वीरगंज । वीरगञ्जमा विगत तीन दिनदेखि जारी विद्युत आपूर्तिको अनियमितताले सर्वसाधारणको जनजीवन प्रभावित बनेपछि पर्सा क्षेत्र नं. १ का प्रतिनिधिसभा सदस्य तथा राष्ट्रिय स्वतन्त्र पार्टी (रास्वपा) पर्सा सभापति हरि पन्तले तत्काल समस्या समाधान गर्न नेपाल विद्युत प्राधिकरणलाई निर्देशन दिएका छन् ।

विद्युत आपूर्तिमा आएको अवरोधका कारण वीरगञ्जका विभिन्न क्षेत्रमा दैनिक जनजीवन कष्टकर बनेको थियो । समस्या सुरु भएलगत्तै काठमाडौंमा रहेका सांसद पन्तले नेपाल विद्युत प्राधिकरण र वीरगञ्ज महानगरपालिकासँग निरन्तर टेलिफोन सम्पर्क गरी विद्युत तथा खानेपानी आपूर्तिलाई सहज बनाउन आवश्यक समन्वय गर्दै आएका थिए ।

यसैबीच, बिहीबार राति वीरगञ्ज आइपुगेका सांसद पन्तले शुक्रबार जिल्ला प्रशासन कार्यालय पर्सामा प्रमुख जिल्ला अधिकारी भोला दाहालको उपस्थितिमा नेपाल विद्युत प्राधिकरण पर्सा वितरण केन्द्रका प्रमुख विजय महतोलाई बोलाई विद्युत आपूर्तिमा आएको अवरोधबारे गम्भीर चासो व्यक्त गरेका हुन् ।

उनले समस्या तत्काल समाधान गर्न, उपभोक्ताले थप सास्ती भोग्न नपर्ने व्यवस्था मिलाउन तथा भविष्यमा यस्ता समस्या दोहोरिन नदिन आवश्यक तयारी गर्न निर्देशन दिएका थिए। साथै, समस्या उत्पन्न हुनुको वास्तविक कारणबारे पनि उनले जानकारी मागेका थिए।

सांसद पन्तको जिज्ञासाको जवाफ दिँदै प्राधिकरणका प्रमुख विजय महतोले पर्सौनी ग्रिडबाट छपकैया सबस्टेसनसम्म ३३ केभी प्रसारण लाइन भूमिगत संरचनासँग जोड्ने क्रममा गत माघ महिनामै अमर (बोखार) चोक आसपासका केही स्थानीयको अवरोधका कारण काम रोकिएको बताए ।

उनका अनुसार बिहीबार उक्त अवरोध हटाइएपछि तार तान्ने काम सुरु गरिएको छ । अब केही प्राविधिक काम मात्र बाँकी रहेकाले शुक्रबार राति करिब ९ बजेसम्म विद्युत आपूर्ति पूर्ण रूपमा सुचारु हुने विश्वास व्यक्त गरे । साथै, उक्त लाइन सञ्चालनमा आएपछि आगामी दिनमा वीरगञ्जमा विद्युत आपूर्तिको समस्या उल्लेखनीय रूपमा कम हुने प्राधिकरणको दाबी छ ।

वीरगंज । वीरगंजस्थित प्रसिद्ध शक्तिपीठ श्री गहवामाई मन्दिरको चौथो रथयात्रा बिहीबार श्रद्धा, भक्ति र उत्साहका साथ भव्य तथा शान्तिपूर्ण रूपमा सम्पन्न भएको छ । विगत तीन वर्षदेखि निरन्तर आयोजना हुँदै आएको रथयात्रामा यस वर्ष प्रतिकूल मौसमका बाबजुद करिब एक लाखभन्दा बढी श्रद्धालु भक्तजनको उल्लेखनीय सहभागिता रहेको आयोजकले जनाएको छ ।

रथयात्रा बिहान ७ः३० बजे सुरु गर्ने तालिका रहे पनि बिहान ३ बजेदेखि परेको अविरल वर्षाका कारण केही समय ढिलाइ भएको थियो । वर्षा रोकिएपछि बिहान ८ः४५ बजे विशेष पूजा–आराधनापछि मन्दिर परिसरबाट रथयात्रा सुरु गरिएको थियो ।

