Date
सोम, कार्तिक ३०, २०८३
Mon, November 16, 2026
Home Blog Page 492

परवानीपुरमा रास्वपाकाे परिचात्मक कार्यक्रम सम्पन्न

0

वीरगंज । वीरगंज महानगरपालिकाकाे वडा नं. २१ परवानीपुरमा शनिबार राष्ट्रिय स्वतन्त्र पार्टी (रास्वपा) काे संगठन विस्तार तथा परिचात्म कार्यक्रम सम्पन्न भएकाे छ ।

कार्यक्रममा वाेल्दै रास्वपाका नेता महादेव कुर्मीले नयाँ साेचका साथ अगाडी बढन र राजनीतिमा रहेकाे वकृति हटाउन रास्वपमा गाेलबन्द हुन आग्रह गरे । उनले रास्वपा नयाँ पार्टी रहेकाे र यसकाे उद्देश्य देश बनाउन रहेकाेले सबै युवाहरु रास्वपामा लागेर भ्रष्टाचार विरुद्ध अवाज उठाउनु पर्ने आवश्यक रहेकाे धारणा राखे ।

कार्यक्रममा रास्वपाका मुर्ली जलान, साेयब अन्सारी सहित स्थानिय युवाहरुकाे सहभागिता रहेकाे थियाे । कार्यक्रममा पार्टीकाे संगठन विस्तार बारे समेत छलफल भएकाे थियाे । 

परवानीपुर गाउँपालिका र वडा कार्यालय दुई सिफ्टमा सञ्चाल हुँदै

0

वीरगंज । बाराको परवानीपुर गाउँपालिकाले कार्यालयहरू दुई सिफ्टमा सञ्चालन गर्ने जनाएको छ ।

एउटा सूचना जारी गर्दै प्रमुख प्रशासकीय अधिकृत मुन्ना रौनियारले गाउँ कार्यपालिकाको कार्यालयको राष्ट्रिय परिचयपत्र, प्रशासन, योजना, पञ्जीकरण दर्ता चलानी शाखा र वडा नम्बर १ देखि ५ सम्मका कार्यालयहरू दुई सिफ्टमा सञ्चालन हुने जनाएका छन् ।

कार्यालयहरु असोज १८ गतेदेखि हप्ताको २ दिन आइतबार र सोमबार बिहान ७ बजेदेखि १० बजेसम्म र १० बजे देखि ५ बजेसम्म गरी दुई सिफ्टमा सञ्चालन हुने रौनियारले जानकारी दिएका हुन् ।

दिउँसोको समयमा अन्यत्र काम गर्ने सेवाग्राहीहरूलाई छुट्टी लिएर आउनुपर्ने बाध्यता अन्त्य गर्दै दुई दिनका लागि भए पनि दुई सिफ्टमा कार्यालय सञ्चालन गर्न थालिएको रौनियारले बताए ।

‘यस्तो गर्दा दिउँसो अफिसमा काम गर्नेहरूलाई धेरै सहज भएको छ,’ उनले भने, ‘सेवाग्राहीहरूको सबै काम पनि हुन्छ र उहाँहरूलाई आफ्नो अफिसबाट छुटी पनि लिनुपर्दैन ।’

दुई सिफ्टको सेवा दैनिक ज्यालादारी, मजदुरी र उद्योगमा कामदारका रूपमा काम गर्नेहरूलाई पनि फलदायी भएको उनको दाबी छ ।  यसरी सेवाग्राहीहरु बिहान कार्यालयमा सेवा लिएर दिउँसो आफ्नो काममा जान सक्ने उनको भनाई छ । ‘यसरी गर्दा सेवाग्राहीको चाँप पनि घटेको छ,’ उनले भने ।

