्मीको उपचार तथा कोभिडका कारण हुने विभिन्न समस्यालाई ध्यानमा राखि राहत, उद्धार तथा सहयोगका लागि महासंघका कोषाध्यष संजिव मिश्राको संयोजकत्वमा ५ सदस्यि नेपाल पत्रकार महासंघ कोभिड एक्सन टिम गठन गरेको कार्यसमिति सदस्य नरेश सर्राफले बताए ।
समितिको सदस्याहरु शाखाका सदस्य तिवारी यादव, श्याम कुशवाहा, कविता खड्का र अजय चौरसिया रहेका छन् । बैठकले कोरोना संक्रमण बढ्दै गएको र आवश्यक उपचार तथा परिक्षणको अभाव देखिएका कारण सो प्रति जिम्मेवार बन्न स्थानीय सरकार र स्थानिय प्रशासन लगायतका सरोकारवालालाई यथाशिघ्र यसको उचित व्यवस्थापन तर्फ जिम्मेवार हुन आग्रह गरेको छ ।
औलो दिवसमा पत्रकारसंग अन्तरक्रिया
वीरगंज । स्वास्थ्य कार्यालय पर्साले विश्व औलो दिवसको अवसरमा आईतबार पत्रकारसंग अन्तरक्रिया गरको छ ।
अन्तरक्रिया कार्यक्रममा बोल्दै स्वास्थ्य कार्यालय पर्साका प्रमुख कामेश्वर चौरसियाले नेपाललाई सन् २०२५ सम्म औलो रोग शुन्यमा पु¥याउने लक्ष्य रहेको बताए । उनले सबै सरकारी स्वास्थ्य संस्थाहरुमा औलोको जाँच तथा उपचार निःशुल्क प्राप्त गर्न सकिने बताए ।
औलोको औषधी सेवन गरेको केही दिनमै औलो बिरामीले निको भएको महशुस गर्न थाल्दछ बताउँदै बिरामीको शरीरभित्र भएको औलोको प्रजिवी पूर्ण रुपमा नष्ट गराउन स्वास्थ्यकर्मीको सल्लाह अनुसार नियमित रुपमा सबै औषधी सेवन गरे मात्र यो रोग पूर्ण रुपमा निको हुने बताए ।
प्रमुख चौरसियाले अहिले दोस्रो चरणको कोरोना महामारीको समय भएकोले जनस्वास्थ्यको मापदण्ड पाल्ना गर्नु पर्ने बताए । उनले जनस्वास्थ्यको मापदण्ड मात्रै पाल्ना गरिदिए भने धेरै हदसम्म कोरोना संक्रमणबाट बाँच्न सकिने बताए ।
स्वाथ्य निरिक्षक जयमोद ठाकुरले औलोको टेस्ट सबै सरकारी स्वास्थ्य संस्थाहरुमा निःशुल्क हुने गरेको बताए । उनले औलो सम्बन्धी एक प्रस्तुती राख्दै औलोबाट बच्न सुत्ने बेलामा सधै झुलभित्र सुत्ने, लामखुट्टेको टोकाईबाट बच्न हात खुट्टा छोपिने गरि पुरा बाहुला भएको लुगा लगाउन, शरीरको खुल्ला भागमा लामखुट्टा भगाउने मलम लगाएर लामखुट्टको टोकाईबाट बच्न सकिने, घरभित्र, बाहिर, आङ्गनमा बस्दा लामखुट्टे भगाउन धुप प्रयोग गर्न लगायतका सवधानी अपनाउनु पर्नेु बताए ।
उनले औलेको मुख्य लक्ष्णहरु दिन बिराएर वा दिनहु ज्वरो आउनु, काम ज्वरो आउनु, पसिना आउनु, टाउको बेसरी दुख्नु र वाकवाकी वा बान्ता हुनु रहेको बताए । प्रमुख चौरसियाको अध्यक्षतामा भएको कार्यक्रममा पत्रकार महासंघ पर्साका अध्यक्ष अनुप तिवारी, सचिव भुषण यादव, स्वास्थ्य कार्यालय पर्साका अनिल कुमार सिंह, मोहनलाल साह लगायत संचारकर्मीहरुको उपस्थिति रहेको थियो ।
कार्यक्रम स्वास्थ्य कार्यालय पसाको तालिम हलमा भएको थियो ।
