Date
मङ्ल, मंसिर १, २०८३
Tue, November 17, 2026
Home Blog Page 661

श्री जनता मावि मुडलीलाई प्लस २ बनाउन माग गर्दै ज्ञापन

0

वीरगंज । पर्साकाे कालिकामाई गाउँपालिकाकाे श्री सुकई साह माविकाे शैक्षिक अवस्था सुधारी गर्न र जनता मा.बि. मुड्लीमा प्लस २ संचालन गर्न माग गर्दै स्थानिय गैर सरकारी संस्था ब्रिलिएन्ट युवा क्लब भेडिहारीले शुक्रबार गाउँपालिका अध्यक्ष बशिष्ट कुमार गुप्तालाई ज्ञापन पत्र बुझाएकाे छ ।

कालिकामाई गाउँपालिकाको वडा नम्बर १ मा रहेकाे श्री जनता माविमा कक्षा ११ र १२ संचालन गर्न माग गर्दै ज्ञापन पत्र बुझाईएकाे क्लबका अध्यक्ष छठु साहले वताए । स्थानिय स्तर मै प्लस २ संचालन नहुँदा गरीब, दलित तथा असहाय छात्र/छात्राहरु शिक्षाबाट बंचित भएकाे अध्यक्ष साहले वताए ।

यस बर्ष हुने गाउँ सभाबाट श्री जनता मावि मुडलीमा कक्षा ११ र १२ संचालनकाे निर्णय गरी आउदाे नयाँ सेसनबाट संचालन गर्न आग्रह ज्ञापन मार्फत क्लबले आग्रह गरेकाे छ ।

यसका साथै श्री सुकई साह माध्यमिक बिधालय भेडिहारीकाे शैक्षिक स्तर खस्किदै गएकाेले त्यसलाई सुधार गरी गुणस्तरिय शिक्षा प्रदान गर्न पनि क्लबले माग गरेकाे ज्ञापन पत्र बुझाउन पुगेकाे समुहमा सहभागि अकाश चाैरसियाले वताए । बिधार्थीहरुको भविष्यलाई मध्यनजर गरी सुधार गर्न निरन्तर विद्यालयहरुकाे अनुगमन गर्नु पर्ने हामीले ज्ञापन पत्र मार्फत सुझाव समेत दिएकाे उनले जानकारी दिए ।

यस अघि ब्रिलिएन्ट युवा क्लबले श्री सुकई साह माविलाई प्लस २ बनाउन माग गर्दै विभिन्न किसिमकाे दबावमूलक आन्दाेलन नै गरेकाे थिए । त्यससपछि अहिले त्याँ प्लस २ संचालन भएकाे छ ।

सखुवा प्रसाैनी गाउँपालिकाकाे बजेट ५७ करोड ६९ लाख

0

वीरगंज । पर्साको सखुवा प्रसौनी गाँउपालिकाको नवौं गाउँ सभा शुक्रबार सम्पन्न भएको छ । गाउँ कार्यपालिकाकाे कार्यालय सखुवा प्रसाैनीमा भएकाे गाँउ सभाले शिक्षा, स्वास्थ्य र कृषिलाई प्राथमिकतामा राखेर आगामी आर्थिक वर्ष २०७९/०८० का लागि नीति, कार्यक्रम तथा बजेट प्रस्तुत गरेको छ ।

गाँउ सभामा गाँउपालिकाकी उपाध्यक्ष शर्मीला विष्टले आगामी आर्थिक वर्ष २०७९/०८० काे लागि ५७ करोड ६९ लाख २१ हजार ५ सय ७६ रुपैयाको बजेट प्रस्तुत गरेकी हुन् । आगामी आर्थिक वर्ष २०७९/०८० का लागि ल्याइएको नीति , कार्यक्रम तथा बजेटमा शिक्षा, स्वास्थ्य र कृषिलाइ प्राथकितामा राखिएको गाँउपालिका अध्यक्ष यशवन्त यादवले बताए ।

