Date
सोम, कार्तिक ३०, २०८३
Mon, November 16, 2026
Home Blog Page 511

कर्पोरेट बैंक र क्लासिक होटल हटाउने कार्यकाे सर्वोच्चद्वारा सदर

0

वीरगंज । वीरगंज महानगरपालिकाले मुख्य नालामाथि निर्माण गरेको संरचना हटाउने कामलाई सर्वोच्च अदालतले सदर गरेको छ ।

मुख्य नालामाथि निर्माण गरेर वर्षौँदेखि उपभोग गर्दै आएको कर्पोरेट डेभलपमेन्ट बैंक र क्लासिक होटल रहेको संरचना महानगरले हटाएको कामलाई सर्वोच्चले सदर गरेको हाे ।

संरचना हटाउन नदिन भन्दै कर्पोरेट डेभलपमेन्ट बैंक रहेको भवनका धनी पवन कुमार गुप्ता र अनिल कुमार गुप्ताले दायर गरेको रिटमा सर्वोच्चले अन्तरिम आदेश दिन अस्विकार गरिदिएको छ ।

बिहीबार सुनुवाई गर्दै सर्वोच्च अदालतको ६ नं. इजलासका न्यायाधिशद्वय प्रकास कुमार ढुंगाना र डा. कुमार चुडालको संयुक्त इजलासले अन्तरिम आदेश दिन अस्विकार गरेका हुन् ।

अदालतले गएको साउन ११ गते अल्पकालिन अन्तरिम आदेश दिँदै संरचना हटाउने काम यथावत राख्न भनेको थियो ।

अल्पकालिन आदेशलाई निरन्तरता दिन सर्वोच्चले अस्विकार गरेसँगै महानगरले थालेको काम जायज रहेको पुष्टि भएको छ । महानगरले दुबै भवन गएको साउनको पहिलो साता हटाएको थियो ।

सिम्रौनगढका तत्कालीन प्रमुख प्रशासकीय अधिकृतसहित १० जनाविरुद्ध भ्रष्टाचार मुद्दा

0

वीरगंज । अख्तियार दुरुपयोग अनुसन्धान आयोगले बाराको सिम्राैनगढ नगरपालिका प्रमुख प्रशासकीय अधिकृत, लेखा अधिकृत, इन्जिनियरसहित १० जनाविरुद्ध भ्रष्टाचार मुद्दा दायर गरेको छ ।

आयोगले गैरकानूनी लाभ तथा हानी पुर्याई भ्रष्टाचार गरेको आरोपमा नगरपालिकाका तत्कालीन निमित्त प्रमुख प्रशासकीय अधिकृत वीरेन्द्रप्रसाद साह, लेखा अधिकृत सर्मेन्द्रप्रसाद चौधरी, इन्जिनियर सुरेश कुमार यादव, सव–इन्जिनियर उपेन्द्र कुशवाहा र उपभोक्ता समितिका अध्यक्षसमेत १० जनाविरुद्ध विशेष अदालतमा मुद्दा दायर गरेको हो ।

तत्कालीन निमित्त प्रमुख प्रशासकीय अधिकृत साह, लेखा अधिकृत चौधरी, इन्जिनियर यादव र सव–इन्जिनियर कुशवाहाले सिम्रौनगढ नगरपालिकाका वडा नम्बर तीनमा सामुदायिक भवन निर्माण कार्य र त्यसै वडाको नयकाटोलमा बर्थिङ्ग सेन्टर निर्माण कार्यमा सम्झौता विपरीत निर्माण स्थलमा भएको परिमाणको झुट्टा बिल भरपाई बनाएको अख्तियारको भनाई छ ।

यस्तै नगरपालिकासँग गरेको सम्झौताको शर्त पालना नगरी नभए नगरेको कार्यसमेत भए गरेको भनी मूल्याङ्कन गरी गराई भुक्तानीका लागि पेश भएको नापी किताब, बिल र कार्य सम्पन्न प्रतिवेदन बमोजिम ३७ लाख, ९३ हजार, तीन सय ९२ रुपैयाँ स्वीकृत एवं भुक्तानी दिएको आयोगका सहसचिव एवम प्रवक्ता भोला दाहालले जानकारी दिए ।

उनका अनुसार अधिकृत साह, चौधरी, यादव र कुशवाहालाई ३७ लाख ९३ हजार ३९२ रुपैयाँ बिगो कायम गरी भ्रष्टाचार निवारण ऐन, २०५९ को दफा ८ को उपदफा एक बमोजिम कैद र जरिवाना हुन मागदाबी गर्दै विशेष अदालत काठमाडौँमा मुद्दा दायर गरिएको छ ।

