काठमाडौं । देशभर नेपाली सेना तथा अन्य सुरक्षा निकाय परिचालन भएपछि राजधानीमा थप पक्राउ र बरामद भएका छन्।
नेपाली सेनाले दिएको जानकारीअनुसार बुधबार विहान १० बजेदेखि दिउँसो १ बजेसम्मको अवधिमा महाराजगञ्जस्थित भाटभटेनी सुपर मार्केट लुटपाटमा संलग्न ४ जनालाई पक्राउ गरिएको छ।
त्यसैगरी डिल्लीबजार–नारायणथान क्षेत्रमा शंकास्पद गतिविधिमा संलग्न व्यक्तिहरुले सुरक्षा फौज देख्नेबित्तिकै छोडेर भागेको नगद २ लाख ३२ हजार ५०० नेपाली रुपैया र अमेरिकी डलर २ हजार ५०० बरामद गरिएको सेनाले जनाएको छ।
यस अवधिसम्म सुरक्षाकर्मीबाट लुटिएका थप १ नाल सहित जम्मा ३२ नाल हतियार बरामद भएको छ।
यस्तै, डडेलधुरास्थित जिल्ला कारागारबाट भागेका कैदीवन्दीमध्ये २६ जनालाई नियन्त्रणमा लिइएको छ भने काठमाडौंको डिल्लीबजार सदर कारागारबाट भाग्ने प्रयासलाई सुरक्षाकर्मीले असफल बनाएको सेनाले जनाएको छ ।
