वीरगंज । रौतहटमा मनी ट्रान्सफर सञ्चालकमाथि गोली प्रहार गरेको आरोपमा प्रहरीले तीन जना भारतीय नागरिकलाई पक्राउ गरेको छ ।

पक्राउ पर्नेमा भारत बिहार मोतिहारी जिल्ला निवासी चिरैया दिपही गाउँ वडा नं. २ निवासी १९ बर्षीय मुनिफ कुमार यादव, साेही ठाउँ निवासी १८ बर्षीय राज कुमार पासवान उर्फ सुभाष पासवान र २० बर्षीय चन्द्रभान सिंह उर्फ चुनु कुमार सिंह रहेकाे जिल्ला प्रहरी कार्यालय राैतहटले जनाएको छ ।

शुक्रबार दिउँसो १ बजे रौतहटको परोहा नगरपालिका–९ मा शिव मनी ट्रान्सफरका सञ्चालक २६ वर्षका नितेश साहमाथि लुटेरा समूहले गोली प्रहार गरेको थियो ।

घटनालगत्तै खटिएको प्रहरीले खोजतलास गर्दा तीन जना भारतीय नागरिक पक्राउ परेका जिल्ला प्रहरी कार्यालय रौतहटकी प्रहरी नायब उपरीक्षक (डीएसपी) एलिजा गिरीले जानकारी दिइन् ।

उनीहरुमाथि ज्यान मार्ने उद्योग, हातहतियार तथा खरखजाना र चोरीसम्बन्धी कसुरमा अनुसन्धान भइरहेको प्रहरीले जनाएको छ ।
उनीहरुको साथबाट प्रहरीले मोटरसाइकल, पेस्तोल गोली लगायतका सामान बरामद गरेको छ ।

गोली प्रहारबाट घाइते भएका नितेशको बाराको परवानीपुरस्थित एलएस न्यूरो अस्पतालमा उपचार गरिएको थियो ।

आँखामा समस्या देखिएकाले थप उपचारका लागि काठमाडौंको तिलगंगा आँखा अस्पताल पठाइएको जिल्ला प्रहरी कार्यालय रौतहटकी डीएसपी गिरीले जानकारी दिइन् ।

वीरगंज । पर्सा क्षेत्र नं. १ का प्रतिनिधि सभा सदस्य (सांसद) प्रदिप यादवले नारायणी अस्पतालकाे मुद्दा तत्काल छिनोफानो गरेर निकास दिन सर्वोच्च अदालतको ध्यानाकर्षण गराएका छन् ।

प्रतिनिधि सभाकाे शुक्रबारकाे बैठकमा वाेल्दै सांसद यादवले अस्पतालको भौतिक संरचना निर्माणको विषयमा विभाग र ठेकेदारको लडाइमा नारायणी अस्पतालको पाँच सय शैय्याको अस्पतालको निर्माण ओझेलमा परेको वताए । उनले त्यस कारण जनताले दुख भोगिरहेकाेले तत्काल मुद्दाको छिनोफानो गरेर निकास दिन सर्वोच्च अदालतको ध्यानाकर्षण गराए ।

जनता समाजवादी पार्टी प्रमुख सचेतक एवम् पूर्व मन्त्री समेत रहेका सांसद यादवले वीरगंजको नारायणी अस्पतालमा भौतिक संरचनाको अभावले विरामीले दुख भोगिरहेकाे प्रतिनिधि सभाकाे बैठकमा जानकारी गराउँदै निकास दिन सार्वाेच अदालतकाे ध्यानकार्षण गराएका हुन् ।

 उनले भने “नारायणीलाई पाँच सय शैय्याको अस्पताल बनाउने लक्ष्यअनुसार सरकारले अस्पताल निर्माणको लागि करिब डेढ अर्बको लागतमा पछिल्लोपटक ८ वैशाख ०७६ मा बोलपत्र आह्वान गरेको थियो । तर सहरी विकास तथा भवन निर्माण विभागले केही कागजात र भौचरको नाम फरक भएको कारण ठेक्का रद्ध गर्यो । अर्को बोलपत्र आह्वान भयो । त्यसविरुद्ध ठेकेदार कम्पनीले उच्च अदालतमा रिट दायर गर्यो । अदालतले १७ कात्तिक ०७७ मा दोस्रो बोलपत्र रद्ध गर्यो । यो आदेशविरुद्ध २ पुस ०७७ मा भवन निर्माण विभागले सर्वोच्च अदालतमा निवेदन दर्ता गर्यो र अहिलेसम्म विचाराधीन छ । पेशीमा चढ्छ, सुनुवाइ हुँदैन, फैसला पनि हुँदैन ।”

अर्काे प्रसंगमा कुरा राख्दै सांसद यादवले वीरगंजमा खानेपानी अभावकाे समस्या अन्त्य गर्न माग गरेका हुन् । उनले जनशक्ति र बजेटको अभावमा खानेपानी संस्थानलाई धेरै समस्या भएको वताउँदै वीरगंजमा खानेपानीको अभाव अन्त्य गर्नको लागि नेपाल सरकारको एक्सन प्लान के छ ? प्रश्न समेत गरेका छन् ।

उनले भने “गर्मीको दिन आइसकेकाले अबका केही दिनमा वीरगंजका सबै चापाकल सुक्छ जानकारले बताइरहेका छन् । सबै चापाकलको पानि सुक्यो भने वीरगंजमा पानीको अभावले विकराल अवस्था आउँछ । कुनै बेला सइ फिटमा पानी आउथ्यो, अहिले ३ सयको लेयरमा पनि पानी छैन । सरकारी धारा जडानका लागि खानेपानी संस्थानमा सेवाग्राहीको भिड भइरहेको छ । त्यही भएर समस्या अन्त्य गर्न माग गर्दछुं ।