यसैगरी सामुदायिक भवन निर्माण उपभोक्ता समितिका अध्यक्ष सिकेन्द्र प्रसाद यादव, सचिव विजय कुमार यादव, कोषाध्यक्ष कविता देवीलाई रु.१९ लाख ७ हजार ५ सय ३२ र बर्थिङ्ग सेन्टर निर्माण उपभोक्ता समितिका अध्यक्ष रामलोचन साह कानु, सचिव छठु गिरी र कोषाध्यक्ष अनिता देवीलाई रु.१८ लाख २५ हजार ८ सय ६० रुपैयाँ बिगो कायम गरी भ्रष्टाचार निवारण ऐन, २०५९ को दफा ८ को उपदफा (४) बमोजिमको सजाय हुन मागदाबी लिई आरोप-पत्र दायर गरिएको छ । 

नगरपालिकाले मधेश प्रदेश सरकारको अनुदानबाट आर्थिक बर्ष २०७७–०७८ मा सञ्चालित योजनामा रकम निकासा गरी योजना सञ्चालन एवं सम्पन्न नगराई रकम हिनामिना तथा भ्रष्टाचारजन्य कार्य गरेको संसदीय अनुगमन विशेष समिति मधेश प्रदेशको प्रतिवेदनबारे अख्तियारमा उजुरी परेको थियो ।

वीरगंजका मालपाेत अधिकृतसहित ६ जना विरुद्ध भ्रष्टाचार मुद्दा

0

वीरगंज । मालपोत कार्यालय, वीरगंजका मालपोत अधिकृत हरिनारायण मिश्रसहित ६ जना उपर राजस्व चुहावट गरी भ्रष्टाचार गरेको सम्बन्धी आरोप-पत्र दायर भएकाे छ ।

अख्तियार दुरुपयाेग अनुसन्धान आयाेगले मालपोत अधिकृत हरिनारायण मिश्र, सनद कुमार द्वीवेदी ब्रह्मण, चन्द्रबहादुर भण्डारी, कम्प्युटर अधिकृत कमोद तिवारी, ना.सु. रामेश्वर प्रसाद साह र लेखनाथ भट्टराई विरुद्ध आराेप पत्र दायर गरेकाे हाे ।

मालपोत कार्यालय, वीरगंजको रजिष्ट्रेशन फाँट क) र ग) बाट मिति २०७३।०४।०२ गतेका दिन रजिष्ट्रेशन पास गर्दा लिखतहरुमा घरबाटो सिफारिस विना न्यूनतम मूल्याङ्‍कनभन्दा कम मूल्य राखी राजस्व हिनामिना हुने गरी ब्यक्तिगत लाभ लिई लिखत पारित गरेको भन्ने उजुरी निवेदन सम्बन्धमा अनुसन्धान हुँदा कसुर गरेको देखिन आएकोले मुद्दा दायर गरिएकाे अख्तियार दुरुपयाेग अनुसन्धान आयाेगले जनाएकाे छ ।

फाँट “क” बाट १७ वटा र  फाँट “ग” बाट २ वटा लिखतहरु पारित गर्दा लाग्ने राजस्व निर्धारण गर्दा आफूले पूरा गर्नुपर्ने तोकिएको दायित्व र जिम्मेवारी पूरा नगरी बदनियतपूर्वक गरेको कार्यबाट रु.४ लाख २५ हजार ५ सय ३१ राजस्व चुहावट भएको देखिँदा निजहरु उपर भ्रष्टाचार निवारण ऐन, २०५९ को दफा ७ मा उल्लेख भएबमोजिम सोही ऐनको दफा ३ बमोजिमको कसुर गरेको देखिन आएकोले मुद्दा दायर गरिएकाे आयाेगका प्रवक्ता भाेला दाहालले जानकारी दिए ।

मुदा दायर भएका ६ जना मध्ये रामेश्वर प्रसाद साहलाई ७ लाख ५१ हजार ८०९ रुपैया ९० पैसा जरिवाना, कमोद तिवारीलाई २३ हजार ४९५ रुपैया ५० पैसा,चन्द्र बहादुर भण्डारीलाई चार लाख ७८ हजार ८०८,लेखनाथ भट्टराईलाई ३९ हजार ५७ रुपैया ५० पैसा, हरिनारायण मिश्रलाई ६१ ह्जार २४३ रुपैया ७६ पैसा र प्रतिबादी सनद कुमार द्वीवेदी ब्रह्मणलाई दुई लाख २७ जहार ५५६ रुपैया ४० पैसा जरिवाना हुन मागदावी लिईएको आयाेगका प्रवक्ता दाहालले बताए ।

