वीरगंज । वीरगंज महानगरपालिका–१६ स्थित सनलाईट कलेजमा बुधबार एक विशेष जनचेतनामूलक कार्यक्रम सम्पन्न भएको छ। सामुदायिक प्रहरी सेवा केन्द्र कुम्हालटोलको आयोजनामा कक्षा ११ र १२ मा अध्ययनरत विद्यार्थीहरूलाई लक्षित गरी “मानव बेचबिखन तथा लागुऔषध ओसार–प्रसार” सम्बन्धी जानकारीमूलक कार्यक्रम सञ्चालन गरिएको हो।

कार्यक्रम सामुदायिक प्रहरी साझेदारी कार्यक्रम अन्तर्गत आयोजना गरिएको थियो । वडाप्रहरी कार्यालय बिर्ताका प्रमुख प्रहरी निरीक्षक निरोज चौलागाईं कार्यक्रमका प्रमुख अतिथि रहनुभएको थियो भने कार्यक्रमको अध्यक्षता कुम्हालटोल सामुदायिक प्रहरी सेवा केन्द्रका वरिष्ठ सल्लाहकार श्याम केसीले गर्नुभएको थियो ।

कार्यक्रममा सनलाईट कलेजका प्रिन्सिपल आलोक चौरसिया, समाजसेवी मार्टिन मोक्तान, नन्दलाल राउत, प्रहरी हवल्दार कुमार विक, तारा बिष्ट, सन्तोषमान रंजितकार, टोल सुधार समाजका अध्यक्ष नन्दलाल अहिर लगायत समाजका विभिन्न क्षेत्रका विशिष्ट व्यक्तिहरूको उपस्थिति रहेको थियो।

कार्यक्रमका प्रमुख अतिथि चौलागाईंले मानव बेचबिखनका विविध स्वरूप, त्यसको कानुनी व्याख्या, जोखिमबाट बच्ने उपाय तथा लागुऔषधको दुष्परिणामबारे विद्यार्थीहरूलाई विस्तृत जानकारी दिनुभयो । साथै, उहाँले कुनै पनि आपराधिक गतिविधि देखेमा प्रहरीलाई तुरुन्त खबर गर्न आग्रह गर्दै विद्यार्थीहरूलाई सामाजिक उत्तरदायित्वप्रति सजग रहन प्रेरित गर्नुभयो।

विद्यार्थीहरूले कार्यक्रमप्रति उत्साहजनक सहभागिता जनाए, सोधपुछ र विचार आदानप्रदानमार्फत उनीहरूको विषयप्रतिको चासो र चेतना स्पष्ट रूपमा देखिएको थियो।

कार्यक्रमको सञ्चालन सामुदायिक प्रहरी कुम्हालटोलका सचिव श्रवणबहादुर रायमाझीले गर्नुभएको थियो। आयोजकका अनुसार कार्यक्रमको मुख्य उद्देश्य युवावर्गमा मानव बेचबिखन तथा लागुऔषधसम्बन्धी चेतना फैलाउने, सुरक्षाका उपायहरूबारे जानकारी दिनु तथा अपराधमुक्त समाज निर्माणमा उनीहरूको सक्रिय भूमिका स्थापित गर्नु हो।

वीरगंज । गुठी संस्थान र नेपाल पत्रकार महासंघ, मधेश प्रदेशबीच ऐतिहासिक लिज सम्झौता सम्पन्न भएको छ। सम्झौताअनुसार, गुठी संस्थानको पूर्ण स्वामित्वमा रहेको श्री राम मन्दिर गुठी अन्तर्गतको ०–४–०–० बिगाहा (चार कठ्ठा) जग्गा पत्रकार महासंघलाई लिजमा प्रदान गरिनेछ।

महासंघले सो जग्गामा व्यावसायिक प्रयोजनका लागि आधुनिक संरचना निर्माण गर्ने लक्ष्य लिएको छ। जनकपुरधामलाई सूचना, सञ्चार र सामाजिक सेवाको केन्द्रबिन्दु बनाउने योजनाअन्तर्गत भवन निर्माण गरिने महासंघले जनाएको छ।

गुठी संस्थान सञ्चालक समितिको निर्णयपछि सार्वजनिक सूचना प्रकाशन गरी प्रस्ताव आह्वान गरिएको थियो। प्राप्त प्रस्तावहरूमध्ये पत्रकार महासंघको प्रस्ताव प्राविधिक र आर्थिक दृष्टिले उत्कृष्ट ठहरिएको संस्थानले जनाएको छ।

सम्झौताअनुसार निर्माणको पूरै लागत महासंघले आफैं व्यहोर्नेछ। साथै, सबै नक्सा, प्राविधिक प्रतिवेदन, लागत अनुमान र कार्यतालिका गुठी संस्थानमा पेश गरिनुपर्नेछ। संरचना निर्माण कार्य नेपालका प्रचलित भवनसम्बन्धी मापदण्ड तथा कानुनी व्यवस्थाअनुसार गरिनुपर्ने स्पष्ट प्रावधान छ।

गुठी संस्थानका प्रतिनिधिहरूले निष्क्रिय सम्पत्तिको उत्पादक उपयोग गर्दै स्थानीय रोजगारी, पूर्वाधार विकास र सेवा विस्तारमा यो सहकार्यले योगदान दिने विश्वास व्यक्त गरेका छन्।

सम्झौताअनुसार, जग्गाको स्वामित्व गुठी संस्थानकै रहनेछ भने महासंघले पुनः बहालमा दिने अधिकार मात्र पाउनेछ। हक हस्तान्तरण गर्न नपाइने स्पष्ट व्यवस्था गरिएको छ।

सम्झौता सम्बन्धी सबै कर, दस्तुर, स्वीकृति र कानुनी प्रक्रिया महासंघले नै व्यहोर्नेछ। सम्झौता हस्ताक्षरको अवसरमा पत्रकार महासंघका केन्द्रीय लेखा संयोजक केसी लामिछाने, प्रदेश अध्यक्ष श्याम बञ्जारा, सम्पूर्ण पदाधिकारी तथा गुठी संस्थानका कर्मचारीहरूको उपस्थिति रहेको थियो।

यो सम्झौता मधेश प्रदेशभरिका पत्रकारहरूका लागि दीर्घकालीन पूर्वाधार निर्माण र पत्रकारिता सशक्तीकरणतर्फको ऐतिहासिक उपलब्धिका रूपमा लिइएको छ। पत्रकार महासंघभित्र यसले नयाँ उत्साह र सम्भावनाको वातावरण सिर्जना गरेको छ।