नीति तथा कार्यक्रममा गाँउपालिकाको आफनै प्रशासनिक भवन निर्माणका लागि बजेट विनियोजन गरिएको जानकारी उनले दिए ।

यस्तै बाँकी रहेका तीन वटा वडामा बर्थिङ सेन्टरको भवन निर्माण गरि सन्चालन गरिने, ज्येष्ठ नागरिक, गर्भवती र सुत्केरी महिलाका लागि नि:शुल्क एम्बुलेन्स सेवा उपलब्ध गराइने, सर्वसाधरण बिरामीका लागि भने इन्धन शुल्क मात्र लिएर एम्बुलेन्स सेवा उपलब्ध गराइने यादवले बताए ।

महुवनमा रहेको प्रसिद्ध पारसनाथ मन्दिरलाई धार्मिक तथा पर्यटकीय स्थलका रुपमा विकास गरिने, पर्सागढी नगरपालिकामा रहेको कोइलाभार मन्दिरदेखि सखुवनीया हुँदै सिद्धपुरस्थित शीवधाम मन्दिर सम्मको क्षेत्रलाई पनि धार्मिक तथा पर्यटकीय स्थलका रुपमा विकास गरिने योजनामा पनि नीति तथा कार्यक्रममा उल्लेख गरिएको गाँउपालिका प्रमुख प्रशासकिय अधिकृत देवनाथ साहले जानकारी दिए ।

गाँउपालिका भरिका एक गाँउदेखि अर्को गाँउ सम्म जोड्ने सबै सडकलाई कालोपत्रे गरिने, पालिकामा १५ शैयाको सुविधा सम्पन्न अस्पताल निर्माण गरि सन्चालनमा ल्याइने योजना पनि नीति तथा कार्यक्रममा समावेश गरिएको उनले जानकारी गराए ।

पालिकामा रहेको एउटा सामुदायिक विद्यालयमा स्नातक तह सम्मको अध्ययन अध्यापन सन्चालन गरिने र युवालाई रोजगारीका लागि विशेष कार्यक्रम ल्याइने पनि उनले बताए ।

परवानीपुर गाउँपालिकाकाे बजेट रु ४३ करोड ५४ लाख २१ हजार

0

वीरगंज । बाराकाे परवानीपुर गाउँपालिकाको १० औं गाउँ सभा शुक्रबार सम्पन्न भएको छ । परवानीपुरस्थित कृषि अनुसन्धान निर्देशनालयको सभाकक्षमा सम्पन्न सभामा आ.व. २०७९।०८० का लागि रु. ४३ करोड ५४ लाख २१ हजारको आय विवरण प्रस्तुत गरिएको थियाे ।

परवानीपुर गाउँपालिकाका प्रमुख प्रशासकीय अधिकृत मुन्ना साह रौनियारले आय विवरण प्रतिवेदन प्रस्तुत गरेका थिए ।

उनले संघीय वित्तिय समानीकरण रु. १० करोड ९१ लाख, संघीय सशर्त अनुदान चालु तर्फ रु. ९ करोड २७ लाख, संघीय सशर्त अनुदान पुजिगत तर्फ रु. १ करोड २५ लाख, संघीय सरकार समपुरक अनुदान रु. ४० लाख, संघीय सरकार विशेष अनुदान रु. ९ करोड ८० लाख, प्रदेश वित्तिय समानीकरण  रु. ७६ लाख २७ हजार, प्रदेश समपुरक अनुदान रु. २० लाख, प्रदेश विशेष अनुदान रु. ३० लाख, संघीय राजस्व बांडफांड रु ६ करोड ४४ लाख ४२ हजार, प्रदेश राजस्व बांडफांड  रु. २० लाख, आन्तरिक श्रोत अनुमानित रु. २ करोड, आ.व. २०७८।०७९ को नगद मौज्दात रु. २ करोड, प्राकृतिक श्रोतको रोयाल्टी रु. ५२ हजारको आर्थिक आय प्रतिवेदन प्रस्तुत गरेका थिए ।