पर्साबाट गएकाे अबैध सामान सहितकाे ट्रक बारामा पक्राउ

0

वीरगंज । पर्साबाट गएकाे अबैध सामान सहितकाे ट्रक बारामा पक्राउ परेकाे छ ।

बिशेष सूचनाको आधारमा खटिएको प्रहरी टोलीले विरगंजबाट झापा तर्फ जादै गरेको ना.३.ख.१४३ नम्बरकाे ट्रकलाई बाराकाे जितपुरसिमरा उपमहानगरपालिका वडा नं. १ पथलैयाबाट नियन्त्रण लिएकाे हाे ।

शुक्रबार राति २२:३० बजेको समयमा पथलैया चोकमा ट्रकलाई रोकी चेक जाँच गर्दा बिल विजक भन्दा बढी र सामानहरुको श्रोत खुलाउन नसकेको भेटिएकाेले नियन्त्रणमा लिइएकाे जिल्ला प्रहरी कार्यालय बाराका सुचना अधिकारी एवम् प्रहरी नायब उपरिक्षक (डिएसपी) दधिराम न्याैपानेले जानकारी दिए ।

२८ लाख ५० हजार ३ सय तिरसठ्ठी रुपैया बराबरको खुद्रा सामानहरु सहित ट्रक नियन्त्रणमा लिई आवश्यक कानूनी प्रकृया अगाडि बढाईएको डिएसपी न्याैपानेले प्रेस विज्ञप्ती मार्फत जानकारी गराएका छन् ।

सरकार संवेदनशील र गम्भीर हुनुपर्छ : सांसद यादव

0

वीरगंज । जनता समाजवादी पार्टी (जसपा) नेपालका प्रमुख सचेतक प्रदीप यादवले स्वार्थ समूह हावी हुँदा मन्त्रिपरिषदकाे बैठकबाट पारित शिक्षा विधेयकमा संसद पुग्दासम्म हेरफेर भएको आरोप लगाएका छन् ।

शुक्रबार बसेको प्रतिनिधिसभा बैठकमा विद्यालय शिक्षा विधेयक, २०८० माथि आफ्नो विचार राख्दै पूर्व वन तथा वातावरण मन्त्रीसमेत रहेका यादवले यस्तो आरोप लगाएका हुन् । 

उनले स्वार्थ समूहको हस्तक्षेपका कारण मन्त्रिपरिषद् बैठकले पारित गरेर छलफलका निमित्त संसदमा पठाएको विधेयकमा हेरफेर भएको आरोप लगाउँदै सरकारलाई संवेदनशील हुन् आग्रह समेत गरे ।

पर्सा निर्वाचन क्षेत्र नम्बर १ का प्रतिनिधिसभा सदस्यसमेत रहेका यादवले भने, ‘स्वयम् प्रधानमन्त्रीज्यूले मन्त्रिपरिषदबाट पारित भएर पठाएको विधेयक संसदसम्म पुग्दा हेरफेर भएको स्वीकार गर्नुभएको छ । यसको मतलब हाम्रो कानूनमाथि स्वार्थ समूहको कहीं कब्जा त छैन ? कहीं स्वार्थ समूहले यो सबै कानुन बनाइरहेको त छैन ? कुनै ठूलो षड्यन्त्रकरीहरूको हात त छैन ? यो सबै कुरामा सरकार संवेदनशील र गम्भीर हुनुपर्दछ ।’

शिक्षा मन्त्रालयले रायका निमित्त कानुन मन्त्रालयमा शिक्षा विधेयक पठाएको बेला स्वार्थ समूहले हेरफेर गरेको हुनसक्ने उनले आशंका व्यक्त गरे । ‘मन्त्रीज्यूले विधेयक तयार गर्नुहुन्छ । अनि रायका लागि त्यसलाई कानुन मन्त्रलायमा पठाइन्छ । कानुन मन्त्रलायले रायसमेत पठाउँछ तर त्यसमा हेरफेर गर्न पाउँदैन । तर कहीं कानुन मन्त्रालयमा गडबडी भयो की ? त्यसकारण यसलाई हेर्नुपर्छ,’ उनले भने ।

