वीरगंज । निजी तथा आवासीय विद्यालय संगठन (प्याब्सन) को दोस्रो राष्ट्रिय परिषद् बैठक २०८२ का अवसरमा पर्सा जिल्ला कार्यसमितिलाई विशेष सम्मान प्रदान गरिएको छ। बुधबार काठमाडौंमा आयोजित उक्त कार्यक्रममा मधेश प्रदेशबाट एकमात्र पर्सा जिल्ला कार्यसमिति उत्कृष्ट कार्यसम्पादनका लागि सम्मानित भएको हो।

प्याब्सन पर्साका अध्यक्ष सरोज प्रसाद चौधरीले सम्मानपत्र ग्रहण गरेका थिए। उनलाई प्याब्सनका राष्ट्रिय अध्यक्ष कृष्ण प्रसाद अधिकारी तथा प्रमुख सल्लाहकार डिके ढुंगानाले संयुक्त रूपमा सम्मान प्रदान गरेका हुन्।

सचिव अशोक संग्रौलाका अनुसार, संगठनका नीति, नियम र निर्देशनहरूको पूर्ण पालना गर्दै संगठनको गरिमा उच्च राख्न सक्रिय तथा जिम्मेवार भूमिका निर्वाह गरेको आधारमा पर्सा कार्यसमितिलाई छनोट गरिएको हो। साथै शिक्षा क्षेत्रको गुणस्तरीय विकासमा योगदान पुर्‍याउनुका साथै संस्थागत विद्यालयहरूको हकहित संरक्षण र संगठनको सुदृढीकरणमा उल्लेखनीय भूमिका खेलेको कारण पनि पर्सालाई यो सम्मान प्रदान गरिएको उनले बताए।

पर्सा कार्यसमितिले विद्यालय, शिक्षक तथा विद्यार्थी केन्द्रित विविध कार्यक्रमहरू निरन्तर रूपमा सञ्चालन गर्दै आएको छ। शैक्षिक गुणस्तर अभिवृद्धि, शिक्षक तालिम, विद्यार्थी लक्षित अतिरिक्त क्रियाकलाप तथा अभिभावक–विद्यालय समन्वयलाई सुदृढ बनाउने प्रयासले जिल्लामा निजी विद्यालयहरूको स्तर उकास्न महत्वपूर्ण योगदान पुगेको मानिन्छ।

कार्यक्रममा देशभरका विभिन्न जिल्ला कार्यसमितिहरूको सहभागिता रहेको थियो। परिषद् बैठकले आगामी शैक्षिक नीति, संगठनको रणनीति तथा संस्थागत विद्यालयहरूको चुनौती र समाधानका विषयमा समेत विस्तृत छलफल गरेको थियो।

प्याब्सन पर्साको यो उपलब्धिलाई शिक्षा क्षेत्रमा सक्रिय सरोकारवालाहरूले सकारात्मक रूपमा लिएका छन्। यसले अन्य जिल्लाहरूलाई पनि संगठनात्मक अनुशासन र शैक्षिक गुणस्तर सुधारतर्फ प्रेरित गर्ने विश्वास व्यक्त गरिएको छ।

वीरगंज । कोशी प्रदेश प्रहरी कार्यालय, विराटनगरले इलाका प्रहरी कार्यालय दमक, झापामा कार्यरत प्रहरी नायव उपरीक्षक (डीएसपी) किशोर लम्साललाई २०८२ साल फागुन महिनाको “सर्वोत्कृष्ट प्रहरी” (Best Police of the Month) घोषित गरेको छ।

विभागीय मूल्य–मान्यता तथा आदेश–निर्देशनको पालना गर्दै उच्च मनोबल र साहसका साथ कर्तव्य निर्वाह गरेको आधारमा उनलाई उक्त सम्मान प्रदान गरिएको हो। फागुन २१ गते सम्पन्न प्रतिनिधिसभा सदस्य निर्वाचन अन्तर्गत झापा क्षेत्र नम्बर–५ जस्तो अतिसंवेदनशील क्षेत्रमा शान्ति सुरक्षा कायम राख्दै कुनै अप्रिय घटना हुन नदिई सफलतापूर्वक निर्वाचन सम्पन्न गराउन उनले महत्वपूर्ण भूमिका खेलेका थिए।

त्यस्तै, Gen-Z आन्दोलनका क्रममा इलाका प्रहरी कार्यालय दमकबाट लुटिएका हतियार तथा हिरासतबाट फरार प्रतिवादीहरूको खोजी गर्ने क्रममा कार्यालय नजिकैको झाडीबाट Y13487 नम्बरको मार्का–४ राइफल एक थान बरामद गरिएको थियो। साथै विभिन्न स्थानबाट १९ जना प्रतिवादी पक्राउ गर्न समेत उनी सफल भएका थिए।

फागुन महिनामा दर्ता भएका ३५ वटा मुद्दामध्ये Gen-Z आन्दोलनसँग सम्बन्धित १० वटा मुद्दा दर्ता भई सबै फर्छ्यौट गरिएको थियो। आन्दोलनका कारण क्षति पुगेको इलाका प्रहरी कार्यालयको भवन, फर्निचर तथा विद्युतीय सामग्री स्थानीय तह, संघसंस्था र स्थानीय बासिन्दासँगको समन्वयमा पुनःनिर्माण तथा व्यवस्थापन गर्न उनले नेतृत्वदायी भूमिका निर्वाह गरेका थिए।

यसैगरी, ध्वनि प्रदूषण गर्ने २१७ वटा मोटरसाइकल नियन्त्रणमा लिई कारबाही गरिएको तथा चालु र पेन्डिङ मुद्दाका मिसिल पुनःनिर्माणमा समेत सक्रियता देखाइएको छ। साथै हालसम्म विभिन्न मुद्दाका २२ जना फरार प्रतिवादी पक्राउ गर्न उनले महत्वपूर्ण योगदान दिएका छन्।

उक्त सम्पूर्ण कार्यसम्पादनको उच्च मूल्याङ्कन गर्दै डीएसपी लम्साललाई “सर्वोत्कृष्ट प्रहरी” घोषित गरिएको कोशी प्रदेश प्रहरी कार्यालयले जनाएको छ।