वीरगंज । पर्साकाे ठोरी गाउँपालिकामा लालपुर्जा प्राप्त गर्न बाँकी रहेका जग्गाहरूको नापनक्सा उद्घाटन कार्यक्रम साेमबार सम्पन्न भएको छ।
गाउँपालिकाको सभाहलमा आयोजित समारोहमा भूमि आयोग पर्साका अध्यक्ष तवरेज अहमदले डिजिटल मेसिनको बटन थिचेर औपचारिक उद्घाटन गरे ।
गाउँपालिका अध्यक्ष लाल बहादुर श्रेष्ठको अध्यक्षतामा सम्पन्न उक्त कार्यक्रममा नापी कार्यालय पर्साका प्रमुख दिपक सिंह, नापी अधिकृत राजकुमार बिश्वकर्मा, सर्भेक्षक मधुरेन्द्र झा, ठोरी गाउँपालिका–४ का वडाध्यक्ष मान बहादुर थिङ, वडा नं. १ का अध्यक्ष धनमान थापा, जिल्ला समन्वय समिति पर्साकी सदस्य शुशिला विक, कार्यपालिका सदस्य देबिमाया थिङ, फुलमाया दर्जी लगायत जनप्रतिनिधिहरूको उपस्थिति थियो।
वडा नं. ४ का अध्यक्ष मान बहादुर थिङले स्वागत मन्तव्य दिनुभएको कार्यक्रममा भूमि समस्या सहजीकरण समिति सदस्य राम बहादुर श्रेष्ठ, पूर्व वडाध्यक्ष बही बहादुर पाख्रीन, बिजयबस्ती माविका प्रधानाध्यापक नारायण लामा, कार्यपालिका सदस्य फुलमाया दर्जी लगायतले मन्तव्य राखेका थिए ।
आयोग अध्यक्ष तवरेज अहमदले कार्यक्रमलाई सम्बोधन गर्दै आगामी दशैंको समयमा केही लालपुर्जा वितरण गरिसक्ने योजना रहेको जानकारी दिए ।
त्यस्तै, गाउँपालिका अध्यक्ष लाल बहादुर श्रेष्ठले ठोरीबासीका लागि यो अत्यन्तै अनुकूल अवस्था रहेको उल्लेख गर्दै नापी टोलीलाई पूर्ण सहयोग गर्न सबैमा आग्रह गरे ।
संचारकर्मी लक्ष्मी खरेलले सहजीकरण गरेकी कार्यक्रममा करिब १५० जना स्थानीयवासीको सहभागिता रहेको थियो।