यादवले शिक्षा विधेयक एकदमै संवेदनशील विषय भएको बताउँदै यसलाई बनाउँदा पनि संवेदनशीलता अपनाउनु पर्ने सुझाव दिए । उनले विधेयकमा रहेको १५ औँ परिच्छेदलाई पुर्नलेखन गर्नुपर्ने आवश्यकता औँल्याए । उनले भने, ‘विधेयकको पन्ध्रौँ परिच्छेदलाई झट्ट हेर्दा यसको पुर्नलेखनको आवश्यकता छ । यसमा ब्यापक हेरफेर र संसोधन गर्न जरुरी रहेको मैले महुसुस गरेको छु ।’

उनले विधेयकले निजी विद्यालयलाई पालेर सामुदायिकलाई विस्थापन गर्ने ल्याइएको आरोप लगाउँदै प्रश्न गरे, ‘झट्ट हेर्दा विधेयक कहीं निजी विद्यालय पाल्नको लागी त आएको होइन ? सामुदायिक लाई विस्थापन गर्नको लागि त आएको होइन ? जस्तो मैले त्यसमा महसुस गरेको छु ।’

विधेयक बन्दै गर्दा निजी विद्यालयले गरेको एक दिनको आन्दोलनमा सरकारले उनीहरूसँग सम्झौता गर्दा पनि सामुदायिक विद्यालयका शिक्षकहरू काठमाडौँ केन्द्रीत आन्दोलन गर्दा उनीहरूमाथि बल प्रयोग गर्नुले सरकारको नियतमाथि शङ्का उत्पन्न भएको उनले बताए । उनले विधेयक बनाउनु पूर्व शिक्षकहरूसँग छलफल समेत नगरेकोमा पनि आपत्ति जनाए ।

यादवले वर्षौँदेखि संसद्मा आउन नसकेको विधयेकलाई शिक्षा मन्त्री अशोक राईले संसद प्रवेश गराएकोमा धन्यवाद पनि दिए ।

ब्युटिपार्लर संचालन गर्दै आएकी छपकैयाकी पुनमकाे हत्या

0
मृतक पुनम देवी र उनी बस्दै आएकी वीरगंजकाे छपकैयामा रहेकाे घर । तस्बिर : कालिका टाईम्स

वीरगंज । वीरगंज महानगरपालिकाकाे वडा नम्बर १ छपकैयामा एक महिलाकाे हत्या भएकाे छ । स्थानिय गगनदेव साहकाे ४० बर्षिय श्रीमति पुनम देवीकाे टाउकाेमा घरेलु हतियार प्रहार गरी हत्या भएको हाे ।

स्थानियका अनुसार शुक्रवार बिहान टाउँकोबाट रगत बगिरहेको अवस्थामा अचेत भेटिएकी पुनमलाई सुरुमा उपाचारकाे लागि वीरगंजस्थित नारायणी अस्पतालमा लगिएकाे थियाे ।

त्यहाँ उपचार हुन नसकेपछि उनलाई थप उपचारकाे लागि नेशनल मेडिकल कलेजमा लगियाे । यद्यपि त्यहाँ चिकित्सकहरूले उनलाई मृत घोषणा गरि दिए ।

पुनकाे शव पोस्टमार्टमका लागि नारायणी अस्पतालमा राखिएकाे छ । प्रहरीले घटना बारे अनुसन्धान थालेकाे छ । टाउकोमा घरेलु हतियारले हानेर पुनमलाई अचेत बनाएकाे हुन सक्ने प्रहरीकाे प्रारम्भिक अनुसन्धान छ । प्रहरी स्राेतका अनुसार मृतक पुनमको टाउँकोमा ४/५ ठाउँमा गम्भीर चोट लागेको देखिएकाे छ ।

जिउतियाकाे दिन विहान ब्रतालु महिलाहरुले दहि जिउरा (सरगही) खाने चलन छ । त्यस कै लागि शुक्रबार विहान अन्दाजी ४ बजेकाे समयमा पडाेसी बहिनीले मृतकलाई फाेन गरेर जगाउँन खाेज्दा फाेन उठिरहेकाे थिएन् ।