रथयात्रा घण्टाघर, रेलवे रोडको भित्री बाइपास, छपकैया, मुख्य सडक, नारायणी अस्पताल रोड, मकालु चोक, आदर्शनगर, घडिअर्वा हुँदै पुनः माईस्थान मन्दिर पुगेर समापन गरिएको थियो । सम्पूर्ण मार्गभर भक्तजनहरूले जयकारा, भजन–कीर्तन तथा धार्मिक उत्साहका साथ सहभागिता जनाएका थिए ।

रथयात्रामा प्रतिनिधिसभा सदस्य सुशील साह कानु, वीरगंज महानगरपालिकाका निलम्वित मेयर राजेशमान सिंह, कार्यवाहक मेयर इमतियाज आलम, पर्साका प्रमुख जिल्ला अधिकारी भाेला दाहाल, युवा नेता सुधिर पटेललगायत विभिन्न क्षेत्रका विशिष्ट व्यक्तित्व तथा हजारौं श्रद्धालुको सहभागिता रहेको थियो ।

बालबालिकादेखि ज्येष्ठ नागरिकसम्म बिहानैदेखि मन्दिर परिसरमा भेला भएका थिए । मुख्य सडक विस्तारका क्रममा केही स्थानमा सामान्य असहजता भए पनि त्यसले भक्तजनको आस्था र उत्साहमा कुनै असर पारेन ।

रथयात्रालाई सुरक्षित, व्यवस्थित र मर्यादित बनाउन जिल्ला प्रहरी कार्यालय पर्साका डीएसपी राजु कार्कीको नेतृत्वमा नेपाल प्रहरी, सशस्त्र प्रहरी बल र ट्राफिक प्रहरीले विशेष सुरक्षा व्यवस्था मिलाएका थिए । रथमार्गभर बाक्लो संख्यामा सुरक्षाकर्मी परिचालन गरिनुका साथै सादा पोशाकमा समेत प्रहरी परिचालन गरिएको थियो ।

ट्राफिक व्यवस्थापन सहज बनाउन विभिन्न स्थानमा वैकल्पिक मार्गको व्यवस्था गरिएको थियो । रथयात्रा अवधिभर कुनै अप्रिय घटना नभएको प्रहरीले जनाएको छ ।

रथयात्रा सम्पन्न भएपछि आयोजक समितिका सचिव पप्पु गुप्ताले साँझ आयोजित भव्य भजन सन्ध्यामा सहभागी भई माता गहवामाईको दर्शन गरी पुण्य लाभ लिन सम्पूर्ण श्रद्धालुलाई आग्रह गरे ।

त्यसैगरी, विश्व ज्योतिष महासङ्घका एसिया उपसभापति डा. पुरुषोत्तम दुबेले श्रावण १ गते बिहान ६ः०० बजे हुने ५६ भोग महापूजा तथा दिउँसो ४ः०० बजे सुरु हुने विशाल महाप्रसाद भण्डाराको विशेष धार्मिक महत्त्व रहेको बताए । उनले महाप्रसाद ग्रहण गर्नु माता गहवामाईको असीम कृपा प्राप्त गर्नु सरह भएको धार्मिक विश्वास व्यक्त गर्दै उक्त कार्यक्रमलाई सभ्य, मर्यादित, शान्तिपूर्ण र सुव्यवस्थित बनाउन सम्पूर्ण नगरवासी, भक्तजन तथा स्वयंसेवकलाई सहयोग गर्न आग्रह गरे ।

बिहानको रथयात्रापछि दिउँसो विशेष पूजा सञ्चालन गरिएको थियो भने बेलुका मुख्य हवन, महाआरती र प्रसाद वितरण कार्यक्रम आयोजना गरिएको आयोजकले जनाएको छ ।

श्री गहवामाई तीर्थ क्षेत्र विकास समितिले यस वर्षको रथयात्रा सफल बनाउन योगदान पुर्‍याउने सम्पूर्ण स्वयंसेवक, सुरक्षा निकाय, सहयोगी संस्था, दाताहरू तथा प्रत्यक्ष–अप्रत्यक्ष रूपमा साथ दिने सम्पूर्ण श्रद्धालुप्रति हार्दिक आभार व्यक्त गरेको छ ।