प्याब्सन पर्साद्वारा एसईईको टेस्ट परिक्षा पनि स्थगित
वीरगंज । निजी तथा आवासीय विद्यालय संगठन (प्याब्सन) पर्साले माध्यमिक शिक्षा परीक्षा (एसईई) को अभ्यास (टेस्ट) परिक्षा स्थगित गरेको छ । जिल्लामा बढ्दो कोरोनाभाइरस सङ्क्रमणको दरलाई ध्यानमा राखेर बालबालिकाहरुको स्वास्थ्यमा प्रतिकुल असर पर्न नदिन एसईई टेस्ट परिक्षा स्थगित गरिएको प्याब्सन पर्साले जनाएको छ ।
प्याब्सन वीरगंज अध्यायका अध्यक्ष आलोककुमार चौरसियाले अर्को सूचना जारी नभएसम्मका लागि लिन बाकी रहेका विषयहरुको परिक्षा स्थगित गरिएको जानकारी दिए । प्याब्सन आबद्ध विद्यालयहरुको आकस्मिक बैठकले बाकी रहेका विषयहरुको परिक्षा अर्को सूचना जारी नभएसम्मका लागी एसईई टेस्ट परिक्षा स्थगित गरेको चौरसियाले बताए । चौरसियाले सबै अभिभावकलाई बालबालिकालाई कोरोनाभाइरस सङ्क्रमणबाट जोगिन सुरक्षित तरिकाले स्वास्थ्य सुरक्षा मापदण्डको पालना गर्दै घर भित्र राख्न आग्रहसमेत गरेका छन् ।
पर्सामा चैतको अन्तिम सातादेखि कोरोनाभाइरस सङ्क्रमितहरुको सङ्ख्या बढ्न थालेपछि अभिभावकले विद्यालय बन्द गर्नदेखि परिक्षासमेत स्थगित गर्न माग गर्दै आएका थिए । सोही माग अनुसार परिक्षा स्थगित गरिएको चौरसियाले बताए । पर्साको वीरगंज महानगरपालिकाले यसअघिनै कक्षा ९ सम्मको सबै परिक्षा स्थगित गरेको छ ।
महानगरपालिकाको शैक्षिक विकास महाशाखाले आइतबार एउटा सूचना जारी गर्दै नगरका सम्पूर्ण सामुदायिक र संस्थागत (निजि) विद्यालयहरुलाई कक्षा ९ सम्मको परिक्षा अर्को सूचना जारी नभएसम्म स्थगित गर्न निर्देशन दिएको थियो । महानगरपालिकाले सञ्चालन गर्ने कक्षा ८ को परिक्षा पनि स्थगित गर्न निर्णय भएको नगरप्रमुख विजयकुमार सरावगीले जानकारी दिए । जिल्लाका अन्य स्थानीय तहहरुले भने परिक्षाको सम्बन्धमा कुनै निर्णय गर्न सकेका छैनन् ।
वीरगंजमा १४० जनाको कोरोना परिक्षण गर्दा ९९ जना पोजिटिभ
वीरगंज । पर्सामा आइतबार पुनः ८६ जना कोरोना संक्रमित थपिएका छन् । नारायणी अस्पतालको ल्याबमा गरिएको पिसिआर परीक्षणको क्रममा पर्सामा मात्रै ८६ जनामा संक्रमण पुष्टि भएको हो ।
नारायणी अस्पतालमा १ सय ४० जनाको पिसिआर परीक्षण गर्दा ९९ जनामा कोरोना संक्रमण पुष्टि भएको छ, जसमा पर्साका ८६ जना, बाराका १० जना, रौतहटका २ जना एवं सर्लाहीका १ जना रहेका छन् । संक्रमण पुष्टि हुनेहरुमा ६५ जना पुरुष रहेका छन् भने ३४ जना महिला रहेको नारायणी अस्पतालका कोभिड कोर्डिनेटर डा. सरोज रोशन दासले जानकारी दिए । उनका अनुसार संक्रमितहरुको उमेर समूह १० देखि ७२ वर्षसम्म रहेको छ भने उनीहरुको सिटि भ्यालु १४.१ देखि ३४.२ रहेको छ । पर्सामा आइतबारसम्म कोरोना संक्रमितको संख्या ३ हजार ९ सय २७ जना पुगेको छ ।