त्यसपछि ति पडाेसी बहिनीले मृतक पुनमकाे घर मै पुग्दा घरकाे मुल गेटमा अगाडी चुकुल लगाइएकाे थियाे । घरकाे चुकुल खाेलेर भित्र पस्दा मृतक पुनम सुत्ने काेठामा पनि अगाडीबाट नै चुकुल लगाइएकाे थियाे । साे घरकाे चुकुल खाेल्दा अचेत अवस्थामा भेटिएकी मृतक पुनमकाे ‘टाउँकोबाट रगत बगिरहेको देख्दा उनी कराउन थालिन ।

उनको हल्लापछि नजिकै रहेका घरबाट अन्य आफन्तहरु पनि घटनास्थलमा पुगे । आफन्तहरुले देख्दा उनी जिउँदै थिइन् । त्यसपछि उनको उपचारका लागि अस्पताल लगेका पुर्याएका थिए । 

वीरगंजकाे छपकैया मै ब्युटिपार्लर संचालन गर्दै आएकी मृतक पुनम घरमा एक्लै बस्दै आएकी थिइन् । पुनमको श्रीमान भारतको ग्वालियरमा राेजगारीकाे शिलसिलामा बस्दै आएका छन् । उनको एक छोरा र एक छोरी छन् । छोरीको विहे भइसकेको छ भने छोरा पढाइको सिलसिलामा भारतकै दिल्लीमा छन् ।

पर्सा प्रहरीका प्रवक्ता एवम् प्रहरी नायब उपरिक्षक (डिएसपी) कुमार बिक्रम थापाले घटना बारे अनुसन्धान भइरहेकाे वताए ।

जिउतियाकाे अवसरमा पर्साका विद्यालयहरुमा विदा

0

वीरगंज । जिउतिया पर्वकाे अवसरमा वीरगंज महानगरपालिका सहित पालिकाहरुले विद्यालमा शुक्रबार विदा दिएको छ ।

वीरगंज महमनगरपालिकाकाे कार्यालयले बिहीबार एक सुचना जारी गरेर जिउतिया पर्वकाे अवसरमा आज शुक्रबार महानगरमा रहेका सामुदायिक तथा संस्थागत विद्यालयहरुमा विदा दिइएको जनाएको छ ।

प्रमुख प्रशासकीय अधिकृत लक्ष्मीप्रसाद पाैडेलले जारी गरेकाे सुचनामा शुक्रबारका दिन वीरगंजमा रहेका सबै विद्यालयमा विदा दिने निर्णय गरिएको उल्लेख छ।

यसैगरी पर्सा कै पोखरिया नगरपालिकाले पनि सबै विद्यालयहरुमा जिउतिया पर्वकाे विदा दिएकाे छ ।

नगरपालिकाले बिहिबार एक सुचना जारी गर्दै महिलाहरुको महान जितिया पर्वकाे नगरपालिका अन्तर्गतका सम्पुर्ण विद्यालयहरु शुक्रबार विदा दिने निर्दै भएकाे जनाएकाे छ । नगरपालिकाका निमित प्रमुख प्रशासकिय अधिकृत अजय कुमार श्रीवास्तवद्वारा जारि सुचनामा जिउतिया पर्वकाे अवसरमा शुक्रबार विदा दिइएकाे उल्लेख छ ।

यसैगरी पर्सा कै कालिकामाई गाउँपालिकाले पनि विद्यालयहरुमा जिउतियाकाे विदा दिएकाे छ ।

गाउँपालिकाकाे शिक्षा शाखा प्रमुख हिमांशु भट्टले बिहिबार एक सुचना जारी गर्दै गाउँपालिका अन्तर्गतका सम्पूर्ण विद्यालयमा शुक्रबार महिलाहरुमाे महान पर्व जिउतियाकाे बिदा रहने जनाएका छन् ।

