Date
बिहि, मंसिर ३, २०८३
Thu, November 19, 2026
Home Blog Page 802

भेडाहा खोलामा २५ करोडको लागतमा स्थायी बाँध निर्माण हुने

0

वीरगंज । वीरगंज महानगरपालिकाले आगामी आर्थिक बर्षमा १५ करोडको लागतमा बाँध निर्माण गर्ने भएको छ ।

वीरगंज महानगरपालिकाका नगर प्रमुख विजय कुमार सरावगीले भेडा खोलाले कटान गरी क्षति पु¥याएको ग्रामीण क्षेत्रका वडाहरुमा मंगलबार स्थलगत अनुगमन निरीक्षण गरी आगामी आर्थिक बर्षमा कटान रोक्न बाँध निर्माण गरिने बताए ।

महानगरपालिकाको वडा नम्बर २७, २८, २९, ३० र ३१ गरी पाँच वटा वडामा भेडाहा खोलामा आएको बाढीले बर्सेनि खेती योग्य जमिन कटान गर्ने गरेको छ । भेडाहा खोलाको कटान नियन्त्रणका लागि महानगरपालिकाले २५ करोडको लागतमा आगामी आर्थिक बर्ष २०७८/०७९ मा स्थायी बाँध निर्माण शुरु गरिने महानगरपालिकाका प्रमुख सरावगीले जानकारी दिए ।

बाँध निर्माणका लागि बजेट समेत विनियोजन भईसकेको उनले बताए । हरेक बर्ष भेडाहा खोलामा आएको बाढीले सयौं विगाहा खेतीयोग्य जमिन कटान गर्ने गरेकोले स्थायी बाँधका लागि महानगरपालिकाले बजेट छुट्याएको नगर प्रमुख सरावगीले जानकारी गराए ।

जय माता दी ट्रेडर्सलाई ५० हजार जरिवाना

0

वीरगंज । वीरगंज महानगरपालिकाकाे वडा नं‍. १५  मा रहेकाे जय माता दी ट्रेडर्सलाई जरिवाना भएकाे छ ।

उजुरीको आधारमा अनुगमन गर्दा कवाडी समानको खरिद बिक्रीको इजाजत लिई हार्डवेयरका समान, जस्तापाता तथा अन्य सामान बिक्री वितरण गरिएको पाइएकाेले जय माता दी ट्रेडर्सलाई ५० हजारा जरिवाना गरिएकाे वाणिज्य आपूर्ति तथा उपभोक्ता सँरक्षण कार्यालयका सूचना अधिकारी दिलिप खंग खत्वेले वताए ।

उपभोक्ता सँरक्षण ऐन, २०७५ को दफा ३८ को ट बमोजिम कसुर गरिएकोले सोही ऐन को दफा ३९ को घ बमोजिम रु ५० हजार मात्र तत्काल जरिवाना गरिएको उनले जानकारी दिए ।

उक्त रकम ७ दिन भित्र राष्ट्रिय वाणिज्य बैंकमा दाखिला गरि भौचर कार्यालयमा पेश गर्न निर्देशन दिएको खत्वेले जानकारी गराए ।

उजरीकाे आधारमा वाणिज्य, आपूर्ति तथा उपभोक्ता सँरक्षण कार्यालय पर्साका निमित कार्यालय प्रमूख जित बहादुर भण्डारीको नेतृत्वमा जिल्ला प्रशासन कार्यालय पर्सा, जिल्ला प्रहरी कार्यालय पर्साको संयुत अनुगमन टोलीले ट्रेडर्सकाे अनुगमन गरेकाे थियाे । 

छिपहरमाईका ४५ बाढी पीडितले पाए राहत

0

भिस्वा । सानो पाइलाकाे सहयोगमा छिपहरमाई युवा समाजले पर्साकाे छिपहरमाई गाउँपालिकाका ४५ बाढी पीडिलाई राहत सहयाेग गरेकाे छ ।

छिपहरमाई गाउँपालिकाको मिर्जापुर, भेड़िहार्वा, जयमंगलापुर, तुलसी बार्वा, भिस्वा लगायतका ४५ पीड़ित परिवारलाई राहत स्वरूप चामल, दाल, नून, तेल, सोयाबीन, चना, चीउरा, भुजिया, चाऊ चाऊ, आलू, प्याज, बिस्कुटको  लगायतकाे खाद्य सामग्री सहयाेग गरिएकाे युवा समाजले जनाएकाे छ ।

