वीरगंज । वातावरणीय सन्तुलन कायम राख्ने र हरियाली प्रवर्द्धन गर्ने उद्देश्यले वीरगंज महानगरपालिकाले थालेको “एक घर, एक बिरुवा” अभियान अन्तर्गत बुधबार घण्टाघर चोकमा फलफूलका बिरुवा निःशुल्क वितरण गरिएको छ।
उक्त अभियानको शुभारम्भ कार्यक्रममा महानगर प्रमुख राजेशमान सिंह स्वयं उपस्थित भई स्थानीयवासीलाई बिरुवा वितरण गर्नुभयो। कार्यक्रममा आँप, लिच्ची, कागती, अनार, अम्बा र बेलजस्ता लोकप्रिय फलफूलका बिरुवाहरू वितरण गरिएका हुन्।
कार्यक्रमलाई सम्बोधन गर्दै प्रमुख सिंहले भन्नुभयो, “हरियालीले शहरलाई स्वस्थ बनाउँछ, र प्रत्येक घरको आँगनमा एक बिरुवा रोप्न सके हामीले वातावरणीय सन्तुलनमा ठूलो योगदान दिन सक्छौं। सहरी विकाससँगै हरित विकास पनि उत्तिकै आवश्यक छ।”
महानगरको कृषि शाखा प्रमुख रोशनी यादवका अनुसार अभियानअन्तर्गत करिब ५ हजार बिरुवा वितरण गर्ने लक्ष्य राखिएको छ। यस अभियानको शुरुवात बुधबार घण्टाघर चोकबाट गरिएको हो।
महानगरपालिकाले यो अभियानलाई सार्वजनिक स्थल, विद्यालय, धार्मिक स्थल तथा इच्छुक घरधुरीहरूमा विस्तार गर्दै लाने योजना बनाएको छ।