यसैगरी पर्सा कै पकहाँ मैनपुर गाउँपालिकाले शुक्रवार विद्यालयहरुमा विदा दिएकाे छ ।

 प्रमुख प्रशासकिय अधिकृत राज कुशवाहाले विहिबार एक सूचना जारि गर्दै जिउतिया पर्वकाे अवसरमा शुक्रबार सवै सामुदायिक विद्यालयहरुमा विदा दिने निर्णय भएको जनाएका छन् ।

यसैगरी पर्साका अन्या पालिकाहरुले पनि शुक्रबार विद्यालयहरुमा जिउतिया पर्वकाे विदा दिएका छन् 

संसद विगठनकाे पराकम्पनहरु अहिले पनि कायमै छ : नेता खनाल

0

वीरगंज । नेकपा एकिकृत समाजवादी पार्टीका सम्मानित नेता एवम् पूर्व प्रधानमन्त्री झलनाथ खनालले देशमा नयाँ संविधान बनेको एक दशक पुग्न लागेको एवं पुँजीवादी जनवादी क्रान्ति सम्पन्न भएको १८ बर्ष पुगको भएपनि जनताको जनअपेक्षा अनुसार काम गर्न नसकीएको बताएका छन् ।

समाजवादी जागरण अभियान अन्तर्गत वीरगंजमा आयाेजित कार्यक्रमलाई सम्बाेधन गर्दै नेता खनालले देशमा अस्थिरता, महगी, भ्रष्टाचार, आर्थिकमन्दी मात्र नभई राजनितिक अस्थिरता पनि कायम रहेको हुँदा जनताको शक्ति, परिवर्तनको शक्ति, समाजवादको शक्ति र प्रगतिशिल शिक्ति एक भएर समाजवाद प्राप्तीको लागि नयाँ शक्तिको निर्माण गर्नु पर्ने वताएका हुन् ।

सदनको विगठनलाई राजनितिक भुकम्प भएको चर्चा गर्दै उनले त्यसको पराकम्पनहरु अहिले पनि आई रहेको बताए । त्यसबाट देशलाई मुक्त गर्न सबै समाजवादी शक्ति एकजुट भएर आगाडी बढनु पर्नेमा खनालले जोड दिए ।

त्यसैगरी पार्टीकी उपाध्यक्ष जयन्ती राईले सबै महिलाहरु चुला चौकाबाट र मेकअपबाट माथी उठेर राजनितिक एवं आर्थिक रुपमा अगाडी आउनु पर्ने बताइन् । उनले महिलाहरु अगाडी आए मात्र समाजवादको यात्रा सहज हुने कुरामा जोड दिइन् ।

नेकपा (एकिकृत समाजवादी) पार्टी पर्साका अध्यक्ष बालगोपाल थापाको अध्यक्षता भएको कार्यक्रममा स्वागत मन्यतव्य पार्टीका वीरगंज महानगर कमिटी अध्यक्ष मनोज चौधरीले गरेका थिए भने कार्यक्रमकाे संचालन प्रचार विभाग सदस्य बृजलाल पासवानले गरेका थिए ।

कार्यक्रममा पार्टीका केन्द्रिय उपमहासचिव बिजय पौडेल, सचिव नागेन्द्र चौधरी, पोलिटव्युरो सदस्य चिरञ्जवी अचार्य, रामचन्द्र साह लगायतको उपस्थिती रहेको थियो ।

पार्टीले शुरु गरेको मेची महाकाली समाजवादी जागरण अभियान बिहिवार पर्सामा पुगेको छ। यात्रामा सहभागी नेताहरुलाई नेकपा (एकिकृत समाजवादी) पार्टी पर्साका नेता तथा कार्यकर्ताहरु वीरगंजमा स्वागत गरेका छन् ।

पूर्वराजा ज्ञानेन्द्रको पछिल्लो गतिविधी प्रति सरकारले निगरानी गरोस् : प्रदीप यादव

0

वीरगंज । जनता समाजवादी पार्टी (जसपा) नेपालका प्रमुख सचेतक प्रदीप यादवले मधेसमा पछिल्लो समययता धाार्मिक सद्भाव बिथोल्न भइरहेका उच्छृंखल गतिविधीप्रति सरकारको गम्भिर ध्यानाकर्षण गराएका छन् ।

