वीरगंज । जनमत पार्टीले आफ्नो दोस्रो महाधिवेशनको विस्तृत समयतालिका सार्वजनिक गरेको छ । पार्टीको दोस्रो महाधिवेशन आगामी २०८३ असोज १० गते शनिबार वीरगंजस्थित टाउनहलमा आयोजना हुने भएको छ ।
महाधिवेशनअन्तर्गत केन्द्रीय कार्यकारिणी समितिका पदाधिकारी तथा सदस्यसहित सम्पूर्ण पदका लागि असोज १ गते उम्मेदवारी मनोनयनपत्र दर्ता गरिने भएको छ । सार्वजनिक समयतालिकाअनुसार जिल्लाबाट मनोनित गरिएका सम्पूर्ण महाधिवेशन प्रतिनिधिहरूको विवरण भदौ २८ गते आइतबारसम्म केन्द्रमा आइपुग्नुपर्नेछ ।
त्यसपछि भदौ २९ गते मतदाता नामावली प्रकाशन गरिनेछ भने भदौ ३० गते मतदाता नामावलीमाथि दाबीविरोध गर्न सकिनेछ । भदौ ३१ गते अन्तिम मतदाता नामावली प्रकाशन गरिने जनाइएको छ ।
महाधिवेशनको निर्वाचन प्रक्रियाअन्तर्गत असोज १ गते बिहीबार उम्मेदवारको मनोनयनपत्र दर्ता हुनेछ । असोज २ गते उम्मेदवारको नामावली प्रकाशन गरिनेछ भने असोज ३ गते उम्मेदवारमाथि दाबीविरोधको समय तोकिएको छ ।
यस्तै, असोज ४ गते उम्मेदवारले आफ्नो नाम फिर्ता लिन सक्नेछन् भने असोज ५ गते उम्मेदवारको अन्तिम नामावली प्रकाशन गरिनेछ । महाधिवेशनअघि असोज ९ गते शुक्रबार केन्द्रीय कार्यकारिणी समितिको बैठक बस्ने कार्यक्रम रहेको छ ।
असोज १० गते शनिबार महाधिवेशनसँगै मतदान सम्पन्न गरिनेछ । त्यसको भोलिपल्ट असोज ११ गते आइतबार मतगणना तथा परिणाम घोषणा गरिने कार्यक्रम तय गरिएको जनमत पार्टी पर्साका अध्यक्ष ओमप्रकाश सर्राफले जानकारी दिए ।
सोही दिन केन्द्रीय कार्यकारिणी समितिको बैठकसमेत बस्ने जनाइएको छ । जनमत पार्टीले वीरगंजको टाउनहलमा आयोजना हुने दोस्रो महाधिवेशनलाई भव्य र सफल बनाउन सम्पूर्ण नेता, कार्यकर्ता तथा प्रतिनिधिहरूलाई सक्रिय सहभागिताका लागि आग्रह गरेको छ ।
