वीरगंज । पर्साको कालिकामाई गाउँपालिका–२ स्थित गदियानीको एक सडक २५ वर्ष बितिसक्दा पनि निर्माण हुन नसक्दा स्थानीयवासीले वर्षौंदेखि सास्ती खेप्दै आएका छन् । सडक ढलान नहुँदा वर्षायाममा हिलो र अन्य समयमा धुलोका कारण आवतजावत गर्न निकै कठिन हुने गरेको स्थानीयको गुनासो छ ।

स्थानीय बुलेट तिवारीका अनुसार गाउँपालिका अध्यक्ष, उपाध्यक्ष, वडा नं. २ का वडा अध्यक्ष सोनालाल चौरसिया तथा सम्बन्धित निकायलाई पटक–पटक सडक निर्माणका लागि ध्यानाकर्षण गराइए पनि हालसम्म कुनै ठोस पहल भएको छैन ।

उनका अनुसार भेडिहारी क्षेत्रका अधिकांश गल्ली तथा ८ फिट चौडाइका सडकसमेत ढलान भइसकेका छन् । तर १२ फिट चौडाइ रहेको गदियानीको उक्त सडक भने अझै निर्माण हुन नसक्दा आफूहरू विभेदमा परेको महसुस भएको उनले बताए ।

स्थानीयका अनुसार वर्षायाममा सडक हिलाम्मे हुँदा पैदल हिँड्नसमेत समस्या हुने गरेको छ भने सुख्खा मौसममा धुलोका कारण दैनिक जनजीवन प्रभावित हुने गरेको छ ।

स्थानीयवासीहरूले गदियानीको उक्त सडकलाई तत्काल स्तरोन्नति गरी ढलान गर्न तथा सहज आवागमनको व्यवस्था मिलाउन गाउँपालिका अध्यक्ष, उपाध्यक्ष, वडा अध्यक्ष चौरसिया र सम्बन्धित निकायसँग माग गरेका छन् ।

वीरगंज । नारायणी वाङ्गमय प्रतिष्ठान र लक्ष्मी साहित्य समाजको संयुक्त आयोजनामा २१३औँ भानु जयन्ती तथा नारायणी वाङ्गमय कृति सम्मान समारोह सम्पन्न भएको छ ।

समारोहमा २०८२ सालभित्र मधेश प्रदेशका आठ जिल्ला तथा साविक नारायणी अञ्चलअन्तर्गत मकवानपुर र चितवनका साहित्यकारहरूले प्रकाशित गरेका कृतिमध्ये वीरगञ्ज निवासी साहित्यकार विनयराज गौतमको कथासङ्ग्रह ‘च्यातिएका पानाहरू’ लाई ‘नारायणी वाङ्गमय कृति सम्मान’ प्रदान गरिएको हो ।

गौतमलाई नगद २५ हजार रुपैयाँ, दोसल्ला र ताम्रपत्रसहित सम्मान गरिएको थियो। प्रतिष्ठानका अध्यक्ष डा. विश्वम्भरकुमार शर्मा तथा वरिष्ठ समालोचक एवं भानु प्रतिष्ठानका पूर्वअध्यक्ष प्रा.डा. व्रतराज आचार्यले संयुक्त रूपमा सम्मान प्रदान गरेका हुन् ।

कार्यक्रमलाई सम्बोधन गर्दै प्रा.डा. आचार्यले आदिकवि भानुभक्त आचार्यको नेपाली भाषा र साहित्यमा रहेको ऐतिहासिक योगदानको चर्चा गर्दै भाषा, साहित्य तथा संस्कृतिको संरक्षण र प्रवर्द्धनमा सबै सरोकारवालाको सक्रिय भूमिका आवश्यक रहेको बताए ।

कार्यक्रममा साहित्यकार गणेशप्रसाद लाठ, भाषा आयोगका पूर्वसदस्य गोपाल अश्क, वीरगञ्ज उद्योग वाणिज्य संघका अध्यक्ष हरिप्रसाद गौतम, ज्ञानदा एकेडेमीका कार्यकारी अधिकृत राजेन्द्रप्रसाद कोइरालालगायतले शुभकामना मन्तव्य व्यक्त गरेका थिए ।