बिहीबार प्रतिनिधी सभाको बैठकमा बोल्दै पूर्वमन्त्री समेत रहेका यादवले धार्मिक तनाव बढाउनुको पछाडि पूर्वराजा ज्ञानेन्द्र शाहको हात रहेको आशंका व्यक्तपनि गरे । उनले भने,‘अहिले आफुलाई राजावादी भन्नेहरू हौसिएका छन। किन ? । कतै आगो लगाएर न्यानो ताप्ने योजना त छैन यिनीहरूको ? ।’

पर्सा क्षेत्र नम्बर १ का प्रतिनिधी सभा सदस्य (सांसद) समेत रहेका यादवले पुर्वराजा ज्ञानेन्द्र शाहको लोकतन्त्र विरोधी गतिविधिको निगरानी गर्न सरकारसंग मागपनि गरे ।

मधेस जहिल्यै पनि गणतन्त्र र संघीयताका लागि लडेको भन्दै यादवले भने,‘ तर अहिले मधेसमा एउटा कुनै शक्तिले षडयन्त्रको तानाबाना बुनेर धार्मिक तनाव गराउने खेल खेलिरहेको छ ।’

मधेसको राजनीतिक शक्ति भनेकै हिन्दू र मुस्लिमबिचको साझा एकता रहेको भन्दै यादवले तर अहिले धार्मिक द्वन्द्व फैलाएर मधेसी जनताबिचको एकतालाई तोडने षडयन्त्र भईरहेको बताए ।

उनले धार्मिक द्वन्द्ध चर्काउने, हिंसाका लागि उक्साउने, सामाजिक सद्भाव भडकाउने अभिव्यक्ति दिने महन्थ वा मौलवी जोसुकै भएपनि उनिहरुलाई कानूनी कारबाहीको दायरामा ल्याउन सरकारसंग माग गरे ।

समाजमा द्वन्द्ध र हिंसा फैलाउन उक्साउने व्यक्ति वा समुहको फेसबुक र टिकटक आइडी सरकारलले तुरुन्त बन्द गर्नुपर्नेमा जोड दिए ।

यादवले भने,‘ सोसल मिडियामा उत्तेजक सामग्री राख्ने , पुराना भिडियोलाई तोडडमोड गरी ताजा घटनाका रूपमा प्रस्तुत गर्ने,अर्काको धर्म वा धर्मावलंम्बीलाई अपमान गर्ने, गाली गलौज गर्ने, हिंसा फैलाउन झूठा, मनगढ़ंत कुरा राख्नेहरूको तुरन्त पहिचान गरि दण्डित गर्नपर्छ । उनिहरुको फÞेसबुक र टिकटक आईडी सरकारले तुरून्तै बन्द गर्नुपर्छ ।

विद्यार्थीहरुलाई थुन्ने कार्यकाे विद्यार्थी संगठनद्वारा भर्त्सना

0

वीरगंज । बीरगंज महानगरपालिकाकाे वडा नं. २४ स्थित रहेको श्री शारदा माद्यमिक विद्यालय बहुअरी सुगौलीका विद्यार्थीहरुले पठनपाठन नियमित सञ्चालन हुनु पर्ने अवाज उठाउदा थुन्ने, कुटने र थुनामा पठाउन लगाउने कार्य भइरहेकाे आराेप लागेकाे छ ।

अखिल नेपाल राष्ट्रिय स्वतन्त्र विद्यार्थी युनियन वीरगंज महानगर कमिटीले एक प्रेस विज्ञप्ती जारी गर्दै विद्यार्थीहरुले आफ्नाे अधिकारकाे लागि अवाज उठाउदा थुन्ने, कुटने र थुनामा पठाउन लगाउने कार्य  गैर जिम्मेवार कार्य भएकाे वताउँदै भर्त्सना समेत गरेकाे छ । 