जसमा २ हजार ९ सय ५८ जना पुरुष तथा ९ सय ६९ जना महिला रहेको छ । यसैगरि ३ हजार १ सय ९९ जना निको भएर घर फर्किएका छन् भने ६३ जनाको मृत्यु भइसकेको छ जिल्ला जनस्वास्थ्य कार्यालय पर्साका प्रमुख कामेश्वर चौरसियाले जानकारी दिए ।
उनका अनुसार ७ सय १२ जना कोरोना संक्रमितहरु होम आइसुलेशनमा छन्, जसमा ४ सय ७१ जना पुरुष तथा २ सय ४१ जना महिला रहेका छन् । यसैगरि नारायणी अस्पतालको आइसुलेशनमा ४२ जना भर्ना रहेका छन् भने ७ जना आईसियूमा भर्ना रहेका छन् । त्यसैगरि शनिबार २ जना कोरोना संक्रमित निको भएर घर फर्केका छन् ।
नारायणी अस्प्तालमा कोरोना संक्रमितहरुको संख्या बढेसँगै मंगलबारदेखि सुरक्षित इमरजेन्सी वार्ड संचालन हुने भएको छ, जसमा अन्य रोगको विरामीहरुलाई उपचार गरिनेछ भने पुरानो इमर्जेन्सी वार्डमा कोरोना संक्रमितहरुको उपचार गरिने प्रवक्ता डा। दासले जानकारी दिए ।
हातहतियार तथा लागु औषध कारोबारी गिरोहका एक प्रहरी जवानसहित ८ जना पक्राउ
वीरगंज । पर्सा प्रहरीले हातहतियार तथा लागु औषध काराेबारी गिराेहका ८ जनालाई पक्राउ गरेकाे छ ।
पक्राउ पर्नेमा मकवानपुर जिल्ला मनहरी गाउँपालिका वडा नं.५ निवासी वर्ष २५ को राजु रानामगर, रौतहट जिल्ला सखुहवा नगरपालिका वडा नं १ घर भई जिल्ला प्रहरी कार्यालय पर्सामा कार्यरत प्रहरी जवान वर्ष २९ को अवधेश प्रसाद यादव, वीरगंज महानगरपालिका वडा नं.१२ मुर्ली निवासी वर्ष ४३ को लालबाबु सिंह, साेही ठाउँ निवासी वर्ष ३५ को श्यामबाबु कुशवाहा, वर्ष ४२ को अरविन्द प्रसाद गुप्ता, वर्ष ४२ को कुँवर सिंह, विरगंज महानगरपालिका वडा नं. १५ निवासी बर्ष २४ को नन्दन सिंह र साेही ठाउँ निवासी वर्ष ३१ को रोशन सिंह रहेका छन् ।
सूचना परिचालन र प्रहरी कारबाहीको सिलसिलामा बैशाख ८ गते सांझ ६ बजेको समयमा वीरगंज महानगरपालिकाकाे वडा नं.१६ स्थित शंकराचार्यगेटमा खटिएको प्रहरी टोलीले चेक जाँच गर्ने क्रममा भारत रक्सौलबाट वीरगंजतर्फ आउँदै गरेका पैदलयात्री मकवानपुरकाे मनहरी गाउँपालिका वडा नं.५ निवासी राजु रानामगरलाई पक्राउ गरी निजको साथबाट SUNMICA लेखेको स्वचालित पेस्तोल थान-१ र म्याग्जिन थान-२ बरामद गरेकाे थियाे ।
प्रहरीका अनुसार उनलाई हिरासतमा राखी हातहतियार मुद्दामा अनुसन्धानको क्रममा निज तथा हाल यकिन ठेगाना नखुलेको काठमाण्डौतिर बस्दै आएका अर्का लागु औषध कारोबारी राम प्रजापतिले बैशाख ८ गते नै दिउँसो भारतको रक्सौलबाट मुस्तफा भन्ने व्यक्तिसँग २ वटा पेस्तोल नेरू एक लाख ५० हजारमा खरिद गरेको र सो मध्येको पेस्तोल थान -१, म्याग्जिन थान २ तथा लागु औषध डाइजिपाम १०० एम्पुल, नुर्फिन १०० एम्पुल, फिनार्गन १०० एम्पुल गरी जम्मा ३०० एम्पुल, निट्राभेट १२ सय ट्याब्लेट ल्याई वीरगंज बसपार्कमा रहेको मनकामना गेष्ट हाउसको कोठा नम्बर १०५ मा बसेको थियाे ।