भ्रष्टाचार निवारण ऐन, २०५९ को दफा ७ मा उल्लेख भए बमोजिम सोही ऐनको दफा ३ बमोजिमको कसुर गरेको देखिन आएकोले सोही ऐनको दफा ३(घ) बमोजिम कैद गरी सोही ऐनको दफा ७ बमोजिम विगोको दोब्वर जरिवाना हुने माग दाबी सहित आयाेगले विशेष अदालत, काठमाडौंमा आरोप-पत्र दायर प्रवक्ता दहालद्वारा जारि विज्ञप्तीमा उल्लेख छ । 

वीरगंजमा खुल्यो रूबिक रेस्टुराँ, मेयर सिंहले गरे उद्घाटन

0

वीरगंज । वीरगंजमा सुविधा सम्पन्न क्याफे, लाउन्ज तथा बार रूबिक रेस्टुराँ सञ्चालनमा आएको छ । माइस्थानदेखि महावीरस्थान जानेबाटमा बाया तर्फ अवस्थित रूबिक रेस्टुराँ बुधबारदेखि सञ्चालनमा आएको हो ।

रूबिक रेस्टुराँको वीरगंजका मेयर राजेशमान सिंहले उद्घाटन गरेका छन् । स्थानीय युवा व्यवसायीहरूको झन्डै अढाई करोड रुपैयाँको लागतमा सञ्चालनमा आएको रेस्टुराँको मेयर सिंह लगायतका अतिथिहरूले रिबन काटेर उद्घाटन गरेका थिए ।

उद्घाटन पश्चात् सञ्चारकर्मीहरूसँग कुराकानी गर्दै मेयर सिंहले वर्तमान समयमा युवाहरू वैदेशिक रोजगार तर्फ आकर्षित भइरहेको बेला स्थानीय युवाहरूले जोखिम मोलेर नेपालमै केही गर्नुपर्ने भन्ने सोचका साथ रेस्टुराँ सञ्चालन ल्याएकोमा खुसी व्यक्त गरे । रेस्टुराँले गुणस्तरीय सेवासहित स्वादिलो परिकार उपलब्ध गराउने विश्वास व्यक्त गर्दै उनले विभिन्न ठाउँबाट धार्मिक तथा व्यावसायिक कामले वीरगञ्ज आउने पर्यटकहरूको लागि एउटा गन्तव्यका रूपमा रूबिक रेस्टुराँ पनि थपिएको बताए ।

वीरगंजमा नयाँ व्यवसाय तथा उद्यम गर्ने युवाहरूलाई सहयोग गर्न महानगर सधैँ तयार रहेको बताउँदै उनले भने, ‘युवा उद्यमीहरूलाई चाहिएको प्रत्येक सहयोग महानगरबाट उपलब्ध गराउन म तयार छु । प्रस्ताव ल्याउनुस्, हामी सहकार्य गर्छौँ ।’ वीरगञ्जमा प्रत्येक महिनाको अन्तिम शुक्रवार र शनिवार लगाइने रात्रि बजारले पनि रेस्टुराँ सञ्चालकहरूलाई सहयोग पुगिरहेको दाबी गर्दै उनले भविष्यमा रात्रि बजारलाई दैनिक बनाउने आफ्नो योजना रहेको पनि उनले सुनाए ।

स्थानीय युवा व्यवसायीहरू विजय साह कानु, दिनेश प्रधान र सञ्जय श्रीवास्तवको संयुक्त लगानीमा सञ्चालनमा आएको रूबिक रेस्टुराँमा एकै पटक सय जनासम्म अटाउने ठाउँ रहेको छ । दुई भागमा बाँडिएको रेस्टुराँमा परिवारका सदस्यहरूसँग जान मिल्ने किसिमको नो-स्मोकिङ् र छुट्टै बार रहेको छ । 

वीरगञ्जमा रहेका अन्य रेस्टुराँको तुलनामा रूबिकको सजावट पनि नयाँ र फरक रहेको दाबी गर्दै सञ्चालक विजय साह कानुले भने, ‘हाम्रो युएसपी भनेको सेवा र स्वाद हो । वीरगंज बसेर दुई दशकभन्दा पनि बढी लामो समयसम्म काम गरेका सेफ हामीसँग हुनुहुन्छ,  उहाँले स्थानीयहरूको स्वादलाई बुझ्नु हुन्छ ।’ ग्राहकलाई दिने सेवामा पनि तुलनात्मक रूपमा आफूहरू अरूभन्दा गुणस्तरीय रहेको उनले बताए ।

रेस्टुराँले उद्घाटन भएको अवसरमा शनिवारसम्म बिलमा १० प्रतिशतसम्म छुट दिइरहेको कानुले जानकारी दिए ।

