वीरगंज । भारतकाे अयाेध्यामा श्रीराम मन्दिरकाे उद्घाटन एवम् प्राण प्रतिष्ठ गरिएकाे अवसरमा वीरगंजमा साेमबार तेस्राे लिङ्गीहरुले पनि र्‍याली निकालेका छन् ।

वीरगंजकाे बाेखार चाैकस्थित बाजागाजासहित निस्केकाे तेस्राे लिङ्गीहरुकाे र्‍याली रेल्बे राेड, घण्टारघर, माइस्थान, हुँदै घडिअर्वास्थित राम मन्दिरमा पुगेर सम्पन्न भएकाे थियाे ।

भारतकाे अयाेध्या र वीरगंजकाे राम मन्दिरमा गरिएकाे प्राण प्रतिष्ठाकाे अवसरमा आफुहरुले पनि र्‍याली निकालेर उत्सव मनाएकाे तेस्राे लिङ्गी समुहका ममता भट्टले जानकारी दिए । उनले र्‍याली निकाल्नुकाे साथै दीप प्रज्वलन समेत गरिएकाे जानकारी दिए ।

वीरगञ्ज । वीरगंज महानगरपालिकाकाे वडा नम्बर १० स्थित रामजानकी मन्दिरमा प्राण प्रतिष्ठाको तयारी पूरा भएको छ । भोली अयोध्याको राम मन्दिरमा प्राण प्रतिष्ठा हुँदा वीरगंजकाे घडिअर्वा पोखरीको सामुन्ने रहेको रामजानकी मन्दिरमा पनि प्राण प्रतिष्ठा गर्ने तयारी गरिएको हो । 

वीरगंज महानगरपालिकाको सहयोगमा ग्रिनसिटी सामुदायिक सेवा केन्द्र तथा स्थानीय बासीले भब्य रुपमा तयारी गरेका छन् । त्यसकै अवसरमा वीरगंजकाे माइस्थानदेखि आदर्शनगर, ग्रिनसिटी हुँदै घडिअर्वा पोखरी लगायतका विभिन्न चौकहरुमा झिलिमिली बत्ती जडान गरेर आकर्षक बनाइएको छ । 

वीरगंजलाई धार्मिक पर्यटकीय शहरको रुपमा विकास गर्ने लक्ष्यअनुरुप काम भइरहेको महानगर प्रमुख राजेशमान सिंहले बताए । प्रमुख सिंहले आइतवार राम जानकी मन्दिरको तयारीको अनुगमन गर्दै तयारीमा कुनै कमी नगर्न निर्देशन दिएका छन् । 

आठ दशकभन्दा लामो समयदेखि पूजारीको एकछत्र राज रहेको मन्दिरलाई अतिक्रमण मुक्त बनाई प्रमुख सिंहले रंगरोगन तथा स्तरोन्नती गरेका छन् । साथै उनकै पहलमा मन्दिर सर्वसाधारणका लागि पूजापाठ गर्न खुला गरिएको छ । 

त्यसकै उपलक्ष्यमा भोली महाआरती तथा प्राण प्रतिष्ठा हुन लागेको ग्रिनसिटी सामुदायिक सेवा केन्द्र आदर्शनगकार अध्यक्ष जयप्रकाश खेतानले बताए । उनकाअनुसार भोली बिहान ८ बजे कलश यात्रा निकालिनेछ । साँझ ६ बजेदेखि महाआरती शुरु हुने उनले जानकारी दिए । 

यसैगरी पाेखरिया नगरपालिकाले भारतको अयोध्यामा नवनिर्मित राम मन्दिरको उद्घाटनसंगै प्राण प्रतिष्ठाको उत्सवमा सोमबार माछा, मासु र मदिराको बिक्री वितरणमा रोक लगाएकाे छ ।

पोखरिया नगरपालिकाले एक सूचना जारी गरेर माघ ८ गते सोमबार नगरपालिकाभर माछा, मासु र मदिराको बिक्रि वितरणमा रोक लगाएको हो । साथै सोमबार नगरपालिकाका घरघरमा दीप प्रज्वलित गरी दिपावली मनाउनपनि नगरपालिकाले आग्रह गरेको छ ।

पोखरीया नगरपालिकाका मेयर प्रधुमन चौहानको निर्देशनमा प्रमुख प्रशासकीय अधिकृत अजय कुमार श्रीवास्तवले आइतबार एक सार्वजनिक सूचना जारी गर्दै अयोध्यामा नवनिर्मित राम मन्दिरको उद्घाटन तथा प्राण प्रतिष्ठा हुने भएकाले त्यसैलाई लक्षित गरी माघ ८ गते सोमबार नगरपालिका भित्र कुनै पनि पशु, जीवको बध तथा मदिराको बिक्रि वितरण नगरिदन आग्रह गरेका छन् ।

वीरगंज । पुर्व राजा ज्ञानेन्द्र विर विक्रम शाहदेवको स्वागत तथा नागरिक अभिनन्दनको तयारी बारे मूल समारोह समितिले वृहत छलफल गरेको छ ।

