वीरगंज । पर्साको वीरगन्जमा स्रोत नखुलेको ४ लाख ५० हजार भारतीय रुपैयाँसहित एक भारतीय नागरिक पक्राउ परेका छन्।
वीरगन्ज महानगरपालिका–१६ रजतजयन्ती चोकमा नियमित चेकजाँचका क्रममा प्रहरीले भारतबाट वीरगन्जतर्फ आउँदै गरेको मोटरसाइकलबाट उक्त रकम बरामद गरेको हो।
प्रहरी चौकी इनर्वाबाट खटिएको टोलीले बीआर ०६ एटी ६४४५ नम्बरको मोटरसाइकल रोकी जाँच गर्ने क्रममा मोटरसाइकलको डिक्कीमा लुकाएर राखिएको अवस्थामा भारतीय रुपैयाँ फेला पारेको जनाएको छ।
पक्राउ पर्नेमा भारतको बिहार, मोतिहारी जिल्ला पलनवा थाना–१० का करिब ५५ वर्षीय अशोक कुमार रहेका छन्।
प्रहरीका अनुसार बरामद रकममा ५०० दरका ८९१ थान, २०० दरको १ थान र १०० दरका ४३ थान भारतीय नोट रहेका छन्। बरामद रकमको कुल मूल्य ४ लाख ५० हजार भारतीय रुपैयाँ रहेको प्रहरीले जनाएको छ।
रकमसहित मोटरसाइकल र अशोक कुमारलाई नियन्त्रणमा लिएर घटनाबारे थप अनुसन्धान भइरहेको जिल्ला प्रहरी कार्यालय पर्साले जनाएको छ।