छिपहरमाई गाउँपालिकाका अशोक कुशवाहा, राजीव जयसवाल, मनिकान्त गुप्ता, रबि महतो केवट, मृर्तुजा मिंया, हातिम अन्सारी, गुन्जन सिंह, बुलट अन्सारी लगायतका सल्लाहकार भएका छिपहरमाई युवा समाजका युवाहरू आलोक कुशवाहा, सन्दीप साह कानू, आदित्य कुमार साह, जाबेद मियां तेली, रूपेश उपाध्याय, अखिलेश कुशवाहा, हारून समानी, मनोज पटेल, सुग्रीम साह (बाबा), अजय कुमार, रोहित कुमार, सुजीत गुप्ता (गोलू), सोनू कुमार (करीमन), कीर्तिमान साह, अयूब मंसूरी लगायतका युवाहरुको समूहले राहत सहयाेग गरेकाे हाे ।

अविरल बर्षाका कारण छिपहरमाई गाउँपालिका डुबानमा परेको छ । प्राकृतिक प्रकोप बाढ़ीको चपेटामा परेको छिपहरमाई गाउँपालिकाको पांचै वाड डुबानमा परेको छ । बाढ़ीका कारण छिपहरमाई गाउँपालिकाका केहि स्थानियको घरमा बाढ़ीको पानी पसेर उनीहरुलाई पाल मुनि बस्न बाध्य बनाएका छन् भने धेरै जनाको घर बाढ़ीलेले भत्केका कारण घर बिहीन भएका छन् ।

डुबानमा परेका पीडितलाई स्थानिय निकाय, जनप्रतिनिधि तथा सम्बन्धीत निकायबाट कुनै किसिमको राहत नआएपछि छिपहरमाई गाउँपालिकाका प्रत्येक वडाका युवाहरूको जमात ” छिपहरमाई युवा समूह” एक जुट भई अति बिपन्न पीड़ित परिवारलाई सानो पाइला सामाजिक संस्थासंगकाे समन्वयमा राहत बितरण गरेकाे वताइएकाे छ ।

एक महिलासहित ६० जनाद्वारा रक्तदान

0

वीरगंज । जी.पी. कोईराला फाउण्डेशन पर्साकाे आयाेजनामा साेमबार वीरगंजमा रक्तदान कार्यक्रम सम्पन्न भएकाे छ ।

नेपालका पुर्व प्रधानमन्त्रि तथा नेपाली कांग्रेसका पूर्व सभापति स्व. गिरिजा प्रसाद कोईरालाको ९८ औं जन्म जयन्तिको अवसरमा भएकाे कार्यक्रममा एक महिलासहित ६० जनाले रक्तदान गरेका हुन् ।

कोरोना महामारीका कारण ब्लड बैंक वीरगंज शाखामा रगत अभाव भएकोले जन्मोत्सवको अवसर पारेर अकास्मिक रक्तदान कार्यक्रमको आयोजना गरेको फाउण्डेशन पर्साका सह सचिव मिन्टु देवि सिंहले बताईन ।

फाउण्डेशन पर्साका अध्यक्ष मोहम्मद सहाबुदिन अध्यक्षतामा भएकाे रक्तदान कार्यक्रमकाे उद्घाटन वीरगंज महानगर पालिकाकी उप प्रमुख शान्ति कार्कीले गरेकी थिइन ।

कार्यक्रममा नेपाली काग्रेंस पर्साका उपसभापति दिना प्रसाद गुप्ता, प्रकास उपाध्याय, वीरगंज महानगरपालिका वडा नं ६ का वडाध्यक्ष ध्रुव नेपाल, श्याम कुमार पोख्रेल, नरेन्द्र साह, विजय पौडेल, सन्तोष सिहं, दिलिपराज कार्की, जितेन्द्र सिहं लगायतकाे उपस्थिति रहेको थियो ।

जिल्ला स्तरीय अप्रवासी हकहित संरक्षण सञ्जाल गठन

0

वीरगंज । सुरक्षित वेदेशिक रोजगारमा जानेहरुको लागी काम गर्न पर्सामा जिल्ला स्तरीय अप्रवासी हकहित संरक्षण सञ्जाल गठन भएकाे छ ।

बीरगज महानगरपालिकाको आर्थिक विकास महाशाखाका प्रमुख रामदयाल यादवको अध्यक्षतामा साेमबार हाेटल भिस्वामा भएकाे एक कार्यक्रममा जुलफकार अन्सारीको संयोजकत्वमा २१ सदस्यीय सञ्जाल गठन भएकाे हाे ।

नवगठित सञ्जालका पदाधिकारीहरुले पर्सा जिल्लामा सुरक्षित वेदेशिक रोजगारमा जानेहरुको लागी काम गर्ने प्रतिवद्धता समेत जाहेर गरेका छन् । उनीहरुले अगामी दिनमा वेदेशिक रोजगारको समस्यामा परेका ब्यक्तिहरुको वकालत गर्ने छन् ।