गाउँपालिका अध्यक्ष रामक्षत्री प्रसाद कुर्मीको सभापतित्वमा भएको सभाकाे उद्घाटन नेकपा एमालेका पोलिटब्युरो सदस्य एवं पूर्व मन्त्री महिला नेतृ ज्वाला कुमारी साहले गरेकी थिइन । सभाकी प्रमुख अतिथी समेत रहेकी नेतृ साहले गाउँपालिकाकाे नीति, कार्यक्रम तथा बजेट राम्रो रहेको वताइन ।

उनले यसलाई सफल पार्न सके झन राम्रो हुने बताइन । सबै पक्षको सहयोग र सहकार्यबाट यसलाई सान्दार रुपमा सफल पार्न सकिन्छ भन्दै उनले ‘‘अहिले देखि नै सबैले आ–आफ्नाे ठाउँबाट काम शुरु गरि हाल्नु पर्ने वताइन । राम्रो संग काम गर्न सक्ने पालिकालाई प्रदेश र संघीय सरकारबाट थप अनुदान आउन सक्ने भएकोले यसमा विशेष ध्यान दिनुपर्ने उनले सुझाइन ।

नेतृ साहले पालिका भित्र विकास निर्माण संगै आर्थिक अवस्था कमजोर भएकाहरुको डाटा संकलन गरेर राहतका प्याकेज ल्याउनुपर्नेमा जोड दिइन । कृषि प्रधान देश भएर पनि यहांका कृषकहरु नै बढी समस्या भोग्न बाध्य भएकोले समाधान गर्न पालिका सक्नु पर्ने धारणा व्यक्त गरिन ।

कार्यक्रममा गाउँपालिका अध्यक्ष कुर्मीले प्रस्तुत भएको बजेट नीति तथा कार्यक्रमहरु उत्कृष्ट रहेकोले यसलाई सफल पार्न सबै पक्षको सहयोग र सहकार्य आवश्यक रहेको बताए । उनले गाउँ सभाबाट आएका महत्वपूर्ण राय सुझावहरुलाई आत्मसाथ गर्दै पुरा गर्ने प्रतिबद्धता ब्यक्त गरे ।

कार्यक्रममा परवानीपुर गाउँपालिकका उपाध्क्ष सुगान्धी देवी कनुईनी, नेकपा एमाले केन्द्रिय अनुशासन समितिका सदस्य एवं संविधान सभा सदस्य नेजमा खातुन, मधेश प्रदेश कमिटि सदस्यहरु सोचन प्रसाद यादव, लोसपाका जगत नारायण महतो, जसपाका संजु साह, नेकपा माओवादी केन्द्रका अजय पटेल, नेपाली कांग्रेसका लालबाबु यादव, नेकपा माओवादीका लालबहादुर पटेल लगायतकाे उपस्थिती रहेकाे थियो ।

पालिकाका स्वास्थ्य शाखा प्रमुख प्रदिप कुमार राउतको संचालन गरेकाे सभामा शिक्षा अधिकृत विध्यानन्द प्रसाद यादवले स्वागत मन्तव्य राखेका थिए । 

जगरनाथपुर गापाकाे ७ औं गाउँ सभा सम्पन्न, शिक्षालाई विशेष प्राथमिकता

0

वीरगंज । पर्साकाे जगरनाथपुर गाउँपालिकाकाे ७ औं गाउँ सभा शुक्रबार सम्पन्न भएकाे छ । गाउँपालिका अध्यक्ष श्रीकान्त प्रसाद यादवकाे अध्यक्षमा सम्पन्न गाउँ सभाले अगामी आर्थिक बर्ष २०७९/०८० काे ४९ कराेड ३२ लाख बराबरकाे नीति, कार्यक्रम तथा बजेट प्रस्तुत गरिएकाे छ ।