संगठनका अध्यक्ष आशिफ अहमदले प्रेस विज्ञप्ती जारी गर्दै शारदा मावि विगत केही महिनादेखी अस्त व्यस्त हुँदै गएको जनाएकाे छ । संगठनले विज्ञप्ती मार्फत विद्यालयमा नियमित कक्षा संचालन नहुने, पुरै समय र समयमा कक्षा संचालन नहुने भएकोले वीरगंज महानगरपालिकाकाे शिक्षा महाशाखालाई पटक पटक जानकारी गराउँदा पनी कुनै चासो नदेखाएकाे आराेप समेत लगाएकाे छ ।

 

मधेश प्रदेशको एक मात्र वीरगंज महानगरपालिकामा रहेकाे प्राविधिक विषय पढाई हुने सामुदायिक सारदा माविमा कक्षा ११ र १२ लगायत प्राविधिक तर्फका शिक्षक छैनन्, नियमित कक्षा संचालन हुँदैन प्रअ विद्यालयमा बस्दैनन्, शिक्षक समयमा नआउने गरेकाे जारी विज्ञप्तीमा उल्लेख गरिएकाे छ । विद्यार्थीहरुले सो समस्या बारे अवगत गराउँदा पनि शिक्षा महाशाखामा कुनै कदम नचालनु गैर जिम्मेवार कार्य भएकाे संगठनकाे भनाई छ ।

दुई दिन पहिला मात्र विद्यालयमा विद्यार्थीहरु नियमित कक्षा सञ्चालनको माग गरेपछि थुनामा परेको घटना बाहिरिएकाे थियाे ।

विद्यालयको पशु विज्ञान र कृषि सङ्कायको कक्षा सञ्चालन गर्न माग गरेपछि विद्यार्थीलाई त्यही विद्यालयका शिक्षकहरुले थुनेर राखेको घटना सार्वजनिक भएको थियाे । पठनपाठन नियमित सञ्चालन गर्न माग गरेपछि विद्यालय प्रशासनले आफूहरुलाई कुटपिट गर्नाका साथै घन्टौँ थुनेर राखेको विद्यार्थीहरुले आरोप लगाएका थिए ।

दैनिक सात घण्टी पढाइ हुनुपर्नेमा एक घण्टीसमेत पढाइ नभएको जानकारी महानगरपालिकाको शिक्षा महाशाखामा गराउँदा समेत कुनै सुनुवाइ नभएको विद्यार्थीहरुले गुनासो छ । विद्यालय प्रशासनले आफूहरुबाट सबै शुल्क असुल गरे पनि अहिलेसम्म पूरै किताबसमेत उपलब्ध नगराएका कारण दोस्रो वर्षको पहिलो सेमेस्टर परिक्षामा ११ मध्ये एकजना मात्र उत्तीर्ण भएको विद्यार्थीहरु बताउँछन् ।

यस विषयमा बुझ्न विद्यालयका प्रअ विनाेद मेहतासंग फाेनमा सम्पर्क गर्न खाेज्दा फाेन नउठेका कारण सम्पर्क हुन सकेन ।

महानगरपालिकाको शिक्षा महाशाखा प्रमुख अरविन्दलाल कर्णले भने विद्यालयमा अध्यापन गराउने शिक्षकले तलब नपाएका कारण पढाइ नभएकोे जानकारी दिए । उनले शिक्षकको सबै तलब समयमै पठाएको विद्यलायको प्रतिवेदनबाट देखिएपछि घटनाको छानबिन शुरु गरिएको बताए ।

पत्रकारिता निष्पक्ष हुनुपर्छ : अध्यक्ष डा. अर्याल

0

भरतपुर । अनौपचारिक क्षेत्र सेवा केन्द्र (इन्सेक) का अध्यक्ष डा. कुन्दन अर्यालले पत्रकारिता निष्पक्ष हुनुपर्ने बताएका छन् ।

