वीरगंज । जीएचपी माध्यमिक विद्यालय, वीरगंजले एसईई २०८२ मा उत्कृष्ट नतिजा हासिल गरेका विद्यार्थी तथा शिक्षकहरूलाई सम्मान गरेकाे छ । विद्यालयमा एक कार्यक्रमकाे आयाेजना गरि ४.० जीपीए प्राप्त गर्ने ६ जना विद्यार्थीलाई ल्यापटप, प्रशंसापत्र तथा खादा ओढाएर सम्मान गरिएको हाे ।

सम्मानित हुने विद्यार्थीहरूमा मेहविश हुमायूँ, प्रथम पटेल, सिद्धान्त गुप्ता, आकृति राय, बुद्धिप्रिया पाण्डेय र अलिना जैसवाल रहेका छन् । विद्यालयले उनीहरूको उत्कृष्ट शैक्षिक उपलब्धिको कदर गर्दै ल्यापटप प्रदान गरेको हो ।

त्यसैगरी, एसईई परीक्षामा उत्कृष्ट नतिजा दिलाउन महत्वपूर्ण योगदान पुर्‍याउने विषयगत शिक्षक तथा शिक्षिकाहरूलाई समेत नगद पुरस्कार, सम्मानपत्र र खादा ओढाएर सम्मान गरिएको थियो ।

विद्यालयकी प्रधानाध्यापक रमीन्द्र कौरको अध्यक्षतामा सम्पन्न कार्यक्रममा वीरगंज महानगरपालिकाको शैक्षिक प्रशासन महाशाखाका प्रमुख आनन्द लामिछाने प्रमुख अतिथि तथा मानव सेवा आश्रमका संस्थापक एवं समाजसेवी देवेश मानव विशिष्ट अतिथिका रूपमा सहभागी थिए ।

प्रमुख अतिथि आनन्द लामिछानेले विद्यालयले उत्कृष्ट विद्यार्थीहरूको सम्मान गरेर शिक्षा क्षेत्रमा सकारात्मक उदाहरण प्रस्तुत गरेको बताए । उनले यस्ता कार्यक्रमले विद्यार्थीहरूलाई थप मेहनत गर्न र उत्कृष्टता हासिल गर्न प्रेरित गर्ने उल्लेख गरे ।

विशिष्ट अतिथि देवेश मानवले शिक्षा नै व्यक्तित्व निर्माण र समाज रूपान्तरणको आधार भएको बताउँदै सफल विद्यार्थीहरूलाई बधाई दिएका थिए । उनले अनुशासन, परिश्रम र मानवताको भावनासहित जीवनमा अघि बढ्न सुझाव दिए ।

कार्यक्रममा लायन्स क्लब डिस्ट्रिक्ट ३२५ का डिस्ट्रिक्ट गभर्नर रामविहारी पाण्डे, समाजसेवी नुतन पोखरेल सरावगी, समाजसेविका तथा लायन्स क्लब सेन्ट्रल सिटी क्याबिनेट अफिसर गुडी जोशी, विद्यालयका निर्देशक शिव गुप्ता, सामाजिक कार्यकर्ता दिलीपराज कार्की, गुरुद्वारा सत्संगका उपाध्यक्ष अजित पाल सिंह, सामाजिक कार्यकर्ता पवनदीप कौर, यात्राडेलीका निर्देशक राम सराफ तथा क्रियाशील युवा पत्रकार मञ्च नेपालका अध्यक्ष आनन्द पटेललगायतले शुभकामना मन्तव्य व्यक्त गरेका थिए ।

वक्ताहरूले विद्यालयले विद्यार्थी र शिक्षक दुवैको सम्मान गरेर शिक्षाप्रति सम्मानको संस्कार विकास गरेको उल्लेख गर्दै यस कार्यको प्रशंसा गरे । उनीहरूले यस्ता कार्यक्रमले विद्यार्थीहरूलाई अझ बढी मेहनत गर्न तथा उत्कृष्ट नतिजा हासिल गर्न प्रेरित गर्ने विश्वास व्यक्त गरे ।

कार्यक्रममा कक्षा १० मा अध्ययनरत विद्यार्थी, अभिभावक, शिक्षक–शिक्षिका तथा विभिन्न क्षेत्रका व्यक्तित्वहरूको उल्लेखनीय उपस्थिति रहेको थियो । विद्यालयका फाउन्डर जगप्रित सिंहको विशेष पहल तथा व्यवस्थापनमा सम्पन्न कार्यक्रम अत्यन्त व्यवस्थित, भव्य र प्रेरणादायी बनेको सहभागीहरूले बताएका छन् ।

वीरगंज । वीरगंज महानगरपालिका–१२ मुर्लीस्थित सगरमाथा एकेडेमी बोर्डिङ स्कुलमा विद्यार्थीहरूमा नेतृत्व क्षमता विकास तथा लोकतान्त्रिक संस्कारको प्रवर्द्धन गर्ने उद्देश्यले हेड ब्वाय, हेड गर्ल, हाउस क्याप्टेन तथा खेलकुद संयोजक चयनका लागि निर्वाचन कार्यक्रम सञ्चालन गरिएको छ ।

विद्यालयमा लोकतान्त्रिक अभ्यासको प्रत्यक्ष अनुभव गराउने उद्देश्यले आयोजित निर्वाचनमा विभिन्न हाउसका विद्यार्थीहरूले उम्मेदवारी दिएका थिए । हरियो, पहेँलो, निलो र रातो हाउसका प्रतिनिधिहरूबीच नेतृत्वका लागि प्रतिस्पर्धा गराइएकाे विद्यालयले जनाएको छ ।

विद्यालयका प्रिन्सिपल जियालाल गुप्ताले विद्यार्थीहरूमा नेतृत्व क्षमता, जिम्मेवारीबोध तथा लोकतान्त्रिक मूल्य–मान्यताको विकास गराउन निर्वाचन प्रक्रिया अपनाइएको बताए । उनका अनुसार विद्यालयस्तरमै निर्वाचनको अभ्यास गराउँदा विद्यार्थीहरूले मतदानको महत्व, मत सदर तथा बदर हुने प्रक्रिया र लोकतान्त्रिक प्रणालीबारे व्यवहारिक ज्ञान हासिल गर्ने अवसर पाउँछन् ।

उनले १८ वर्षको उमेरपछि हुने वास्तविक निर्वाचनमा विद्यार्थीहरू सचेत र जिम्मेवार मतदाताका रूपमा सहभागी हुन सकून् भन्ने उद्देश्यले यस्ता कार्यक्रम प्रभावकारी हुने विश्वास व्यक्त गरे ।

निर्वाचनमार्फत चयन हुने हेड ब्वाय, हेड गर्ल, हाउस क्याप्टेन तथा अन्य विद्यार्थी नेताहरूले विद्यालयमा अनुशासन कायम गर्न, विद्यार्थीहरूको समस्या समाधानमा सहकार्य गर्न तथा नेतृत्वदायी भूमिका निर्वाह गर्ने जिम्मेवारी पाउनेछन् ।

उम्मेदवार बनेका विद्यार्थीहरूले आफूहरूलाई नेतृत्व गर्ने अवसर प्राप्त भए विद्यालय र विद्यार्थीहरूको हितमा काम गर्दै आफ्नो क्षमता प्रदर्शन गर्ने प्रतिबद्धता व्यक्त गरेका छन् ।