जसमा  शिक्षा तर्फ ११ कराेड २४ लाख, स्वास्थ्य तर्फ २ कराेड २८ लाख, कृषि तर्फ १ कराेड २६ लाख, समाजिक विकास तर्फ दुई कराेड ४१ लाख, पूर्वधार विकास तर्फ १५ कराेड २३ लाख, समाजिक सूरक्षा तर्फ ८ कराेड र चालु तर्फ ९ कराेड बजेट विनियाेजन गरिएकाे गाउँपालिकाकी उपाध्यक्ष बबिता सिंहले जानकारी गराइन ।

गाउँपालिका अध्यक्ष यादवले अगामी आर्थिक बर्षकाे नीती तथा कार्यक्रम प्रस्तुत गर्दै विद्यालयहरुमा विद्यार्थीहरुलाई ल्याउ, टिकाउ र सिकाउ अभियान संचालन गरिने वताए । साथै उनले विद्यालयलाई आपंगता तथा बालमैतृ बनाइने वताए ।

उनले भने “कक्षा १० का विद्यार्थीहरुकाे लागि अतिरिक्त कक्षा संचालन गरिने छ । एसईईमा उत्कृष्ट अंक ल्याएर उतिर्ण हुने छात्र/छात्राहरुलाई प्राेत्साहनसहित छात्रवृति प्रदान गरिने छ ।”

अध्यक्ष यादवले गाउँपालिकाबाट प्रवाह हुने सेवा मुस्कानसहित प्रदान गरिने वताए । उनले सासु, ससुरालाई राम्राेसंग स्याहार सुसार गर्ने बुहारीलाई सम्मान गरिने समेत वताए ।

उनले बिजबनिया र औंराहमा बर्थिङ सेन्टर संचालन गरिने, प्रत्येक वडाकाे स्वास्थ्य चाैकीमा एमबिबिएस डाक्टरकाे व्यवस्था गरिने र गाउँपालिकामा १५ बेडकाे अस्पताल संचालनकाे लागि संघ र प्रदेश सरकारसंग पहलन गरिने वताए ।

उनले जगरनाथपुुर गाउँपालिकालाई समृद्ध र सुखी बनाउने दिर्घकालीन उद्देश्य अनुरुप आर्थिक सामाजिकविकासको मौलिक ढाँचामा गाउँपालिका अगाडि बढि रहेको वताए ।

गाउँ कार्यपालिकाकाे कार्यालय जगरनाथपुरमा भएकाे गाउँ सभाकाे नेपाली कांग्रेस पर्साका सभापति जनार्दन सिंह क्षेत्रीले उद्घाट गरेका थिए ।

गाउँ सभा उद्घाटन सत्रमा नेपाली कांग्रेस पर्साका उप सभापति रानारायण कुर्मी, प्रवक्ता रमेश पाण्डे, काेषाध्यक्ष प्रेम थापा, क्षेत्रिय सचिव बलिष्टर अहमद, प्रमुख प्रशासकिय अधिकृत कृष्णनन्दन राय, वडाध्यक्षहरु लक्ष्मी साह तेली, नेपाली प्रसाद कुशवाहा, सुभाष कुमार यादव, प्रभुनाथ प्रसाद नुनिया, बिहारी महताे नुनिया, अयाेध्या प्रसाद कुर्मी लगायतकाे सहभागिता रहेकाे थियाे भने कार्यक्रमकाे संचालन गाउँपालिका स्वास्थ्य संयाेजक प्रबेन्द्र साहले गरेका थिए ।

वीरगंज नाकाबाट इन्धन आयातमा ७८ प्रतिशत वृद्धि

0

वीरगंज । देशकै प्रमुख व्यापारिक नाका वीरगञ्जलाई प्रयोग गरी नेपालका लागि हुने इन्धनको आयातमा उलेख्य वृद्धि भएको छ । गत आर्थिक वर्षको ११ महिनाको तुलनामा चालु आवको सोही अवधिमा वीरगञ्ज नाका प्रयोग गरी हुने इन्धन आयातमा ७८ प्रतिशतले वृद्धि भएको वीरगञ्ज भन्सार कार्यालयले जनाएको छ ।