वीरगंज स्थित होटल सम्झनामा पुर्व राजाको अभिनन्दनका लागी गठित स्वागत तथा अभिनन्दन मूल समारोह समिति वीरगंजको बसेको विस्तारित बैठकले वृहत छलफल गरेको प्रचार प्रसार संयोजक मानव सेवकले जानकारी दिए ।

समितिका अध्यक्ष नेपाली कांग्रेसका वरिष्ठ नेता देवेन्द्र लाल नेपालीको नेतृत्वमा विभिन्न उपसमितिका संयोजक सहितको बैठकले माघ १३ गते वीरगंज स्थित लालबंगला परिसरमा हुने पुर्व राजा शाहको स्वागत तथा नागरिक अभिनन्दन कार्यक्रमलाई सभ्य र भव्य बनाउन सकृयता पुर्वक लाग्ने निर्णय गरेको छ ।

बैठकले कार्यक्रमका लागी गठन गरिएका विभिन्न उपसमिति संयोजकहरुलाई आ–आफ्नो क्षेत्रमा कृयाशिलताका साथ अगाडि बढ्न निर्देशन दिंदै पुर्व राजाको स्वागत तथा नागरिक अभिनन्दनमा व्यापक सहभागीताका लागी जन समुदायमा अपिल गर्ने निर्णय पनि गरेको मानव सेवकले जानकारी दिए ।

बैठकमा विभिन्न उपसमिति संयोजक तथा सदस्यहरुबाट कार्यक्रम बारे आएको सुझाव समेत संकलन गरिएको र त्यसलाई कार्यान्वयनमा लैजाने बारे समेत वृहत छलफल भएको बैठकमा सहभागी मूल समारोह समितिका महासचिव हिरा बहादुर चन्दले जानकारी दिए ।

बैठकमा मुल समारोह समितिका उपाध्यक्ष पशुपती विक्रम शाह, महासचिव हिरा बहादुर चन्द, प्रचार प्रसार संयोजक मानव सेवक, अनुगमन समितिका संयोजक जनकलाल शाह, स्वयम् सेवक परिचालन समितिका संयोजक विरेन्द्र थापा, युवक परिचालन समितिका संयोजक उपेन्द्र यादव, प्रचार प्रसार समितिका सदस्य सत्तार अन्सारी, राष्ट्रिय प्रजातन्त्र पार्टीका पर्सा अध्यक्ष सुमेस्वर उपाध्याय, सचिव पन्नालाल पटेल, शिवसेना नेपालका केन्द्रीय महासचिव नारायण अर्याल लगायत विभिन्न राष्ट्रवादी संघसंगठन तथा दलका पर्सा, बारा, रौतहट, मकवानपुरका प्रतिनिधिहरुको उपस्थिति रहेको थियो ।

वीरगंज । राष्ट्रिय बाणिज्य बैंकको ५९ औं बार्षिकोत्सवको अवसरमा शुक्रबार वीरगंजमा रक्तदान तथा स्वास्थ्य शिविर सम्पन्न भएकाे छ । बैंककाे प्रादेशिक कार्यालय वीरगंजकाे आयाेजनामा रक्तदान र स्वास्थ्य शिविर सम्पन्न भएकाे हाे ।

वीरगंज आदर्शनगर स्थित बैंककाे प्रादेशिक कार्यालय परिसरमा भएकाे कार्यक्रममा ५ महिलासहित ४६ जनाले रक्तदान गरेका हुन् । कार्यक्रममा राहुल ओझा, आयुष काेइराला, अशाेक यादव, मिरा परियार, सुरेन्द्र उप्रेती, सुनिल कुमार भण्डारी, लक्ष्मि उप्रेती लगायतकाले रक्तदान गरेकाे बैंकका आलाेक कर्णले वताए ।

यसैगरी शुक्रबार नै स्वास्थ्य शिविर सम्पन्न भएकाे छ । बैंक परिसर मै भएकाे शिविरमा महिलाहरुको लागि प्रजनन स्वास्थ्य परीक्षण गरिनुकाे साथै दन्त परीक्षण शिविर सम्पन्न भएको हाे ।

स्वास्थ्य शिविरमा स्त्री रोग विशेषज्ञ डाक्टर एलिसा दास, हाडजोर्नी तथा नशा रोग विशेषज्ञ डाक्टर नविन कुमार सिंह, फिजिसियन डा. रविरञ्जन साहले स्वास्थ्य परीक्षण गरेका थिए ।

त्यस्तै किरण आँखा अस्पतालको सहयोगमा आँखा शिविर र साहारा डेण्टल क्लिनिकको सहयोगमा आयोजित दाँत परीक्षण शिविरमा एक सय जनाको आँखा र दाँत परीक्षण गरिएको बैंकका आलोक कर्णले जानकारी दिए ।

राष्ट्रिय बाणिज्य बैंक मधेस प्रादेशिक कार्यालय वीरगंजका प्रमुख कमलेश ठाकुर र उपप्रमुख सन्ध्या सिंहको लगायतकाे उपस्थिती रहेकाे थियाे ।