अग्रवालसहित दुई जनाकाे नागरिकता रद्द गर्ने निर्णय

0

वीरगंज । सरकारले वंशजका आधारमा झूटो विवरण पेस गरी लिइएका दुई जनाको नागरिकता रद्द गर्ने निर्णय गरेको छ  । जिल्ला प्रशासन कार्यालय पर्साबाट वंशजका आधारमा नागरिकता लिएका अमन चौधरी अग्रवाल र कास्कीबाट सोफिया रुथ भण्डारीको नागरिकता रद्द गर्ने निर्णय गरिएकाे हाे ।

हिजो मंगलबार बसेको मन्त्रिपरिषद् बैठकको निर्णय सार्वजनिक गर्दै सरकारका प्रवक्ता रेखा शर्माले, जिल्ला प्रशासन कार्यालयमा, झुटो विवरण पेस गरी पर्साबाट वंशजका आधारमा नागरिकता लिएका अग्रवाल र कास्कीबाट भण्डारीको नागरिकता रद्द गर्ने निर्णय जानकारी दिइन् । 

उनले भनिन्, ‘गृह मन्त्रालयको प्रस्तावमा अमन चौधरी (अग्रवाल) ले झूटो विवरण पेस गरी जिल्ला प्रशासन पर्साबाट २०७७ कात्तिक २५ गते नागरिकता प्राप्त गरेको वंशजको आधारको नेपाली नागरिकता रद्द गरी निजलाई नेपाली नागरिकबाट हटाउँने र संलग्नलाई सोही कारबाही गर्ने निर्णय गरेको छ ।

यस्तै, जिल्ला प्रशासन कार्यालय, कास्कीबाट सोफिया रुथ भण्डारीले लिएको वंशजको नागरिकता पनि मन्त्रिपरिषदले रद्द गरेको छ ।’

ठाकुर रामलाई व्यवस्थित बनाउन महानगर तयार छ : मेयर सिंह

0

वीरगंज । वीरगंज महानगरपालिकाका मेयर राजेशमान सिंहले यहाँ स्थित ठाकुरराम बहुमुखी क्याम्पसलाई यस क्षेत्रकै गौरबको रुपमा कायम राखिरहन सरोकारवाला सबै एक हुनु पर्ने बताएका छन् ।

बुधबार बिहान क्याम्पसले आयोजना गरेको भेटघाट तथा छलफल कार्यक्रममा मेयर सिंहले क्याम्पसको गौरबलाई यथावत राख्न पठन पाठनलाई स्तरीय बनाउन जरुरी रहेको बताए ।

क्याम्पसको भौतिक संरचना मर्मत तथा निर्माणका लागि महानगर लगानी गर्न तयार रहेको भन्दै उनले त्यसका लागि क्याम्पस प्रशासनले आवश्यक योजना ल्याउन आग्रह गरे ।

‘महानगर लगानी गर्न तयार छ, तर त्यसको सदुपयोग हुनु पर्यो,’ उनले भने, ‘निर्माण गरिएका संरचना दुरुपयोग हुने, तोडफोड हुने जस्ता अराजनीतिक व्यवहार हुँदैन भन्ने ठोस प्रतिबद्धता ल्याउनुस् महानगर सँधै तयार छ ।’

कार्यक्रममा नवनियुक्त क्याम्पस प्रमुख रञ्जित प्रसाद यादबले आफूहरु क्याम्पसको शैक्षिक वातावरण चुस्त बनाउन लागिरहेको भन्दै त्यसका लागि महानगरको साथ अपरिहार्य रहेको बताए ।

उनले क्याम्पसका सबै प्राध्यापकहरु एक जुट भएर यहाँको शैक्षिक वातावरण सुधार्न प्रतिबद्ध रहेको भन्दै त्यसका लागि यहाँ अध्ययन गर्ने विद्यार्थी एवं सबै राजनीतिक दल तथा सरोकारवालाहरुको सकारात्मक साथ खोजेको बताए ।

पूर्व क्याम्पस प्रमुख ललन द्विवेदीले ६० वर्ष भन्दा पुरानो विल्डिङमा अहिले क्याम्पस चलिरहेको भन्दै संरचना निर्माणमा केन्द्रबाट सहयोग हुने नदेखिएकाले महानगरको साथ खोज्नु परेको बताए । उनले भने, ‘वीरगंजलाई नै सफा सुन्दर बनाउने अभियानमा मेयर हिँडिरहेकाेले वीरगंज कै अधिकांस विद्यार्थीले अध्ययन गर्ने थलो र यहाँले नै पहिले अध्ययन गर्नुभएको धरोहरलाई विशेष ध्यान दिनुहुनेछ भन्ने विश्वास लिएको छु ।’

