वीरगंज । वीरगंज महानगरपालिका–२३ प्रसौनी बिर्तास्थित छठ घाट निर्माणका लागि संकलन गरी राखिएका करिब ६० वटा बाँस तथा करिब ३ लाख रुपैयाँ बराबरको टाली चोरी भएको घटनाले स्थानीयवासी चिन्तित बनेका छन् ।
स्थानीयका अनुसार छठ पर्वको तयारीस्वरूप घाट व्यवस्थापनका लागि संकलन गरिएका बाँस र टाली अज्ञात व्यक्तिले चोरी गरेका हुन् ।
घटनाको अनुसन्धानका क्रममा वडा प्रहरी कार्यालय श्रीपुरले चोरी भएका ६० वटा बाँसमध्ये ९ वटा बाँस स्थानीय चौठीनारायण यादवको घरबाट बरामद गरेको जनाएको छ ।
यस्तै, चोरी भएको टाली लोकनारायण यादव, चौठीनारायण यादव र पृथ्वीनारायण यादवको घरमा राखिएको स्थानीयवासीले दाबी गरेका छन् । उक्त दाबीबारे प्रहरीले थप अनुसन्धान गरिरहेको जनाएको छ ।
घटनापछि स्थानीयवासीले निष्पक्ष छानबिन गरी चोरीमा संलग्न व्यक्तिहरूमाथि कानुनबमोजिम कारबाही गर्न सम्बन्धित निकायसँग माग गरेका छन् ।
वडा प्रहरी कार्यालय श्रीपुरका अनुसार घटनाबारे आवश्यक अनुसन्धान जारी रहेको छ र संलग्न व्यक्तिहरूको पहिचान गरी कानुनी प्रक्रिया अघि बढाइने जनाएको छ ।
