काठमाडौं । राष्ट्रिय मानव अधिकार आयोगले मुलुकमा जारी आन्दोलन र त्यसपछिको परिस्थितिलाई नजिकबाट अनुगमन गरिरहेको जनाएको छ । आयोगले बुधबार जारी गरेको विज्ञप्तिमा जनजीवनलाई सामान्य बनाउँदै लैजान र देशलाई वर्तमान अन्योलताबाट चाँडो निकास दिन सबै पक्षको सकारात्मक भूमिका आवश्यक रहेको बताएको छ ।
आयोगका प्रवक्ता डा. टीकाराम पोखरेलद्वारा जारी विज्ञप्तिमा भनिएको छ, “लोकतन्त्रको विकल्प लोकतन्त्र मात्र हुन सक्दछ भन्ने कुरामा आयोग दृढ छ । जनताका हक अधिकारलाई थप मजबुत र सुरक्षित बनाउँदै लोकतान्त्रिक विधि र प्रक्रियाबाट नै देशले यथाशीघ्र राजनीतिक निकास पाउनुपर्छ ।”
आयोगले हालको सङ्कटको घडीमा राज्यका सबै निकाय र आम नागरिकको सक्रिय सहयोग र संयम जरुरी रहेकोमा जोड दिएको छ । साथै विगत दुई दिनमा भएका हिंसात्मक गतिविधि, आगजनी र तोडफोडका घटनाले देशको ठूलो जनधन क्षति भएको भन्दै यस्ता गतिविधि नगर्न सबैमा आह्वान गरेको छ ।
आयोगले लोकतन्त्रको संरक्षण र मानव अधिकारको सुनिश्चितताका लागि सबै पक्षको जिम्मेवार र सकारात्मक भूमिकामार्फत् मात्र मुलुक स्थायित्व र शान्ति तर्फ अघि बढ्ने विश्वास व्यक्त गरेको छ ।