कार्यक्रममा सहायक क्याम्पस प्रमुख अनिल रमण, बिनोद प्रसाद साह, गीता श्रेष्ठ,  प्रध्यापक संघका डा.प्रमोद कुमार कुशवाहा, कर्मचारी संघका किशोरी चौधरी लगायतको सहभागिता रहेको थियो ।

लागु औषध सेवन गरेर कर्मचारीमाथि कुटपिट, कारवाहीकाे माग

0

वीरगंज । पर्साको जगरनाथपुर गाउँपालिका कर्मचारी माथि कुटपिट भएकाे छ । कर्मचारी दुर्व्यवहार तथा कुटपिट गर्ने उपर कारवाहीकाे माग गर्दै कर्मचारीहरु मंगलबार जिल्ला प्रशासन कार्यालय पर्सामा ज्ञापन पत्र बुझाएका छन ।

गाउँपालिकाको वडा नं–४ का जैनुल्लाह मियाँ, भुलावन मियाँ, ताहिर हुसेन मियाँ मन्सुरीले लागु औषधको सेवान गरि मात्तिएर आइतबार कर्मचारीमाथि हातपात गरेका थिए ।

आइतबार गाउँपाल‍िका कार्यालयमा आफ्नाे काममा ब्यस्त कर्मचारीहरुलाई नशाामा धुत भएर गुणदागर्दीशैलीमा पुगेका तीनै जनाकाे समुहले कुटपीट गरेको प्रत्यक्षदर्शीले बताएका छन । उनीहरुले गुण्डागर्दी शैलीमा कार्यालय मै पुगी योजना शाखा प्रमुख पिंकु राम, उद्यम बिकास शाखाका रमेश शाही, सव इन्जिनियर प्रमोद राम, पशु शाखा प्रमुख असहद आलम गद्दीलाई दुर्व्यवहार गर्नुकाे साथै गालीगलाैज गर्दै कुटपीट समेत गरेका हुन ।

कर्मचारीहरुले दोषीलाई कारवाही गर्न माग गर्दै पर्साका सहायक प्रमुख जिल्ला अधिकारी भिमकान्त पाैडेललाई ज्ञापन पत्र बुझाएका हुन् । कर्मचारीहरुले २ दिन भित्र कारवाही नगरिए गाउँपालिकाको अत्यावश्यक सेवा बाहेक सबै कामकाज ठप्प पार्ने चेतावनी समेत दिएका छन ।  

डर, त्रासकाे बतावरणमा कर्मचारीलाई काम गर्ने मनोवल हुँदैन, उनीहरुले सुरक्षीत वतावरणमा काम गर्न पाउने वतावरणको प्रत्याभूती गर्न माग समेत गरेका छन् ।  

कार्यालयले साउन २१ गते राष्ट्रिय परिचयपत्र सम्बन्धी काम नहुने सूचना प्रकाशीत गरेको थियो । तर राष्ट्रिय परिचय पत्रको काम नगरिदिएको निहुमा कर्मचारीमाथि कुटपीट गरिएको भन्दै गाउँपालिकाका कर्मचारीहरुले घटनाको निन्दा गर्दै दाेषी उपर कारवाहीकाे माग गरेका हुन् । २१ गते परिचयपत्रको काम नहुने सूचना पूर्व प्रकाशित थियो ।

कामै भएको भएपनि वडा नं. ४ को पालो त्यो दिन थिएन एक कर्मचारीले भने “हामी माथिको आक्रमण गुण्डागर्दीको चरम नमुना हो ”। कर्मचारी माथिको आक्रमण एउटा कुरा हो तर आक्रमणकारी कानूनी दण्डको दायरामा नआउनुले त्रासको वतावरण बन्दै गएको कर्मचारीको भनाई छ ।

 कर्मचारीहरुले घटना हुने बित्तिकै पाण्डेपुर प्रहरी चौकीलाई घटनाको बारेमा जानकारी गराएका थिए । त्यसपछि ठाडो उजुरी समेत दिएका कर्मचारीहरु प्रहरीले दाेषी पक्राउ नगरेपछि निराश भएका छन् ।

सीमा क्षेत्रमा बसेर अनधिकृत कारोवारको आर्थिक नजराना बुझेर बस्ने प्रहरीको प्रथामिकतामा कर्मचारीहरुको गुनासो नपर्नु नौलो कुरा त भएन तर राष्ट्रसेवक कर्मचारीहरुको लागि समेत काम नलाग्ने प्रहरी जनताको लागि काम लाग्छ त भन्ने प्रश्न पनि संगै उठेको छ ।