गत आर्थिक वर्ष २०७७ । ०७८ को साउनदेखि जेठ सम्ममा वीरगञ्ज नाका प्रयोग गरी ७४ अर्ब ३४ करोड ६६ लाख मूल्य बराबरको १४ लाख १८ हजार २१७ किलोलिटर डिजेल, पेट्रोल, मट्टितेल हवाई इन्धन आयात भएको थियो । चालु आव २०७८/७९ को सोही अवधिमा वीरगञ्ज नाका प्रयोग गरी नेपालका लागि रु एक खर्ब ५३ अर्ब ३६ करोड ७ लाख मुल्यको २५ लाख ३१ हजार ६ सय ६० किलो लिटर इन्धन आयात भएको छ । यो गत आव भन्दा ७८.५१ प्रतिशत बढी इन्धन आयात हो ।

त्यस्तै, वीरगञ्ज नाकाबाट हुने खाना पकाउने एलपिजी ग्याँसको आयातमा समेत करिब ८ प्रतिशतले वृद्धी भएको छ । गत आवमा २ लाख ३९ हजार ६सय ३८ मेट्रिक टन ग्यास आयात भएकोमा चालु आवको सोही समयमा १८ हजार ५०० मेट्रिक टन बढी आर्थत २ लाख ५८ हजार १५० मेट्रिक टन बढी आयात भएको वीरगञ्ज भन्सार कार्यालयले जनाएको छ ।

नाकाबाट डिजेल, पेट्रोल, हवाई इन्धन तथा खाना पकाउने ग्यासको आयात बढेपनि मट्टितेलको आयात ३० प्रतिशतले घटेको छ । गत आवमा ११ हजार दुईसय २० किलोलिटर इन्धन आयात भएकोमा चालु आवमा ३ हजार ३ सय ६० किलोलिटर कम अर्थात सात हजार ८६० किलोलिटर आयात भएको वीरगञ्ज भन्सार कार्यालयका सूचना अधिकारी सुमित गुप्ताले जानकारी दिए ।

उनले वीरगंज नाकाबाट भित्रिएका डिजेल, पेट्रोल, मट्टितेल लगायतका इन्धन र खाना पकाउने ग्यासबाट गत आवभन्दा चालु आवमा करिब ३४ प्रतिशत बढी राजस्व सङ्कलन भएको बताए । गत आवमा रु ५४ अर्ब ५३ करोड ९२ लाख रुपैया राजश्व सङ्कलन भएकोमा चालु आवमा रु १८ अर्ब २८ करोड ३४ लाख बढी अर्थात ७२ अर्ब ८२ करोड २६ लाख रुपैया सङ्कलन भएको बताए ।

नेपालका लागि आवस्यक ७० प्रतिशत इन्धन र ८५ प्रतिशत खाना पकाउने एलपी ग्यास वीरगंज नाकाबाटै हुने गरेको छ । रासस

मेयर सिंहलाई भारतिय सांसद जयसवालले दिए बधाई

0

बीरगंज । वीरगंज महानगरपालिकाका नवनिर्वाचित मेयर राजेशमान सिंहलाई भारतको सत्तारुढ दल भारतीय जनता पार्टील (भाजपा) का बिहार प्रदेश अध्यक्ष डाक्टर सन्जय जयसवालले भेटघाट गरेका छन् ।

बिहारको बेतिया क्षेत्रका सांसद समेत रहेका जयसवालले बुधबार महानगरपालिकाको कार्यालय वीरगंज मै पुगेर मेयर सिंहलाई बधाई तथा सफल कार्यकालको शुभकामना दिएका हुन् ।

सांसद जयसवालले मेयर सिंहलाई बधाई दिनै राेटी बेटीकाे सम्बन्धलाई अझ मजबुद बनाउने गरी काम गर्न आग्रह गरे । साथै उनले आफ्नाे तर्फबाट गर्नु पर्ने सहयाेग गर्न आफू सँधै तयार रहेकाे बताए ।