नेपाल सरकार र स्वीटजरल्याण्ड सरकार बीचभएको द्विपक्षीय सम्झौता अनुसार श्रम, रोजगार तथा सामाजिक सुरक्षामन्त्रालयको नीतिगत पहल, प्रदेश सरकारको समन्वय, हेल्भेटास नेपालको प्राविधिक सहयोग, स्थानीयतहहरु (बिरगंजमनपा, पर्सागढी नगरपालिका, सखुवा प्रसौनी गाउँपालिका र ठोरी गाउँपालिका)को नेतृत्वमा सेवाप्रदायक संस्था दिव्य युवा क्लब, पर्साकाे सहजिकरणमा सुरक्षित आप्रवासन परियोजना (सामी) अन्तर्गत सञ्जाल गठन भएकाे हाे । 

दिव्य युवा क्लबको कार्यकारी निर्देशक रामाकान्त प्रसाद कुर्मीको प्रमुख अथित्यमा भएको कार्यक्रममा सामी परियोजनाकाे बारेमा र सञ्जाल गठन प्रकृयाको बारेमा संयोजक जय नारायण चौधरीले कार्यपत्र प्रस्तुत गरेका थिए ।

निर्मला भण्डारीले स्वागत मन्तव्य राखेकी कार्यक्रमकाे संचालन देवता रिजालले गरेकी थिइन ।

चट्याङबाट मृत्यु भएका परिवारलाई गाउँपालिकाकाे आर्थिक सहयाेग

0

वीरगंज । पर्साको सखुवाप्रसौनी गाउँपालिकाले चट्याङ लागेर मृत्यु र घाइते भएकाहरुलाई आर्थिक सहयाेग गरेकाे छ । चट्याङ लागेर मृत्यु भएका परिवारलाई रु ५० हजार र घाइतेहरुलाई १० हजारकाे दरले गाउँपालिकाले सहयाेग गरेकाे हाे ।

चट्याङ लागेर मृत्यु भएका वडा नं ४ देउरवानाका रघुवीर यादवकी पत्नी मीरादेवी यादवलाई सहयाेग रकम रु ५० हजार बराबरकाे चेक गाउँपालिका अध्यक्ष प्रदीप जयसवालले उनकाे घर मै पुगी हस्तान्तरण गरेका थिए ।  

यसैगरी, साेही ठाउँ निवासी घाइते रम्भा देवी, मैना देवी, गीता देवी, विशालकुमार गुप्तालाई उपचारार्थ जनही १० हजारको चेक पीडितको घरमा गएर हस्तान्तरण गरिएको गाउँपालिकाका लेखापाल सुमन साहले वताए ।

पर्सामा जारी निषेधाज्ञा थप खुकुलाे, यातायात र हाेटल संचालन गर्न पाइने

0

वीरगंज । दाेस्राे लहरकाे काेराेना भाइरस संक्रमण राेकथाम र नियन्त्रणकाे लागि पर्सा जिल्लामा जारी निषेधाज्ञा थप खुकुलो भएको छ । झण्डै २ महिनाभन्दा लामो समयदेखि जारी निषेधाज्ञा थप खुकुलाे बनाइएकाे हाे । 

जिल्ला कोभिड १९ संकट व्यवस्थापन केन्द्र (डिसिसिएमसी) पर्साको आइतवार बसेको बैठकले बैशाख १६ गतेदेखि जारी निषेधाज्ञालाई थप खुकुलो बनाउँदै स्वास्थ्य सुरक्षाका मापदण्ड पालना गरी निजी सवारी साधन र जिल्ला भित्र मात्र सार्वजनिक यात्रुवाहक सवारी साधन सञ्चालन गर्न दिने निर्णय गरेको छ ।

यसका साथै जिल्ला प्रशासन कार्यालय पर्साका प्रमुख जिल्ला अधिकारी एवम् डिसिसिएमसीका संयोजक पिताम्बर घिमिरेको अध्यक्षतामा बसेको बैठकले स्वास्थ्य मापदण्डको पालना गरी पसल, होटेल एवम् रेष्टुरेन्ट कुल क्षमताको ५० प्रतिशत मात्र सञ्चालन गर्न दिने निर्णय गरेको छ ।

जिल्लामा जारी निषेधाज्ञाका कारण कोरोना भाइरसको संक्रमण दर कम भएको ठहर गर्दै पूर्व निर्णयमा केही परिमार्जन गर्दै निषेधाज्ञा खुकुलो बनाइएको डिसिसिएमसीको बैठकमा सहभागी वीरगंज महानगरपालिकाका मेयर विजय कुमार सरावगीले वताए । 