राउन्ड टेबलकाे एक लाख वृक्षा रोपण गर्ने अभियान सम्पन्न

0

वीरगंज । देशभरमा एक लाख वृक्षा रोपण गर्ने उद्देश्यका साथ सुरु भएको राउन्ड टेबल नेपालको अभियान आइतबार सम्पन्न भएको छ । 

जलवायु परिवर्तनबाट पर्यावरणलाई जोगाउनुका साथै प्रदूषण नियन्त्रण र रुखको महत्त्व बारे जागरूकता फैलाउने उद्देश्यका साथ राउन्ड टेबल नेपालले सुरु गरेको अभियान सम्पन्न भएको हो । अभियानका क्रममा राउन्ड टेबल नेपालले लक्ष्यभन्दा पनि बढी झन्डै १ लाख ८९ हजार वृक्षहरू वितरण गरेको छ ।

आइबार पर्साको पोखरिया नगरपालिकामा संस्थाले आयोजना गरेको कार्यक्रममा मेयरलगायतका जनप्रतिनिधिलाई ४० हजार वटा वृक्ष हस्तान्तरण गर्दै कार्यक्रम सम्पन्न भएको थियो ।

समापन कार्यक्रममा बोल्दै प्रमुख अतिथि समेत रहेका मधेस सरकारका वन तथा वातावरण मन्त्री रमेश प्रसाद कुर्मीले पछिल्लो समय प्रदेशमा देखिएको पानीको हाहाकारले बोटबिरुवाको महत्त्व बारे थप सचेत गराएको बताए । चुरे दोहन, अनियन्त्रित वन विनाश र सहरीकरणले गर्दा पानीको हाहाकार निम्त्याएको बताउँदै उनले समाधानका लागि बढीभन्दा बढी रुखहरू रोप्नु पर्ने सुझाव दिए ।

राउन्ड टेबल नेपालले लिएको एक लाख वृक्ष रोपण गर्ने महत्त्वाकाङ्क्षी लक्ष्यमा सफलता प्राप्त गरेकोमा संस्थाका प्रतिनिधिहरूलाई धन्यवाद दिँदै उनले आगामी दिनमा यसलाई निरन्तरता दिन पनि मन्त्री कुर्मीले आग्रह गरे । ‘के गर्नु पर्छ प्रदेश सरकारबाट हामीले गर्छौँ, तपाईँहरूले हामीलाई भन्नुपर्‍यो । कहाँ के आवश्यकता छ । वन तथा वातावरण मन्त्रालयले सम्भव भएसम्म सहयोग गर्नेछ । तर यस्तो राम्रो अभियान रोकिनु भएन,’ उनले भने ।

पर्सा निर्वाचन क्षेत्र नम्बर २ (ख) का प्रदेशसभा सदस्य समेत रहेका कुर्मीले वृक्षारोपणसम्म सीमित नहुन सुझाव दिँदै त्यसको संरक्षण तर्फ ध्यान दिन पनि आग्रह गरे । उनले भने, ‘वृक्षारोपण गरेर मात्र हुँदैन त्यसलाई हुर्काउने, संरक्षण तर्फ पनि हामीले ध्यान दिनुपर्छ । यसको लागि सबैको संयुक्त प्रयास चाहिन्छ । प्रदेश सरकारको तर्फबाट ट्री गार्ड उपलब्ध गराउने जिम्मा म लिन्छु, स्थानीय सरकारले यसलाई जोगाउने जिम्मा लिनुपर्‍यो ।’

त्यस्तै कार्यक्रममा बोल्दै राउन्ड टेबल नेपालका पूर्व राष्ट्रिय अध्यक्ष एवम् ४१ वनर्स क्लबका राष्ट्रिय अध्यक्ष मनोज कुमार दासले पनि वृक्षारोपण जस्तो महत्त्वपूर्ण काम गरेकोमा राउन्ड टेबल नेपाल प्रति आभार प्रकट गरे । जलवायु परिवर्तन, प्रदूषण र ग्रिन हाउस ग्याँस उत्सर्जनका कारण सङ्कट तर्फ अघि बढिरहेको संसारलाई जोगाउन वृक्षारोपणले ठूलो भूमिका खेल्ने बताउँदै उनले अन्य सङ्घ संस्थाहरूलाई पनि राउन्ड टेबलबाट पाठ सिक्नुपर्ने धारणा राखे ।

यस्तै राउन्ड टेबल नेपालका अध्यक्ष राहुल अग्रवालले वृक्षारोपण मार्फत मान्छेले प्रकृतिलाई प्रयोग गरेर उठाएको फाइदा बापत ऋण तिर्न सक्ने बताए ।  उनले भने, ‘एक अध्ययनअनुसार एउटा मान्छेले जीवनभरमा विभिन्न कामका लागि पाँच वटा रुख प्रयोग गर्छ तर एउटा पनि रोप्दैन, रोपे पनि हुर्काउँदैन । वृक्षारोपण हाम्रो लागि प्रकृतिबाट लिइएको ऋण फिर्ता गर्ने एउटा उपाय हो । पाँच वटाको सट्टा हामीले २० वटा रुख रोप्दै त्यसलाई हुर्काएर ऋण चुक्ता गर्नुपर्छ ।’ 