पक्राउ परेकाहरुले उक्त पेस्तोल र लागु औषध लुटपाट गर्ने योजना बनाई ४ बजेको समयमा होटलको कोठाभित्र प्रवेश गरी उक्त लागू औषधहरू, हतियार (पेस्तोल थान १ र म्याग्जिन थान २), मोवाईल फोन सेट थान-४, राम प्रजापतिको दुबै कानमा रहेको सुनको मुन्द्रा थान २ र नगद रू. ७ हजार लुटपाट गरेको खुल्न आएकोले निजहरूलाई बैशाख १० गते वीरगंज महानगरपालिकाकाे विभिन्न स्थानबाट नियन्त्रणमा लिई पेस्तोल थान २, म्याग्जिन थान ४, सुनको मुन्द्रा अंदाजी आधा तोला थान २, नगद रू. ७ हजार, लागु औषध (डाइजिपाम, नुर्फिन र फेनार्गन-१००-१०० एम्पुल गरी ३०० एम्पुल), १२ सय पिस निट्राभेट ट्याब्लेट समेत बरामद गरी लागु औषध, हातहतियार तथा संगठित अपराध मुद्दामा अनुसन्धान भइरहेको जिल्ला प्रहरी कार्यालय पर्साले जनाएकाे छ ।
अनुसन्धानकाे क्रममा पक्राउ परेका व्यक्तिहरूले काठमाण्डौ तथा विभिन्न स्थानबाट लागु औषध तथा हातहतियार खरिद गर्न आउने व्यक्तिहरूलाई भारतको रक्सौल लगी सम्बन्धित कारोबारीहरूसँग सम्पर्क गराई खरिद गराउने, ओसारपसार गर्न सहयोग गरी कमिशन लिने तथा पछि पुन: निजहरूलाई नै योजना बनाई लागू औषध, हातहतियार लगायत अन्य धनमालहरू समेत लुटपाट गरी पुन: भारत तथा अन्य कारोवारीहरुलाई विक्रि वितरण गर्न लगायतका आपराधिक कार्यमा पहिलेदेखि नै संलग्न रहेको खुल्न आएको जिल्ला प्रहरी कार्यालय पर्साका प्रवक्ता एवम् प्रहरी नायब उपरिक्षक ओमप्रकाश खनालले वताए ।
यस सम्बन्धमा विस्तृत अनुसन्धान जारी रहेको समेत उनले प्रेस विज्ञप्ती मार्फत जानकारी गराएका छन् ।
प्रथम परवानीपुर गोल्ड कप सुरु
वीरगंज । शक्ति युवा क्लब र परवानीपुर युवा क्लबको आयोजनामा त्रिशक्ति सिमेन्ट प्रथम परवानीपुर गोल्डकप शनिवारदेखि शुरु भएको छ ।
वीरगंज–२१ परवानीपुर खेल मैदानमा शुरु भएको प्रतियोगिताको उद्घाटन प्रदेश २ का भौतिक पूर्वाधार विकास मन्त्री जितेन्द्र सोनलले गरेका हुन् ।प्रतियोगिता उद्घाटनपछि उनले प्रदेश सरकार प्रदेश २को खेलकुद विकासको लागि प्रतिबद्ध रहेको बताए । उनले परवानीपुर खेलकुद मैदान एतिहासिक खेलकुद मैदान भएको र करिब एक दशकदेखि बन्द भएको फूटबल प्रतियोगिता परवानीपुरमा हुनुले खुशी लागेको बताए ।
उनले कोरोना महामारी जस्तै रोग व्याधीलाई खेलकुदले दूर गर्ने तथा आजको तनावको युगमा शारीरिक व्याम तथा खेलकुद अहम कुरा भएको उनले जोड दिएका थिए ।खेलाडी राष्टको गहना भएकोले स्थानीय स्तरमा खेलाडीको सम्मान र खेल्ने अवसर सृजना भएमा खेलाडी उत्पादन गर्दै देशका लागि खेलकुदले फडको मार्ने उनको भनाई थियो ।उद्घाटन खेलमा वीरगंज युथ क्लबले नेपाल फूटबल संघ रौतहटलाई १ गोलले पराजित गरेको थियो ।खेल शुरु भएको १५ औं मिनेटमा डिबक्स भित्र आदित शाक्यले दिएको पासलाई श्रीजन शाक्यले गोलमा परिणत गरेका थिए ।
