पोखरिया । पर्साको पोखरिया नगरपालिका–२ स्थित लमरिया विद्यालयमा सुरक्षित र सहज खानेपानी आपूर्तिका लागि उपकार सेवा नेपालद्वारा मोटर हस्तान्तरण गरिएको छ। विद्यालयका बालबालिकाको स्वास्थ्य तथा शिक्षाको स्तर सुधार गर्ने उद्देश्यले सोमबार विशेष समारोहका बीच उक्त सहयोग कार्यक्रम सम्पन्न भएको हो।
कार्यक्रममा उपकार सेवा नेपालकी अध्यक्ष विधा देवी सरावगीको विशेष उपस्थितिमा मोटर हस्तान्तरण गरिएको थियो। सो अवसरमा समाजसेवी प्रकाश थारु, स्थानीय अगुवा तथा विद्यालय व्यवस्थापन समितिका प्रतिनिधिहरूको उल्लेखनीय उपस्थिति रहेको थियो।
यसअघि पनि उपकार सेवा नेपालले सोही क्षेत्रमा रहेका विद्यालय तथा स्वास्थ्य संस्थाहरूमा पंखा वितरण गर्दै राहत पुर्याएको थियो। झखरा विद्यालयमा थप पंखा उपलब्ध गराउने प्रतिबद्धता पनि संस्थाले जनाएको छ।
कार्यक्रममा बोल्दै अध्यक्ष सरावगीले आउँदा दिनहरूमा समेत समाजोपयोगी गतिविधिमा संस्थाले निरन्तर सक्रियता जनाउने बताउँदै समस्त दाताहरूप्रति आभार प्रकट गरिन्। उनले स्थानीय सशक्तिकरण र सेवा प्रवाहमा निरन्तर योगदान पुर्याउने संस्थाको उद्देश्य दोहोर्याइन्।
विद्यालय परिवार तथा स्थानीयवासीले उपकार सेवा नेपालप्रति आभार व्यक्त गरेका छन्।