३५ औँ वार्षिकोत्सवको अवसरमा राउन्ड टेबल नेपालले लिएको एक लाख वृक्ष रोप्ने लक्ष्यभन्दा पनि बढी प्राप्त गर्न सहयोग गर्ने संस्थाका सदस्य र सहयोगी सङ्घ संस्थाहरूलाई पनि उनले धन्यवाद दिए । उनले आगामी दिनमा पनि संस्थाले सबैसँग यसै प्रकारको सहयोगको अपेक्षा गरेको बताए । 

त्यस्तै कार्यक्रममा बोल्दै पोखरिया नगरपालिकाका मेयर प्रद्युम्न चौहानले राउन्ड टेबल नेपाल मार्फत प्राप्त भएको सम्पूर्ण वृक्षहरूलाई रोप्नेदेखि त्यसको संरक्षण नगरपालिकाले गर्ने प्रतिबद्धता व्यक्त गरे । उनले नगरपालिकाले एउटा वृक्ष रोपण भनेर छुट्टै शाखा नै स्थापना गरेर अभियान मार्फत प्राप्त गरेका बिरुवाहरूलाई रोप्नेदेखि संरक्षण गर्ने बताए । मेयर चौहानले पोखरिया नगरपालिका जिल्लाको केन्द्रका रूपमा विकसित हुँदै गएको बताउँदै यसलाई व्यवस्थित गर्न सडकको दुवै तर्फ वृक्षहरू रोपिने जानकारी पनि दिए ।

मेयर चौहानकै अध्यक्षतामा सम्पन्न कार्यक्रममा उपमेयर रूबी कुमारी ठाकुर, संविधानसभा सदस्य रामेश्वर प्रसाद रौनियार, राउन्ड टेबल नेपाल एसिया प्यासिफिक रिजनका अध्यक्ष सौरभ केडिया, पोखरिया नगरपालिकाका प्रमुख प्रशासकीय अधिकृत देवेन्द्र सापकोटा, लोकतान्त्रिक समाजवादी पार्टी नेपालका केन्द्रीय सदस्य नेजामुदिन समानी, नेकपा एमाले पोखरिया नगर कमिटीका अध्यक्ष विधाञ्चल ठाकुर, पूर्व गाविस अध्यक्ष जोगेन्द्र प्रसाद कुर्मी, विभिन्न वडाका वडाध्यक्ष, कार्यपालिका सदस्य, राउन्ड टेबल नेपालका सदस्यलगायतको सहभागिता रहेको थियो ।

रोटर्‍याक्ट क्लबकाे पदस्थापन तथा सम्मान कार्यक्रम सम्पन्न

0

वीरगंज । रोटर्‍याक्ट क्लब अफ वीरगंज मेट्रोपोसिलसको सातौँ पदस्थापन तथा सम्मान कार्यक्रम सम्पन्न भएको छ । आगामी वर्षका २०२३/२४ का लागि रेशु अग्रवालको नेतृत्वमा नयाँ कार्यसमिति चयन गर्दै क्लबको पदस्थापन तथा सम्मान कार्यक्रम सम्पन्न भएको हो ।

अग्रवालको नेतृत्वमा गठित नयाँ कार्यसमितिको उपाध्यक्षमा दिपु वर्णवाल र रोहित गुप्ता, सचिवमा रामबिनय यादव, सह-सचिवमा अञ्जली गार्ग र पुष्पा गुप्ता, कोषाध्यक्षमा रौनक तुल्सयान, सह-कोषाध्यक्षमा आनन्द साह, सदस्यमा शेख अजरुदीन, आभा मण्डल, प्रकृति ठाकुर, सलोनी रौनियारलगायतका रहेका छन् ।

त्यस्तै क्लबको सर्भिस डाइरेक्टरमा राधिका दारुका, कम्युनिटी सर्भिस डाइरेक्टरमा रिङ्की सर्राफ, प्रोफेसनल सर्भिस डाइरेक्टरमा कुसुम गुप्ता, इन्टरनेशनल सर्भिस डाइरेक्टरमा बिना प्रजापति र सर्जेन्ट एट आमर्समा प्रतिभा चौधरी चयन भएका छन् ।