त्यसपछि रौतहटले गोल फर्काउन कडा परिश्रम गर्दा समेत गोल फिर्ता गर्न सकेन ।त्यही एक गोल नै निर्णयक गोल बनेको थियो ।आइतवार अपरान्ह ४ बजे धुनषा र वीरगंज यूनाइटेड वीच हुने आयोजकले जनाएको छ ।वैशाख १८ गते सम्म चल्ने प्रतियोगितामा प्रदेश २ का ६,वर्दिवास एपिएफ र हेटौडा फूटबल एकेडेमी गरी ८ ओटा टिमको सहभागिता छ ।
प्रतियोगिताको विजेताले १ लाख र उपविजेताले ५० हजार नगद राशीसहित पुरस्कार पाउने छ ।प्रतियोगिता आयोजक समितिका अध्यक्ष सुबोध कुमार श्रीवास्तवको अध्यक्षतामा भएको कार्यक्रममा बारा क्षेत्र नं ४ का सघीय सासद एकबाल मियाँ, परवानीपुर गापाका अध्यक्ष हरिनारायण साह, वीरगंज महानगर वडा नं २१ का वडा अध्यक्ष हबिब मियाँ, वडा सदस्य जतन राउत कुर्मी, नागमणि उपाध्यायलगायतको सहभागिता थियो ।
गण्डकमा निःशुल्क मास्क वितरण
वीरगंज । ईलाका प्रहरी कार्यालय प्रसौनी बारा र स्वच्छ समाज युवा क्लबको सहकार्यमा शनिबार गण्डक चौकमा निःशुल्क माक्स वितरण गरिएको छ ।
दोस्रो चरणको कोरोना भाइरस तिब्र गतिले बढदै गएको र यस्तो संकटको घडीमा बाँच्नको निम्ति गण्डक चौकमा सवारी चालक, सर्वसाधाण, यात्रु लगायतलाई २ सयभन्दा बढि माक्स वितरण गरिएको हो । यसका साथै सबै यात्रु, स्थानिय लगायतका सर्वसाधाण जनतालाई इलाका प्रहरी कार्यालय प्रसौनीका प्रहरी निरीक्षक विन्देशवर यादवको नेतृत्वमा नेपाल सरकारले निर्धारण गरेको स्वास्थ्य मापदण्डको पालना गर्न सबैलाई आग्रहसमेत गरिएको थियो ।
सो अवसरमा प्रहरी निरिक्षक यादवले आफ्नो ईलाकालाई शान्ति सुरक्षाको साथै यो महामारीबाट वचन सक्ने हरेक उपाएको साथ काम गर्ने प्रतबद्धता जाहेर गरेका थिए । उनले स्वच्छ समाज युवा क्लबलाई सहकार्यको लागी धन्यवाद दिदै आउने दिनमा सहकार्य गरेर अगाडि बढने प्रतिबद्धता जनाए ।
यसैगरी क्लबका अध्यक्ष भूपेन्द्र पटेलले आफूहरु निरन्तर सामाजिक कार्य गर्दै आएको र आउने दिनमा कोरोना भाइरसलाई लक्षितगरी छुटै किसिमको स्वास्थ्य सम्बन्धी प्रशिक्षण कार्यक्रम गर्ने जानकरी दिए ।
यस्तै परवानीपुर गाउँपालिकाका कार्यपालिका सदस्य सञ्जु साहले प्रहरी प्रशासन र सामुदायिक क्लबको सहकार्यमा आफू हरसम्भव साथ दिन तयार रहेको बताए ।
माक्स वितरण कार्यक्रममा क्लबका उपाध्यक्ष उमेश साह कानु, सचिव त्रिलोक प्रताप सिंह, कोषाध्यक्ष मुस्तुफा आलम, सदस्यहरुमा सरोज यादव, प्रमोद यादव, अखिल पटेल, दरोगा यादव, इलाका प्रहरी कार्यालय प्रसाउनिका सइ राजकिशोर प्रसाद यादव, असई सुरेन्द्र हजरा, प्रहरी हवल्दार राजकिशोर यादव , दिनेश राम लगायतको सहभागिता रहेको थियो ।