मेयर सिंहले पनि भाजपाका सांसद जयसवाललाई रुद्राक्षको माला लगाएर स्वागत गर्दै धन्यवाद दिए । त्यस अवसरमा वरिष्ठ पत्रकार चन्द्रकिशोर झा, वीरगंजका उद्योगपति अशोक बैद्य लगायतको समेत उपस्थिती रहेको थियो ।

विद्युत ट्रिपिङ्गकाे सम्बन्धमा वीउवासंघद्वारा मन्त्री र निर्देशककाे ध्यानाकर्षण

0
वीरगंज । विगत लामो समयदेखि विभुत ट्रिपिङ र अघाेषित लोडसेडिङको कारण मारमा परेका उद्योगी व्यवसायीहरुको टोलीले बिहीबार उर्जा जलस्रोत तथा सिचाई मन्त्री पम्फा भूषाल र नेपाल विद्युत प्राधिकरणका कार्यकारी निर्देशक कुलमान घिसिङ्गसंग भेटघाट गरेका छन् ।
 
वीरगंज उद्योग वाणिज्य संघका अध्यक्ष डा. सुबोध कुमार गुप्ता नेतृत्वकको टोलीले बारा–पर्सा औद्यागिक करिडोरमा अवस्थित उद्योग प्रतिष्ठानहरुले करिब डेढ महिनादेखि विधुत कटौतीको कारण उत्पादनमा समस्या परेको भन्दै मन्त्री भूषाल र प्राधिकरणका कार्यकारी निर्देशक घिसिङको ध्यानाकर्षण गराएकाे हाे ।
 
वीउवासंघको टोलीले उर्जा मन्त्री भुषाललाई उँहाकै कार्यकक्षमा भेटेर सहज रुपमा विधुत आपूर्ति नहुँदा उपादनमा कटौती हुनुको साथै कच्चा पदार्थहरु नोक्सान भईरहेको भन्दै उद्योगी व्यवसायीहरु मर्कामा परेको गनासो गरेका छन् । संघका अध्यक्ष गुप्ताले उत्पादन भएर खेरो गएको विधुत निर्यात भएको कुरा सराहनिय भएपनि आफ्नै मुलुकका उपभोक्ताहरु मारमा परेको भन्दै समस्याका समाधानका लागि पहल गरिदिन आग्रह गरे ।
 
उनले अघोषीत लोडसेडिङ उद्योगीहरु आजित भएको हुँदा लोडसेडिङ गर्नु पर्ने अवस्थामा पूर्वः सूचना दिनु पर्ने बताए । उनले सरकारले विधुत खपत बढाउन र एलपी ग्यासको विल्कपमा विधुतीय चूलोको उपयोगलाई प्राथामकता दिएको छ । तर बारम्बार विधुत कटौती र लो भोल्टजका कारण विधुतीय उपकरणको प्रयोग प्रति उपभोक्ता आकर्षित हुन नसकेको पनि जिकीर गरे ।
 
यस विषयमा ऊर्जा मन्त्री पम्फा भूषालले विद्युत आपूर्तिमा देखिएको समस्याप्रति आफू गम्भिर रहेकाे बताइन् । उनले औद्योगिक फिडरहरुमा गुणस्तरीय ट्रिपिङ्ग समस्या समाधान गरेर नियमित विद्युत आपूर्ति गर्न विद्युत प्राधिकरणलाई निर्देशन दिइसकेको समेत जानकारी दिइन् ।
 
यसैगरी नेपाल विद्युत प्राधिकरणका कार्यकारी निर्देशक कुलमान घिसिङ्गले बजेट अभावको कारण प्राधिकरणका परियोजनाहरुले तीव्रता लिन नसकेको बताए । बारा–पर्सा क्षेत्रमै प्राधिकरणबाट ५० अर्बको लागतमा विद्युत सम्बन्धी परियोजनाको काम शुरु हुने पनि उनले जानकारी गराए ।
 