वीरगञ्जस्थित मकालु होटेलमा सम्पन्न कार्यक्रममा अध्यक्ष अग्रवालसहित सम्पूर्ण पदाधिकारी तथा सदस्यहरूलाई पदस्थापन गरिएको थियो । नयाँ कार्यसमितिकी अध्यक्ष अग्रवाललाई प्रमुख अतिथिसमेत रहेका रोटरी डिस्ट्रिक्ट ३२९२ को सहायक गभर्नर शशी रञ्जन कलवारले शपथ ग्रहण गराएका थिए भने अध्यक्ष अग्रवालले क्लबका पदाधिकारी र हरि गोपाल श्रेष्ठले अन्य सदस्यहरूलाई शपथ ग्रहण गराएका थिए ।

शपथ ग्रहण पश्चात् कार्यक्रमलाई सम्बोधन गर्दै नवनियुक्त अध्यक्ष अग्रवालले आगामी वर्ष २०२३/२४ मा रोटर्‍याक्ट क्लब वीरगञ्ज मेट्रोपोलिसले सामाजिक र रचनात्मक कार्यलाई प्राथमिकता दिने बताइन ।

त्यसै गरी कार्यक्रममा वर्ष २०२२ /२३ का अध्यक्ष रबिनले श्रेष्ठले आफ्नो कार्यकालमा गरेका गतिविधिका बारेमा प्रतिवेदन प्रस्तुत गर्नुका साथै विभिन्न क्षेत्रबाट संस्थालाई सहयोग गर्ने पदाधिकारीहरू प्रति आभार प्रकट गरेका थिए ।

क्लबमा रहेर विभिन्न क्षेत्रमा सहयोग पुर्‍याउने व्यक्तिहरूलाई पनि उनले सम्मानित गरेका थिए । सम्मानित हुनेमा दिपु वर्णवाल, रोहित गुप्ता, रामविनय यादव, अञ्जली गार्ग, रौनक तुल्स्यान, आन्नद साह, रेशु अग्रवाल, राधिका दारुका, बिना प्रजापती, प्रकाश कुमर कर्ण, अमित सर्मा, प्रतिभा चौधरी, आलोक कुमार ठाकुर, रिङ्की सर्राफ, कुसुम गप्ता, सलोनी रौनियार, मधु प्रजापति र निकीता उपाध्याय रहेका छन् ।

यसैगरी रोटर्‍याक्ट अफ द इयर २०२२/२३ को उपाधिबाट रामविनय यादव सम्मानित भएका थिए ।

कार्यक्रममा रोटरी क्लब अफ वीरगंज मेट्रोपोसिलसका अध्यक्ष रोटेरियन हरी गोपाल श्रेष्ठ, मुकेश मित्तल, राजकिसोर कुमार, रोटर्‍याक्ट युनाईटेड वीरगंज, रोटर्‍याक्ट वीरगंज तथा रोटर्‍याक्ट सिमरा बारा, इन्टेरेक्ट क्लब अफ गौतम सेकेन्डरी स्कूल र इन्टेरेक्ट क्लब अफ डिएभी सेकेन्डरी स्कुलका प्रतिनिधिहरूको पनि उपस्थिति रहेको थियो ।

खेलकुद पत्रकार महासंघ पर्साको नाम संशोधन, महासंघकाे ठाउँमा मंच रहने

0

वीरगंज । नेपाल खेलकुद पत्रकार महासंघ पर्सा शाखाको प्रथम बैठक आइतबार सम्पन्न भएको छ । नेपाल पत्रकार महासंघ पर्सा शाखाको सभाकक्षमा खेलकुद पत्रकार महासंघको प्रथम बैठक सम्पन्न भएको हो ।

नेपाल खेलकुद पत्रकार महासंघ पर्सा शाखाका अध्यक्ष तिवारी यादवको अध्यक्ष्तामा बसेको बैठकले विभिन्न तीन महत्वपुर्ण निर्णय गरेको महासंघका सचिव श्याम कुशवाहाले जानकारी दिए । उनका अनुसार नेपाल खेलकुद पत्रकार महासंघ पर्साको नाम संशोधन गरी नेपाल खेलकुद पत्रकार मन्च पर्सा राख्ने निर्णय गरेको हो ।

यस्तै अगामी एक महिना भित्र एउटा खेलकुद प्रतियोगीता गर्ने र अगामी २ महिना भित्र प्रथम जिल्ला अधिवेशन गरीने निर्णय भएको उनले बताए ।

बैठकमा नेपाल खेलकुद पत्रकार महासंघ पर्सा शाखाकी उपाध्यक्ष सुष्मा शर्मा, सचिव श्याम कुशवाहा, कोषाध्यक्ष सन्तोष पटेल, सदस्य अर्जुन गुप्ता सहितका सदस्यहरुको सहभागीता रहेको थियो ।