वीरगंज । दाेस्राे लहरकाे काेराेना भाइरस संक्रमण राेकथाम र नियन्त्रणकाे लागि पर्सा जिल्लामा जारी निषेधाज्ञा थप खुकुलो भएको छ । झण्डै २ महिनाभन्दा लामो समयदेखि जारी निषेधाज्ञा थप खुकुलाे बनाइएकाे हाे ।
जिल्ला कोभिड १९ संकट व्यवस्थापन केन्द्र (डिसिसिएमसी) पर्साको आइतवार बसेको बैठकले बैशाख १६ गतेदेखि जारी निषेधाज्ञालाई थप खुकुलो बनाउँदै स्वास्थ्य सुरक्षाका मापदण्ड पालना गरी निजी सवारी साधन र जिल्ला भित्र मात्र सार्वजनिक यात्रुवाहक सवारी साधन सञ्चालन गर्न दिने निर्णय गरेको छ ।
यसका साथै जिल्ला प्रशासन कार्यालय पर्साका प्रमुख जिल्ला अधिकारी एवम् डिसिसिएमसीका संयोजक पिताम्बर घिमिरेको अध्यक्षतामा बसेको बैठकले स्वास्थ्य मापदण्डको पालना गरी पसल, होटेल एवम् रेष्टुरेन्ट कुल क्षमताको ५० प्रतिशत मात्र सञ्चालन गर्न दिने निर्णय गरेको छ ।
जिल्लामा जारी निषेधाज्ञाका कारण कोरोना भाइरसको संक्रमण दर कम भएको ठहर गर्दै पूर्व निर्णयमा केही परिमार्जन गर्दै निषेधाज्ञा खुकुलो बनाइएको डिसिसिएमसीको बैठकमा सहभागी वीरगंज महानगरपालिकाका मेयर विजय कुमार सरावगीले वताए ।
बैठकले सबै प्रकारका सभा, सम्मेलन, गोष्ठी, तालिम, सेमिनार, सिनेमा हल, पार्टी प्यालेस, स्वीमिंग पुल, मनोरञ्जन स्थल, जिमखाना लगायतका भिडभाड हुने स्थानहरुलाई भने बन्द राख्ने निर्णय गरेको छ । शैक्षिक संस्थाहरु, विद्यालय, कलेज, ट्युशन सेन्टर आदिलाई पनि हाललाई बन्द नै राख्नुपर्ने बैठकले निर्णय गरेको छ ।
त्यसैगरी लामो दुरीका एवम् जिल्ला बाहिर सञ्चालन हुने सार्वजनिक यात्रुबाहक सवारी साधनलाई पनि सञ्चालन गर्न रोक लगाइएको छ ।
यसअघि निश्चित समयमा खुल्ने बजार पनि अब नियमित रुपमा खोल्न पाइने छ । बिहान १० बजेदेखि राति ८ बजेसम्म खोल्न पाइने पसलहरुको समयअवधि पनि हटाइएको छ ।
यस्तै, विवाह ब्रतबन्ध/नामाकरण संस्कार जस्ता कार्य हकमा बढीमा २५ जना सम्मकाे उपस्थितीमा स्वास्थ्य सुरक्षाका मापदण्डकाे पालना गरी गर्न सकिने बैठककाे निर्णय छ ।