ध्यानाकर्षण गराउन पुगेकाे टाेलीमा वीरगञ्ज उद्योग वाणिज्य संघका उपाध्यक्षद्वय हरि गौतम, माधव राजपाल, महासचिव मनोजकुमार दास, सचिव आशीष लाठ, सह कोषाध्यक्ष प्रेमचन्द्र गोयल लगायतको उपस्थिती रहेको थियो ।

पर्सामा बिन्दबासिनी गाउँपालिका यश बर्षको गाउँ सभा गर्नमा पहिलो

0

वीरगंज । पर्साको बिन्दबासिनी गाउँपालिकाको ११ औं गाउँ सभामा आर्थिक बर्ष २०७९/०८० काे निति तथा कार्यक्रम बिहिबार प्रस्तुत गरिएकाे छ ।

गाउँ कार्यपालिकाकाे कार्यालय बहुअर्वा भाठामा सुरु भएकाे गाउँ सभामा गाउँपालिका अध्यक्ष प्रमाेद तिवारीले नीति तथा कार्यक्रम प्रस्तुत गरेका थिए । अध्यक्ष तिवारीले गाउँपालिकाकाे निति तथा कार्यकम प्रस्तुत गर्दै आफ्नाे गाउँपालिका आफै बनाउकाे मुल निति अबिलम्बन गरिने वताए ।

उनले गाउँपालिकाकाे नियमित प्रशासनिक कार्यलाई मुस्कानसहितकाे प्रवाह गरिने वताए । कृषि क्षेत्रलाई गाउँपालिकाकाे उत्पादनकाे प्रमुख क्षेत्रकाे रुपमा विकास गरिने अध्यक्ष तिवारीले वताए । एक वडा एक उत्पादन कार्यक्रम मार्फत राेजगारीकाे समेत श्रृजना गरिने उनले वताए ।

गाउँपालिकाका प्रमुख प्रशासकीय अधिकृत राजु साहले कार्यक्रममा आएको सलाह, सुझावलाई समेटेर गाउँपलिकालाई सबै भन्दा उत्कृष्ट बनाउने प्रतबद्धता जनाए । उनले खुल्ला रुपमा गाउँ सभा गर्दा गाउँपालिका निति तथा कार्यक्रममा अपनत्व बढने वताए । गाउँ सभाले दिएकाे सेलिङकाे आधारमा टाेल टाेलमा गएर याेजना छनाैट गर्न वडाध्यक्षहरुलाई अधिकृत साहले सुझाव समेत दिए ।

गाउँ सभाले गाउँपालिकाकाे २९ कराेड ५० लाख बराबरकाे बजेट सेलिङ समेत निर्धारण गरेकाे छ । साे बराबरकाे गाउँ सभाले कार्यक्रम तथा या्ेजनाहरु निर्धाण गर्ने जनाइएकाे छ ।

गाउँ सभामा वडा नं. १ का वडाध्यक्ष अक्षयलाल महतो, वडा नं. २ का वडाध्यक्ष मुक्तिनाथ प्रसाद कुर्मी, वडा नं. ३ का वडाध्यक्ष जय प्रकाश चौरसिया, वडा नं. ४ का वडाध्यक्ष अनोज चौरसिया, वडा नं. ५ का वडाध्यक्ष मोहन राउत अहीर, कार्यपालिका सदस्य मान्ती देवी, कुसमी कुमारी देवी, धनपति तत्मीन, रिमा कुमारी देवी, अशोक कुमार गुप्ता, शम्भु प्रसाद बरै, वडा सदस्यहरु, कर्मचारी लगायतहरुको उपस्थिती रहेको थियो भने कार्यक्रमको सहजीकरण रामप्रवेश साहले गरेका थिए ।

