वीरगंज । सशस्त्र प्रहरी बल नेपाल नं. १३ गण हे.क्वा. पर्साद्वारा सञ्चालन गरिएको “विपद् स्वयंसेवक परिचालन विस्तारित तालिम” समापन भएको छ।

साेमबार वीरगंज महानगरपालिका–१४ स्थित गण मुख्यालयमा आयोजित समापन कार्यक्रममा पर्साका प्रमुख जिल्ला अधिकारी भोला दाहालको प्रमुख आतिथ्यता रहेको थियो। तालिम २०८२ फागुन २५ गतेदेखि चैत १६ गतेसम्म सञ्चालन गरिएको थियो।

कार्यक्रममा गणपति सशस्त्र प्रहरी उपरीक्षक मोहन बहादुर क्षेत्री, राष्ट्रिय अनुसन्धान जिल्ला कार्यालय पर्साका उप–अनुसन्धान निर्देशक सन्तोष ढुङ्गेल, श्री जंग गणका गणपति प्रमुख सेनानी लोकेन्द्र कार्की, जिल्ला प्रहरी कार्यालय पर्साका प्रहरी नायब उपरीक्षक राजु कार्की लगायतको उपस्थिति रहेको थियो।

त्यस्तै, वडा नं. १४ का अध्यक्ष महबुब एलाही अन्सारी, सञ्चारकर्मी, स्पर्श मल्टीस्पेशलिटी हस्पिटल प्रा.लि. का अध्यक्ष डा. महेश्वर प्रसाद कुर्मी, स्वास्थ्यकर्मी, स्थानीय भद्रभलाद्मी, प्रशिक्षक तथा सशस्त्र प्रहरीका विभिन्न दर्जाका कर्मचारीसहित करिब ८०–९० जनाको सहभागिता रहेको थियो।

उक्त तालिमबाट दीक्षित भएका २९ जना विपद् स्वयंसेवकहरूलाई प्रमुख जिल्ला अधिकारी दाहालद्वारा प्रमाणपत्र वितरण गरिएको थियो। कार्यक्रममा विपद् व्यवस्थापन तथा उद्धार कार्यमा स्वयंसेवकहरूको भूमिका महत्वपूर्ण रहने बताइएको थियो।

सशस्त्र प्रहरी बलका सूचना अधिकारी सशस्त्र प्रहरी नायब उपरीक्षक मोहनराज निरौलाले तालिमले विपद् प्रतिकार्य क्षमतामा थप मजबुती ल्याउने विश्वास व्यक्त गरे।

सेढवा । पर्साको ग्रामीण भेगमा चैते धानबाली अन्तर्गत हर्दिनाथ–१ (१४४२) जातको धानको रोपाइँ सुरु भएको छ।

जिल्लाको उत्तरी तथा पश्चिमी क्षेत्रमा पर्ने ठोरी, जिराभवानी, पटेर्वासुगौली, सखुवाप्रसौनी गाउँपालिका, पर्सागढी नगरपालिका तथा वीरगञ्ज महानगरपालिकाका केही वडाका किसानहरूले यस धानको रोपाइँ थालेका छन्।

तोरी, कार्तिकी सुर्ती लगायत अन्य बाली भित्र्याइसकेपछि खाली भएको जमिनमा किसानहरूले हर्दिनाथ–१ धान रोप्न थालेका हुन्।

जिराभवानी गाउँपालिका–४ सुपौलीका किसान दीपक दासका अनुसार फागुनको पहिलो सातामा ब्याडमा राखिएको बीउ रोपाइँका लागि तयार भएसँगै किसानहरू खेतमा जुटेका हुन्। यस धानको उत्पादन राम्रो हुने र स्वादसमेत मिठो हुने भएकाले पछिल्ला वर्षहरूमा यसको खेती विस्तार हुँदै गएको उनले बताए।

कतिपय किसानहरूले रोपाइँ सम्पन्न गरिसकेका छन् भने केही किसानहरू अझै बीउ तयार पार्ने, खेतमा पानी हाल्ने तथा आली लगाउने काममा व्यस्त छन्।

ठोरी गाउँपालिकामा भने वैदेशिक रोजगारी र शहरतर्फको बसाइँसराइका कारण स्थानीय श्रमिक अभाव देखिएको छ। त्यहाँ जिराभवानी तथा सीमावर्ती भारतीय गाउँबाट मजदुर ल्याएर रोपाइँ गरिने गरेको किसानहरूले बताएका छन्।

पटेर्वासुगौली गाउँपालिका–२ मकवानीटोलका किसान बिगा महरा चमारका अनुसार सो गाउँपालिकाको करिब ७५ प्रतिशत खेतीयोग्य जमिनमा हर्दिनाथ–१ को खेती गरिन्छ भने बाँकी २५ प्रतिशत जमिनमा सुर्ती र मकै लगाइन्छ।

हालसम्म बीउ तयारी नहुँदा केही क्षेत्रमा रोपाइँ सुरु नभए पनि किसानहरू खेत तयारी, मल व्यवस्थापन लगायतका काममा जुटिरहेका छन्।

सखुवाप्रसौनी गाउँपालिका–१ सखुवनियाका सुरेन्द्र महतो थारुले पनि आफ्नो क्षेत्रमा करिब ५० प्रतिशत जमिनमा चैते धान खेती हुने गरेको र केही किसानहरूले रोपाइँ सुरु गरिसकेको जानकारी दिए।

किसानहरूका अनुसार हर्दिनाथ–१ धान समयमै रोप्न सकिने भएकाले कतिपयले अहिले नै ब्याडमा बीउ छर्ने काम गरिरहेका छन्। गहुँ बाली कटानीपछि सोही जमिनमा यो धान रोप्न मिल्ने सुविधा रहेको छ।

करिब ९० दिनमै तयार हुने यस धानबालीबाट कटानीपछि पुनः धान (दतुरा) लगाउन सकिने हुँदा किसानहरूमा यसको आकर्षण बढ्दै गएको छ। पछिल्ला २–३ वर्षदेखि किसानहरूले प्रति कट्ठा ५ मन (करिब २ क्विन्टल) देखि ८ मन (करिब साढे ३ क्विन्टल) सम्म उत्पादन गर्दै आएका छन्।