काठमाडौं । नेपाली सेना लगायत अन्य सुरक्षा निकाय परिचालन भएको १२ घण्टाभित्रै देशभरबाट २७ जना पक्राउ परेका छन्।
मिति २०८२ भाद्र २४ गते राति १० बजेबाट सुरक्षाकर्मी परिचालन गरिएकोमा भदौ २५ गते बिहान १० बजेसम्म काठमाडौंसहित विभिन्न स्थानमा लुटपाट, आगजनी र जनधन क्षति गर्ने उद्देश्यले संलग्न समूहहरुलाई नियन्त्रणमा लिइएको नेपाली सेनाले जनाएको छ।
सुरक्षा निकायले तीनवटा बारुण यन्त्र प्रयोग गरी विभिन्न स्थानमा भएको आगजनी नियन्त्रण गरेको छ। काठमाडौंको गौशाला–चाबहिल–बौद्ध क्षेत्रमा लुटपाटमा संलग्न व्यक्तिहरुबाट रु. ३३ लाख ७० हजार नगद बरामद गरिएको छ।
त्यसैगरी, काठमाडौंका विभिन्न स्थान र पोखराबाट गरी ३१ नाल विभिन्न किसिमका हतियारसहित म्यागजिन र गोलीगठ्ठा समेत बरामद भएको सेनाले जनाएको छ।
उक्त अभियानका क्रममा २३ जना नेपाल प्रहरी र ३ जना सर्वसाधारण घाइते भएका छन् । उनीहरुको सैनिक अस्पतालमा उपचार भइरहेको नेपाली सेनाले जनाएकाे छ ।