त्यसैगरी मधेश विश्वविद्यालयका उपकुलपति प्रा.डा. दीपक शाक्य, प्रतिष्ठानका सल्लाहकार जगदीश शर्मा, श्याम पोख्रेल, ज्येष्ठ नागरिक संघ पर्साका अध्यक्ष इ. बैजनाथप्रसाद कोइरीसहित विभिन्न साहित्यकार, शिक्षाविद् तथा समाजसेवीहरूको उपस्थिति रहेको प्रतिष्ठानका सचिव महेशचन्द्र गौतमले जानकारी दिए ।

कार्यक्रममा गौतम स्कुल, नवदीप एकेडेमी, वीरगञ्ज पब्लिक कलेज (बीपीसी), सिद्धार्थ इन्टरनेशनल कलेज तथा ज्ञानदा एकेडेमीका शिक्षक तथा विद्यार्थीहरूको उल्लेखनीय सहभागिता रहेको थियो ।

प्रतिष्ठानकी सदस्य गीता भण्डारीले स्वागत मन्तव्य व्यक्त गरेको कार्यक्रमको सहजीकरण सदस्य सूर्य शुभचिन्तकले गरेका थिए ।

सेढवा । पर्साको ठोरी गाउँपालिका–५ स्थित ठूलो बाघमोर्चामा तामाङ समुदायको आयोजनामा परम्परागत लामा नाच (झाँकी) तथा धार्मिक पूजाआजा कार्यक्रम आइतबार भव्य रूपमा सम्पन्न भएको छ ।

तामाङ समुदायको सांस्कृतिक तथा धार्मिक पहिचानको संरक्षण, प्रवर्द्धन र पुस्तान्तरण गर्ने उद्देश्यले आयोजित कार्यक्रममा स्थानीयवासीसँगै विभिन्न जिल्लाबाट आएका लामा गुरु, धार्मिक व्यक्तित्व तथा श्रद्धालुको उल्लेखनीय सहभागिता रहेको थियो ।

कार्यक्रममा सिन्धुपाल्चोक, चितवन र पर्साका तीनवटा गुम्बाबाट आएका लामा समूहले आ–आफ्नो मौलिक शैलीमा परम्परागत लामा नाच प्रस्तुत गरेका थिए । धार्मिक मन्त्र, बाजागाजा र सांस्कृतिक झाँकीसहित प्रस्तुत गरिएको नाचले दर्शकको विशेष आकर्षणको केन्द्र बनेको थियो ।

तामाङ समुदायमा लामा नाचलाई धार्मिक आस्था, सांस्कृतिक पहिचान र सामाजिक एकताको प्रतीकका रूपमा लिने गरिन्छ। नाचसँगै बौद्ध परम्पराअनुसार विशेष पूजापाठ, धार्मिक अनुष्ठान तथा विश्व शान्ति, सुख, समृद्धि र समुदायको कल्याणको कामना गर्दै विधिपूर्वक पूजा सम्पन्न गरिएको थियो ।

ठोरी गाउँपालिका–५ का वडाध्यक्ष अष्ठबहादुर लोप्चनले यस्ता सांस्कृतिक तथा धार्मिक कार्यक्रमले समुदायको मौलिक भाषा, धर्म, संस्कृति र परम्परालाई संरक्षण गर्दै नयाँ पुस्तामा हस्तान्तरण गर्न महत्वपूर्ण भूमिका खेल्ने बताए । उनले स्थानीय तहले पनि यस्ता मौलिक सांस्कृतिक गतिविधिलाई निरन्तर प्रोत्साहन गर्ने प्रतिबद्धता व्यक्त गरे ।

कार्यक्रममा स्थानीय जनप्रतिनिधि, समाजसेवी, बुद्धिजीवी तथा विभिन्न क्षेत्रका सर्वसाधारणको उल्लेखनीय उपस्थिति रहेको थियो । सहभागीहरूले यस्ता कार्यक्रमले धार्मिक सद्भाव, सामाजिक एकता तथा सांस्कृतिक पर्यटनको विकासमा समेत सकारात्मक योगदान पुग्ने विश्वास व्यक्त गरेका थिए ।

आयोजक तामाङ समुदायले आफ्नो मौलिक भाषा, धर्म, संस्कृति र परम्पराको संरक्षण तथा प्रवर्द्धनका लागि आगामी वर्षहरूमा पनि यस्ता कार्यक्रमलाई निरन्तरता दिइने जनाएको छ । स्थानीयवासीको उत्साहपूर्ण सहभागिताले कार्यक्रमलाई थप भव्य, आकर्षक र उल्लासमय बनाएको थियो ।