काठमाडौं । नेकपा (एकीकृत समाजवादी) का महासचिव घनश्याम भूसालले भदौ २३ गतेको आन्दोलनमा निहत्था युवामाथि गरिएको सरकारी दमनलाई ‘राक्षसी आक्रमण’ भन्दै कडा आपत्ति जनाएका छन्।
बुधबार जारी गरेको अपिलमार्फत भूसालले नौजवान पुस्ता (जेन–जी) ले सुरु गरेको आन्दोलन सबै नेपालीलाई स्वतः आकर्षित गर्ने खालको जिम्मेवार कदम भएको उल्लेख गरेका छन्। तर सरकारले गरेको नरसंहार र त्यसपछिका तोडफोड, आगजनी तथा लुटपाटका घटनाले मुलुकलाई दशकौँसम्म झस्काइरहने घाउ दिएको उनको भनाइ छ।
भूसालले भने, “प्रधानमन्त्री ओलीको अप्राकृतिक सत्तालिप्साले १० वर्षमा मुलुकले हासील गर्न सक्ने तीव्र विकासका अवसर गुमाए। भदौ २३ को नरसंहारले नेपाललाई नियन्त्रित अस्थिरताको अर्को चरणतर्फ धकेल्यो।”
उनले आन्दोलनको सुरुआती लक्ष्यलाई अपहरण गरेर देशलाई युक्रेन, लिबिया वा बंगलादेशको जस्तै संकटतर्फ धकेल्ने शक्तिहरु सक्रिय भएको चेतावनी पनि दिए।
भूसालले दलाल पुँजीवादसँग गठबन्धन गर्ने नेताहरुको असफलताले लोकतान्त्रिक गणतन्त्र कमजोर भएको र यही नेतृत्व रहिरहे मुलुक अझ ठूला दुर्दिनतर्फ धकेलिने खतरा रहेको बताए।
अपिलमा उनले पार्टी कार्यकर्तामाझ देखिएको हतासा, पलायन र आत्मसमर्पण अस्वाभाविक नभए पनि त्याग, बलिदान र धैर्यतासहित नयाँ विचार, नयाँ संगठन र नयाँ नेतृत्व निर्माण गर्दै अघि बढ्न आग्रह गरेका छन्।
अन्त्यमा उनले नौजवान पुस्तासँग सम्बोधन गर्दै भने, “मेरो पुस्ताको नालायकीप्रति म लज्जित छु, माफी माग्छु। तर त्यसका नाममा तपाईँहरुलाई अरुले लुट्न नपाओस्।”