बैठकले सबै प्रकारका सभा, सम्मेलन, गोष्ठी, तालिम, सेमिनार, सिनेमा हल, पार्टी प्यालेस, स्वीमिंग पुल, मनोरञ्जन स्थल, जिमखाना लगायतका भिडभाड हुने स्थानहरुलाई भने बन्द राख्ने निर्णय गरेको छ । शैक्षिक संस्थाहरु, विद्यालय, कलेज, ट्युशन सेन्टर आदिलाई पनि हाललाई बन्द नै राख्नुपर्ने बैठकले निर्णय गरेको छ । 

त्यसैगरी लामो दुरीका एवम् जिल्ला बाहिर सञ्चालन हुने सार्वजनिक यात्रुबाहक सवारी साधनलाई पनि सञ्चालन गर्न रोक लगाइएको छ ।

यसअघि निश्चित समयमा खुल्ने बजार पनि अब नियमित रुपमा खोल्न पाइने छ । बिहान १० बजेदेखि राति ८ बजेसम्म खोल्न पाइने पसलहरुको समयअवधि पनि हटाइएको छ । 

यस्तै, विवाह ब्रतबन्ध/नामाकरण संस्कार जस्ता कार्य हकमा बढीमा २५ जना सम्मकाे उपस्थितीमा स्वास्थ्य सुरक्षाका मापदण्डकाे पालना गरी गर्न सकिने बैठककाे निर्णय छ । 

युवालयद्वारा किशोरीहरुलाई हाइजीन किट

0

वीरगंज । युवालय नामक गैर सरकारी संस्थाले वीरगंज महानगरपालिकाकाे वडा नम्बर २७ उदयपुरघुर्मीका ३० जना किशोरीहरुलाई हाइजीन किट वितरण गरेको छ ।

युवालयका अध्यक्ष सन्तोष महर्जनको नेतृत्वमा उदयपुरघुर्मी पुगेको युवालयको टोलीले सो टोलका किशोरीहरुलाई प्याड ४ पिस, कपडा धुने र नुहाउने २/२ पिस साबुन, नैल कटर १ पिस, सेनिटाइजर १ पिस, पियुष १ पिस, मञ्जन १ पिस, १ पिस रुमाल लगायतका सामाग्री वितरण गरेको युवालयका बाेर्ड सदस्य जया साहले वताए ।

उनले भने “महिनावारी किशोरी एवम् महिलाहरुको नियमित अनि प्राकृतिक प्रक्रिया हो । तर प्राकृतिक प्रक्रियाको बारेमा खुलेर कुरा गर्ने अवस्था हाम्रो समाजमा अँझै भइसकेको छैन । अँझ किशोरीहरुले महिनावारीको समयमा आफ्ना अभिभावकहरुलाई बताउन र आवश्यक सामाग्रीको जोहो गरिदिन पनि अप्ठ्यारो मानीरहेका हुन्छन् । तसर्थ यस्तै असहज अवस्थालाई मध्यनजर गर्दै हामीले किशोरीहरुलाई हाइजीन किट वितरण गरेका हाैं ।”

बालबालिका, किशोरी, गर्भवती एवम् सुत्केरी महिलाहरुलाई विशेष प्राथमिकता दिएर उनिहरुको क्षेत्रमा युवालयले काम गर्दै आइरहेको संस्थाका अध्यक्ष महर्जनले बताए । किशोरीहरुलाई हाइजीन किट वितरण गर्दै युवालयकी लेखा तथा प्रशासन प्रमुख नितु ढंगोलले महिनावारीको समयमा व्यक्तिगत सरसफाईमा ध्यान दिन आग्रह गरिन् ।

डि के ए अष्ट्रियाको सहयोगमा हाइजीन किट वितरण गरिएको युवालयका सदस्य साहले जानकारी दिए ।

वीरगञ्जका अन्य वडाहरुमा पनि शैक्षिक सामाग्री एवम् अन्य राहत सामाग्री समेत वितरण गर्दै आएको युवालयले आगामी दिनमा पनि सामाजिक क्रियाकलापलाई निरन्तरता दिने बालअधिकारकर्मी समेत रहेका साहले बताए ।

वीरगञ्ज महानगरपालिका वडा नम्बर २७ की वडा सदस्य रमिला खातुन, उदयपुरघुर्मी स्वास्थ्य चौकीका प्रमुख कृष्णचन्द्र प्रसाद साह, स्वयमसेवक विकास साह लगायतको उपस्थितीमा हाइजीन किट वितरण गरिएको थियाे ।