मूल्य बृद्धिको विरोधमा वीरगञ्जमा अनेरास्ववियुको प्रदर्शन

0

वीरगंज । पेट्रोलियम पदार्थसँगै खाद्य पदार्थमा भएको मूल्य बृद्धि विरुद्ध अनेरास्ववियु पर्साले वीरगञ्जमा प्रदर्शन गरेको छ । नेकपा एमाले निकट भातृ संगठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) ले मूल्य बृद्धिको विरुद्धमा वीरगञ्जको ठाकुरराम बहुमुखी क्याम्पसको मुल गेटमा प्रदर्शन गरेको हो ।

अरमान हस्मीको अध्यक्षतामा भएको विरोध प्रदर्शनलाई सम्बोधन गर्दै अनेरास्ववियु वीरगञ्ज महानगर समितिका अध्यक्ष आशिफ अहमदले मूल्यबृद्धि गरेर जनताको ढाड सेक्ने कार्य कदापी सह्य नहुने बताए । उत्पादन र निर्यातलाई बढाउनतर्फ प्रेरित हुनुपर्नेमा मूल्य बढाएर आयातलाई नै थप प्रश्रय दिएको अध्यक्ष अहमदले आरोप लगाए । यथाशिघ्र मूल्य बृद्धि फिर्ता लिएर जनताको दैनिकीलाई सहज बनाउनुपर्ने अहमदको भनाई थियाे ।

प्रदर्शनमा सहभागीहरुले ‘मुल्य बृद्धि फिर्ता गर, सेरे तेरो पाराले, दुख पाए साराले, नेकपा एमाले जिन्दावाद, नाफा घाटा जान्दैनौ, मुल्य बृद्धि मान्दैनौ, निकम्मा सरकार मुर्दावाद’ लगायतका नारा लेखिएको प्ले कार्ड बोकेका थिए ।

विरोध प्रदर्शनमा अनिश अन्सारी, राष्ट्रिय युवा संघ नेपालका जिल्ला सदस्य दाउद अलि, महानगर कमिटीका तुफैर अन्सारी, ओबिसिका केन्द्रिय सदस्य राजन साह, शयाम रौनियार, पुकार सुवेदी लगायतको सहभागिता रहेको अनेरास्ववियु वीरगञ्ज महानगर कमिटीका सचिव भक्ती अग्रवालले जानकारी दिए ।

प्रेस मंच पर्सा शाखा विस्तार गर्न समन्वय समिति गठन

0

वीरगंज । पर्सा जिल्लामा प्रेस मंच नेपालको संगठन विस्तार गर्न समन्वय समिति गठन गरिएको छ । विभिन्न संचारमाध्यममा कार्यरत पत्रकारहरुलाई गोलबद्ध गराउँदै उनीहरुको क्षमता अभिबृद्धि गराउने उद्धेश्यका साथ समिति विस्तार गर्न लागिएको वताइएकाे छ ।

मंचका केन्द्रीय उपाध्यक्ष विरेन्द्र साहको संयोजकत्वमा ५ सदस्यीय समन्वय समिति गठन भएको हाे । जुन समितिका सनी महतो, आविद हुसेन, दिपेन्द्र चौधरी, बलिराम यादव रहेका छन् ।

समितिले प्रेस मंचमा आवद्ध हुन चाहने सबैलाई समेटेर भेला आयोजना गरी जिल्ला कार्यसमिति पुनः गठन गर्ने नर्णय गरेको छ । साथै सदस्यता थप गर्न अभियान चलाउने निर्णय पनि गरेको छ ।

बुधबारको बैठकले मंचको कार्यालय वीरगञ्ज ३ छपकैयाँमा संचालन गर्ने निर्णयका साथै जिल्लामा जसपाबाट निर्वाचित जनप्रतिनिधिलाई सम्मान गर्ने निर्णय पनि गरेको छ ।

मंचकाे बैठकमा किरण सत्याल, प्रेमचन्द्र सर्राफ, बलिराम यादव, त्रिलोकीनाथ यादव, अब्दुल कैस, संजय प्रसाद कुशवाहा, राकेश चौरसिया, जाकिर हुसेन, पिंकी सर्राफ लगायतको सहभागिता रहेको थियो ।