वीरगंज । पर्साको पटेर्वासुगौली गाउँपालिका–२ गादीमा रहेको शिवम् लेयर्स फार्म प्रालिद्वारा सञ्चालित ह्याचरीबाट निस्कने फोहोर, दुर्गन्ध तथा झिँगाका कारण आसपासका बस्ती प्रभावित भएको भन्दै नेकपा (एमाले) का नेता रुपेश पाण्डेले कडा विरोध जनाएका छन् ।
नेता पाण्डेले कुखुराको अन्डा उत्पादनसँग सम्बन्धित उक्त फार्मका कारण आसपासका बस्तीका नागरिकको स्वास्थ्यमा गम्भीर असर परेको दाबी गर्दै फार्म तत्काल बन्द गर्न माग गरेका छन् ।
पर्सा निर्वाचन क्षेत्रबाट निर्वाचनसमेत लडेका पाण्डेले वीरगंज महानगरपालिका–१० निवासी चामल व्यवसायी शिवजी कलवारद्वारा सञ्चालित उक्त फार्मका कारण स्थानीय नागरिकको स्वास्थ्यसँग खेलबाड भइरहेको आरोप लगाए ।
‘शिवम् लेयर्स फार्मको ह्याचरीका कारण आसपासका बस्तीका जनताको उठीबास भएको छ । पैसा कमाउने लोभमा नागरिकको स्वास्थ्यसँग खेलबाड गर्न पाइँदैन,’ पाण्डेले भने ।
उनले फार्म तत्काल बन्द नगरिए आगामी दिनमा स्थानीय बासिन्दाबाट फार्ममा ठूलो क्षति हुन सक्ने चेतावनीसमेत दिएका छन् । त्यस्तो अवस्था सिर्जना भए त्यसको जिम्मेवारी स्वयं सञ्चालक शिवजी कलवारले लिनुपर्ने उनको भनाइ छ ।
पाण्डेले स्थानीय नागरिकको स्वास्थ्य र वातावरणको संवेदनशीलतालाई ध्यानमा राख्दै सम्बन्धित निकायले तत्काल प्रभावकारी कदम चाल्नुपर्नेमा जोड दिएका छन् ।
स्थानीयको निरन्तर दबाब तथा विभिन्न सञ्चारमाध्यममा समाचार प्रकाशित भएपछि पटेर्वासुगौली गाउँपालिकाले यसअघि नै उद्योग बन्द गर्न निर्देशन दिएको थियो ।
गाउँपालिकाको २०७९ चैत ८ गते बसेको कार्यपालिका बैठकले उद्योगलाई १५ दिनभित्र बन्द गर्न सम्बन्धित पक्षलाई पत्राचार गर्ने निर्णय गरेको थियो । गाउँपालिकाका अनुसार उद्योगविरुद्ध विभिन्न समयमा एक सयभन्दा बढी स्थानीयले उजुरी दिएका थिए ।
उद्योग सञ्चालनका लागि अनुमति दिने निकायले तोकेका सर्त पालना गर्न पटक–पटक जानकारी गराउँदा समेत सञ्चालकले अटेर गरेको भन्दै गाउँपालिकाले उद्योग बन्द गर्ने निर्णय गरेको जनाएको थियो ।
नेता पाण्डेका अनुसार अनुगमन समितिको प्रतिवेदनमाथि छलफल भएपछि स्थानीय सरकार सञ्चालन ऐन, २०७४ तथा प्रचलित कानुनअनुसार उद्योगलाई १५ दिनभित्र बन्द गर्न पत्राचार गर्ने र सम्बन्धित सरकारी निकायलाई जानकारी गराउने निर्णय गरिएको थियो ।
स्थानीयको स्वास्थ्य, वातावरण र जनजीवनमा असर परेको भन्दै शिवम् लेयर्स फार्मको सञ्चालन तत्काल रोक्नुपर्ने माग स्थानीयस्तरबाट समेत उठ्दै आएको छ ।