आयोजकका अनुसार यस वर्षको गहवामाई रथयात्रा धार्मिक आस्था, सामाजिक सद्भाव, अनुशासन, उत्कृष्ट सुरक्षा व्यवस्थापन तथा व्यापक जनसहभागिताका कारण अहिलेसम्मकै सबैभन्दा भव्य र ऐतिहासिक रथयात्राका रूपमा सम्पन्न भएको छ ।

वीरगंज । वीरगंज महानगरपालिकाका कार्यवाहक प्रमुख इम्तियाज आलमले नगरबासीको सेवा, सुरक्षा तथा आपत्कालीन व्यवस्थापनका लागि नगरप्रहरीलाई २४सै घण्टा तयारी अवस्थामा (अलर्ट) रहन निर्देशन दिएका छन् ।

मंगलबार महानगरपालिकामा आयोजित नगरप्रहरीको रोलकल (हाजिरी तथा निरीक्षण) कार्यक्रममा कार्यवाहक प्रमुख आलम र प्रमुख प्रशासकीय अधिकृत वसन्त बहादुर बोहराले संयुक्त रूपमा नगरप्रहरीलाई आवश्यक निर्देशन दिएका हुन् । सहरमा जारी सडक विस्तार अभियान र वर्षायामका कारण नगरप्रहरीको भूमिका थप महत्वपूर्ण बनेको भन्दै उनीहरूलाई चौबिसै घण्टा नागरिकको सेवामा तत्पर रहन आग्रह गरिएको हो ।

रोलकललाई सम्बोधन गर्दै कार्यवाहक प्रमुख आलमले अहिले वीरगंजबासीले विभिन्न समस्याको सामना गरिरहेको उल्लेख गर्दै नगरप्रहरीले नागरिकको भरोसाको रूपमा काम गर्नुपर्ने बताए ।

उनले भने, “सडक विस्तारका कारण सहर केही अस्तव्यस्त बनेको छ । नाला व्यवस्थापनदेखि ट्राफिक व्यवस्थापनसम्म नागरिकले दैनिक सास्ती भोगिरहेका छन् । त्यसमाथि वर्षायामले थप चुनौती सिर्जना गरेको छ । यस्तो अवस्थामा नगरप्रहरी चौबिसै घण्टा नागरिकको सेवामा तयार रहनुपर्छ ।”

प्रमुख प्रशासकीय अधिकृत वसन्त बहादुर बोहराले सीमित स्रोत–साधनका बाबजुद नगरबासीको सुरक्षा र सार्वजनिक सम्पत्तिको संरक्षण नगरप्रहरीको पहिलो जिम्मेवारी भएको बताए । उनले नगरप्रहरीलाई आवश्यक उपकरण तथा सामग्री चाँडै उपलब्ध गराइने प्रतिबद्धता पनि व्यक्त गरे ।

बोहराले कर्मचारी संयन्त्रमा अनुशासन र ‘चेन अफ कमान्ड’को पालना अनिवार्य रहेको उल्लेख गर्दै सबै कर्मचारीले जिम्मेवारीपूर्वक काम गर्नुपर्नेमा जोड दिए ।

उनले भने, “नगरप्रहरीका सबै रेकर्ड अध्ययन गरेको छु। करार, अस्थायी वा स्थायी जे भए पनि सबै कर्मचारीको जिम्मेवारी एउटै हो। अनुशासनमा रहेर इमान्दारीपूर्वक काम गर्नुपर्छ। आगामी दिनमा अनुशासनहीनता देखाउने जोकोहीमाथि कानुनबमोजिम कारबाही हुनेछ ।”

कार्यक्रममा हाल नगरप्रहरीसम्बन्धी आएका गुनासोहरूलाई सुधार गर्दै सेवा प्रवाह प्रभावकारी बनाउन, सडक विस्तारका क्रममा आवश्यक सहजीकरण गर्न तथा आगामी गहवामाई रथयात्राको सुरक्षा व्यवस्थालाई चुस्त र प्रभावकारी बनाउन पनि नगरप्रहरीलाई निर्देशन दिइएको महानगरपालिकाले जनाएको छ ।