वीरगंज । एनआईसी एशिया बैंकका वीरगंजस्थित दुई शाखा बन्द भएपछि सेवाग्राहीहरूले दैनिक बैंकिङ सेवा लिन निकै सास्ती खेप्नुपरेको गुनासो गरेका छन् ।
बैंकले लिंकरोड र पावरहाउस शाखा बन्द गरेपछि ती शाखाका सबै सेवाग्राही मुख्य वीरगंज शाखामै पुग्न बाध्य भएका छन् । यसका कारण मुख्य शाखामा अत्यधिक भिड बढेको छ भने सामान्य कारोबारका लागि समेत घण्टौं लाइनमा बस्नुपर्ने अवस्था सिर्जना भएको सेवाग्राहीहरू बताउँछन् ।
निक्षेप जम्मा गर्न, रकम झिक्न तथा अन्य बैंकिङ सेवा लिन लामो समयसम्म पालो कुर्नुपर्ने बाध्यताले सेवाग्राहीहरू हैरान भएका छन् । पर्याप्त सेवा काउन्टर तथा वैकल्पिक व्यवस्था नहुँदा समस्या झन् बढेको उनीहरूको भनाइ छ ।
यस्तै, बैंकका एटीएम सेवासमेत प्रभावकारी रूपमा सञ्चालन नभएको गुनासो छ । पावरहाउस र लिंकरोड शाखासँगै रहेका एटीएम शाखा बन्द भएसँगै सञ्चालनमा छैनन् भने माईस्थानस्थित एटीएम पनि नियमित रूपमा सञ्चालन नहुँदा नगद झिक्न सेवाग्राहीहरूले थप सास्ती खेप्नुपरेको बताएका छन् ।
सेवाग्राहीहरूले बैंक व्यवस्थापनसँग बन्द गरिएका शाखाको विकल्पमा सहज सेवा उपलब्ध गराउन, एटीएम नियमित सञ्चालनमा ल्याउन तथा मुख्य शाखामा बढ्दो चाप व्यवस्थापनका लागि आवश्यक व्यवस्था मिलाउन माग गरेका छन् ।