इन्सेक बागमती प्रदेशको आयोजनामा बुधबार भरतपुरमा आयोजना भएको मानव अधिकार सम्वद्धनमा नागरिक समाज तथा सञ्चारकर्मीको भूमिका विषयक कार्यक्रममा बोल्दै अध्यक्ष डा. अर्यालले आर्थिक र राजनीतिक प्रभावका कारण पत्रकारिता क्षेत्र व्यवसायिक हुनबाट चुकिरहेको बताए ।

‘आर्थिक र राजनीतिक प्रभावले गर्दा पत्रकारिता स्वतन्त्र हुन सकेको छैन, पत्रकारले सत्यको खोजी गर्नु पर्नेमा मुल धर्मबाट विमुख भइरहेको छ’, अध्यक्ष डा. अर्यालले भने ।

पत्रकारसँग समाजको उच्च भरोसा र विश्वास रहेको उल्लेख गर्दै डा. अर्यालले तमाम वेथितिलाई सही ठाउँमा ल्याउन पहल कदमी चाल्ने पत्रकारिता अहिले निष्पक्ष र स्वतन्त्र हुन नसकेको बताए ।

उनले मानव अधिकारको संरक्षण, प्रवद्धन र सम्वद्धनमा पत्रकारको भूमिका महत्वपूर्ण हुने भन्दै मानव अधिकारको विषय बदलिँदो परिवेससँग फरक फरक रहेको बताए ।

राज्य पक्षले नागरिकको न्यूनतम मानव अधिकारको रक्षा गर्न नसकेको अवस्थामा सञ्चार क्षेत्रबाट नागरिकले अपेक्षा गरिरहेको उनको भनाइ छ । न्यायको पहुँचमा कमजोर मानिसहरू नरहेको भन्दै उनले आवाज विहीनको आवाज बनेर निरन्तर वकालत गर्नु पत्रकारको मुख्य जिम्मेवारी रहेको बताए ।

राजनीतिक, आर्थिक कारणले गर्दा स्वतन्त्र र निष्पक्ष पत्रकारिताको अभ्यास कमजोर भएकोमा नागरिक समाजका अगुवाले टिप्पणी गरेका छन् ।

कार्यक्रममा बोल्दै नेपाल पत्रकार महासङ्घ चितवनका अध्यक्ष नारायण अधिकारीले नागरिकको मौलिक हक अधिकार रक्षाका लागि राज्य नै पहिलो जिम्मेवार निकाय भएको बताए । राज्य अभिभावक भएकाले उसले नै नागरिकको रक्षा गर्नु पर्ने भन्दै अध्यक्ष अधिकारीले पत्रकारहरू कुनै राजनीतिक धारमा विभाजन हुँदा वास्तविक पीडितको आवाजहरू बाहिर आउन नसकेको बताए ।

चितवन जिल्ला अदालत बार एशोसिएसनका अध्यक्ष खगराज कँडेलले पत्रकारिताको राजनैतिक पक्षधरता समाजको लागि हानिकारक रहेको बताए । निष्पक्ष, निर्भिक र स्वतन्त्र भनिएको पत्रकारिता क्षेत्र नै राजनैतिक आस्थाका आधारमा देखा पर्ने गरेकोमा गुनासो गर्दै अध्यक्ष कँडेलले चौथो अङ्गको महत्व र गरिमा जोगाउन आवश्यक रहेको बताए ।  

इन्सेक बागमती प्रदेश संयोजक गणेश भण्डारीको अध्यक्षतामा भएकाे कार्यक्रममा अधिवक्ताहरू रमेश काफ्ले, मुकुन्द दाहाल, पवित्रा सुवेदी, पत्रकार मधुसुदन दवाडी, माइती नेपालका प्रमुख इश्वर गिरी, एनजिओ फेडरेशनका केन्द्रीय सदस्य सुरेशकुमार अधिकारी, रामचन्द्र आचार्य, पत्रकार कृष्ण खनाललगायतले मानव अधिकार सम्वद्धनमा मिडियाको भूमिका विषयमा आफ्नो विचार राखेका थिए ।