वीरगंज । जेनजी आन्दोलन सुरु भएको एक वर्ष पूरा भएको अवसरमा जेनजी अभियन्ता कृष्ण मोहन सहनीले सरकारप्रति गम्भीर असन्तुष्टि व्यक्त गरेका छन् ।
सहनीले एक वर्षको अवधिमा सरकारले जेनजी आन्दोलनका मूल भावना, माग र बलिदानलाई प्रभावकारी रूपमा सम्बोधन गर्न नसकेको आरोप लगाएका छन् ।
उनले सरकारले जेनजीको सम्मान र भावनालाई सम्बोधन गर्नुको सट्टा जेनजीलाई अपमान गर्नबाहेक उल्लेखनीय काम गर्न नसकेको आरोप लगाउँदै सरकारको कार्यशैलीप्रति आपत्ति जनाएका हुन् ।
सहनीका अनुसार जेनजी आन्दोलन केवल तत्कालीन राजनीतिक असन्तुष्टिको अभिव्यक्ति मात्र नभई भ्रष्टाचार, बेथिति, जवाफदेहिताको अभाव र सुशासनको मागसहित युवाहरूले उठाएको आवाज थियो । आन्दोलनका क्रममा ठूलो मानवीय क्षति भएको उल्लेख गर्दै उनले नेपाल सरकारको गृह मन्त्रालयले आन्दोलनका क्रममा मृत्यु भएकाहरूलाई शहीद घोषणा गरेको विवरणसमेत सार्वजनिक गरिसकेको बताएका छन् ।
उनले आन्दोलनको एक वर्ष पूरा भइसक्दासमेत शहीद परिवार, घाइते तथा आन्दोलनका मूल मुद्दाहरूलाई प्रभावकारी रूपमा सम्बोधन नगरिएको भन्दै सरकारलाई आफ्नो प्रतिबद्धता व्यवहारमा देखाउन आग्रह गरेका छन् ।
जेनजी आन्दोलनको भावना र युवाहरूको बलिदानलाई राजनीतिक स्वार्थका लागि प्रयोग नगर्न चेतावनी दिँदै सहनीले युवाको आवाजलाई सम्मान गर्नु, शहीदहरूको योगदानको कदर गर्नु तथा सुशासन र जवाफदेहिताको सुनिश्चितता गर्नु नै आन्दोलनप्रतिको वास्तविक सम्मान हुने बताएका छन् ।
सरकारले भने प्रत्येक वर्ष भदौ २३ गतेलाई ‘जेनजी शहीद दिवस’का रूपमा मनाउने निर्णय गरिसकेको छ ।
सहनीले सरकारको औपचारिक निर्णय मात्र पर्याप्त नहुने उल्लेख गर्दै त्यसको प्रभावकारी कार्यान्वयन र सरकारको व्यवहारबाट नै जेनजी आन्दोलनप्रति वास्तविक सम्मान भएको प्रमाणित हुनुपर्ने धारणा राखेका छन् ।
